Ramiyyə Məmmədova: "Bu ölkə rəhbərliyi ciddi şəkildə Rusiyanın iştirak etdiyi qurumların tədbirlərindən uzaq qaçır"
Rusiyanın xarici işlər naziri Sergey Lavrov görüş zamanı erməni həmkarı Ararat Mirzoyana irad tutub. Görüşdən yayılan qısa videoda Lavrovun Mirzoyana irad tutduğu müşahidə olunub.
"Sizin səfiriniz sərbəstdir, göstərişsiz işləyir?" – deyə Lavrov Mirzoyanı Ermənistanın Vyanadakı və ATƏT-dəki səfirinin fəaliyyətinə görə qınayıb.
Qeyd edək ki, KİV-də Ermənistanın Avropadakı səfirlərinin anti-Rusiya fəaliyyətlərində fəal iştirak etdiklərinə dair məlumatlar yayılmaqdadır.
Erməni səfirlərinin bu addımı və Lavrovun xəbərdarlığı perspektiv üçün nə vəd edir?
Siyasi şərhçi Ramiyyə Məmmədova "Bakı-Xəbər"ə açıqlamasında bildirdi ki, Ermənistan hakimiyyətinin son anti-Rusiya bəyanatları, Qərb və onun strukturlarına inteqrasiya çağırışlarının artması təsadüf sayıla bilməz: "İrəvan artıq Kremlin orbitindən uzaqlaşmaq xəttini götürüb. Bu plan da Ermənistan hakimiyyətinin əsas sponsorlarından olan "Soros" fondundan gəlir. Belə ki, Avropada bütün mərkəzlərini bağlayan fond fəaliyyətini digər ölkələrə keçirib. Radikal addıma səbəb kimi də fondun layihələrinin Mərkəzi-Şərqi Avropa və postsovet məkanında uğursuzluqları göstərilir. Lakin Ermənistan istisnadır. Səbəb də odur ki, bu ölkədə "Soros"un dayaqları ən yüksək səviyyədə təmsil olunub. Baş nazirdən tutmuş digər rəsmilərə qədər əksər məmurlar ondan "yemlənir", tapşırıqları ondan alır. Ara-sıra Ermənistanın KTMT-dən çıxması, Rusiya hərbi bazasının ölkədən çıxarılması kimi çağırışlar da bundan qaynaqlanır. Aparılan kampaniyanın da effektiv olması üçün bu işə xarici ölkələrdəki səfirlərini də cəlb ediblər.
Ermənistanın MDB, KTMT, Aİİ kimi birliklərdən çıxmağa hazırlaşması ilə bağlı yayılan məlumatlar artıq konkret faktların timsalında öz təsdiqini tapmaqdadır. Bu ölkə rəhbərliyi ciddi şəkildə Rusiyanın iştirak etdiyi bu qurumların tədbirlərindən uzaq qaçır.
Bəlli olub ki, Paşinyanın Rusiyaya qarşı cəsarətli addımlar atması daha çox Qərbdən, əsasən də ABŞ-dan qaynaqlanır. Bildirilir ki, Rusiya Ermənistana təzyiq göstərsə və ya embarqo tətbiq etsə, ABŞ İrəvana güclü dəstək verəcək".
Rusiyanın isə bütün bunlara reaksiaysı çox maraqlı olacaq. Qeyd edək ki, Ermənistanın istəyinə baxmayaraq, Rusiya hərbi bazasını bu ölkədən çıxarmaq niyyətində deyil. Beləliklə, Cənubi Qafqazda Fransa, ABŞ və Hindistanın təsiri və Ermənistanın əli ilə hərbi gərginlik risqi artmaqdadır. Təbii ki, belə vəziyyət Ermənistanın aqressiv iddialarının güclənməsinə gətirib çıxaracaq və bu da bütün regionun sabitliyini təhlükə altına salacaq. Ermənistanın bu prosesə xaricdəki diplomatlarını da qoşması vəziyyətin həddən artıq gərgin olduğundan xəbər verir.
Məhəmmədəli QƏRİBLİ
