Ceyhun Məmmədov: "Sözügedən şəxslərin ifşa olunması bir sıra məsələlərə görə xüsusi əhəmiyyət kəsb edir"
Daha bir ermənipərəst siyasətçinin korrupsiya əməlləri ortaya çıxıb. Qatı ermənipərəst mövqeyilə tanınan, vaxtilə Laçın yolunda quraşdırılan sərhəd buraxılış məntəqəsinə görə Azərbaycanı hədələyən Paris meri Ann İdalqo korrupsiyada ittiham olunur.
O, həyat yoldaşı ilə birgə Yeni Kaledoniya və Fransız Polineziyasına iki həftəlik işgüzar səfərə gedib. İdalqonun adalarda və Sakit Okeanda keçirdiyi bütün müddət ərzindəki xərcləri dövlət büdcəsindən ödənilib. Lakin məlum olub ki, səfərin işgüzar hissəsi cəmi bir həftə davam edib. İdalqo səyahətinin ikinci həftəsini də dövlət vəsaiti hesabına həyata keçirib. İdalqonun səfər çərçivəsində planlaşdırılan rəsmi tədbirlərin əksəriyyətinə qatılmadığı da ortaya çıxıb. Hazırda məsələ ilə bağlı araşdırma aparılır.
Ümumilikdə, son zamanlar erməni maraqlarına xidmət edənlər korrupsiya qalmaqalına görə bir-bir ifşa olunur. Bu baxımdan, müxtəlif dini təşkilatların "ianələrini" öz hesabatında əks etdirməyən Baronessa Kerolayn Koks, Avropa Parlamentinin üzvü, böyük "Qatargeyt" qalmaqalında əli olan və axtarış zamanı evində əskinaslarla dolu çantalar tapılan Yeva Kaylini və 2024-cü ilin mayında dörd cinayət işi üzrə mühakimə olunacağı gözlənilən ABŞ Senatının Xarici Əlaqələr Komitəsinin keçmiş sədri Bob Menendes.
Bütövlükdə, dünyada tanınmış ermənipərəst ictimai-siyasi xadimlərin korrupsiya əməllərinin ifşa edilməsi erməni lobbisinin təsir imkanlarının zəiflədilməsi baxımından nə kimi əhəmiyyət kəsb edir?
"Bütün bunlar erməni lobbisinin təsir imkanlarının bu və ya digər dərəcədə zəifləməsinə öz təsirini göstərəcək"
Sözügedən məsələyə aydınlıq gətirən millət vəkili Ceyhun Məmmədov "Bakı-Xəbər"ə açıqlamasında qeyd etdi ki, bu şəxslərin ifşa olunması bir sıra məsələlərə görə xüsusi əhəmiyyət kəsb edir: "Birincisi, həmin dövlətlərin, onları təmsil edən senatorların, parlament üzvlərinin nə ilə məşğul olduğunu, hansı korrupsiya əməllərində adlarının hallandığını ortaya qoyur. Onların bu formada ifşa olunması bir sıra qaranlıq məsələləri gün işığına çıxarır. Məlum olur ki, sözügedən tanınmış şəxslərin əsas məqsədi erməni lobbisindən böyük məbləğdə pul qoparmaq və bunun qarşılığında Azərbaycana qarşı qaralama kampaniyası aparmaq olub. Bütün bunlar təkcə sözügedən şəxslərin ifşa olunması anlamına gəlməməlidir. Eyni zamanda, bütün bu baş verənlər erməni diasporunun ifşa olunması deməkdir. Bu baxımdan da yaşanan hadisələr xüsusi önəm daşıyır. Biz hər zaman deyirdik, cənab Prezident də dəfələrlə qeyd edib ki, ayrı-ayrı dövlətlər, qurumlar erməni lobbisinin təsiri altındadır və onların sifarişlərini yerinə yetirirlər. Son hadisələr də bir daha onu göstərdi ki, dəyişən bir şey yoxdur. Erməni lobbisi korrupsiya yolu ilə tanınmış şəxsləri ələ alır və bundan öz çirkin məqsədləri üçün istifadə edir. Ona görə də baş verənlər həm də erməni lobbisinin ifşa edilməsi anlamına gəlir. Ermənilərin həqiqi mahiyyətinin ortaya çıxması baxımından da bu, xüsusi əhəmiyyət kəsb edir. Bütövlükdə, Azərbaycanın işinin haqlı olduğunu göstərir. Fikrimcə, bütün bunlar erməni lobbisinin təsir imkanlarının bu və ya digər dərəcədə zəifləməsinə öz təsirini göstərəcək".
Vidadi ORDAHALLI
