Elçin Qurbanov: "Yerli mal almaqla problemi həll etmək mümkün deyil"
"Lars" keçid məntəqəsi təxminən bir həftədir ki, Ermənistanın kənd təsərrüfatı yükləri üçün bağlıdır, ona görə ki, Rusiya hakimiyyəti Paşinyan hakimiyyətinin antirusiya davranışına görə Ermənistana qarşı növbəti elan olunmamış sanksiya tətbiq edir.
Bu barədə erməni mediası məlumat yayıb.
Məqalədə Ermənistan Baş naziri aparatının rəhbəri Araik Arutyunyanın problemi özünəməxsus şəkildə "həll etdiyi" xatırladılıb.
Vurğulanıb ki, sahibkarlar bu sözlərdən şoka düşüblər və belə bir iradlarını bildiriblər:"... deyirlər ki, ermənilər alsın. Ermənilər 2000 ton çiyələk, 20000 ton pomidor almalıdır? İndi Ermənistanda və diasporda ermənilərin sırf erməni məhsullarını almaları son dərəcə vacibdir. Biznesə və vergi ödəyicisinə bu şəkildə dəstək vermək müstəqilliyi və suverenliyi gücləndirmək üçün həyati davranışdır".
İqtisadçı ekspert Elçin Qurbanov "Bakı-Xəbər"ə bildirdi ki, Ermənistan belə populist çağırışlarla öz iqtisadiyyatını xilas edə bilməyəcək: "Ermənistan iqtisadiyyatı can vermək üzrədir. Bunun ən başlıca səbəbi ölkənin blokada vəziyyətində olmasıdır. Bu faktorlar problemin günü-gündən ciddiləşməsindən xəbər verir. Mövcud vəziyyətdə Ermənistanın yeganə çıxış yolu Azərbaycanla münasibətləri normallaşdırmaq, destruktiv və sərsəm bəyanatlar səsləndirməkdən vaz keçmək, Fransanın ətəyinə sığınmamaq və sülh müqaviləsi imzalayaraq regiondakı kommunikasiyanın blokdan çıxmasını təmin etməkdir. Yolların blokdan çıxması isə heç bir yerə çıxışı olmayan Ermənistan iqtisadiyyatı üçün əlavə gəlir yerlərinin yaranmasına, yeni iş yerlərinin açılmasına səbəb ola bilər. İşsizlik səbəbindən ölkənin getdikcə boşalması və insanların iş tapmaq üçün başda Rusiya olmaqla müxtəlif ölkələrə axınının qarşısını almaq istəyən Ermənistan üçün bu, ideal sayıla bilər. Eyni zamanda Türkiyə tərəfi də Marqara körpüsünün açılmasına razılıq verəcək. Körpünün açılması hər iki tərəf arasında iqtisadi əlaqələrin qurulması, türk sərmayədarları üçün yeni bazarın açılması deməkdir. Bu da öz növbəsində Ermənistan üçün yeni gəlir mənbəyi və yeni iş yerləri deməkdir. Göründüyü kimi, Ermənistanın yeganə çıxış yolu Azərbaycan və Türkiyə ilə əməkdaşlıqdan keçir. Rusiyanın tətbiq etdiyi bu yumşaq sanksiya Ermənistana əlavə zərbələr vurur. Faktiki olaraq dalana dirənmiş ölkə üçün yeganə nəfəslik də bağlanıb. Yerli mal almaqla problemi həll etmək mümkün deyil. Son günlər Ermənistanın Avrasiya İqtisadi İttifaqından (Aİİ) çıxması barədə söhbətlər də rəsmi İrəvanın siyasi kuluarlarında dolaşır. Bu isə Ermənistan iqtisadiyyatının konkret çökməsi ilə nəticələnə biləcək bir addımdır. Onsuz da son 10 il Ermənistan iqtisadiyyatı mövcudluğunu Aİİ-yə borcludur. Regionun əsas dövlətləri ilə münasibətlərini korlayan Ermənistan işğalçılıq siyasətinə görə regionda həyata keçirilən bütün beynəlxalq layihələrdən uzaq qalıb. Bununla yanaşı, qondarma soyqırımı siyasətinə görə Türkiyə ilə də normal iqtisadi münasibətlər qura bilmir. Bu səbəbdən də son 10 il ərzində Aİİ Ermənistan iqtisadiyyatına, süni də olsa, nəfəs verə bilmişdi".
Məhəmmədəli QƏRİBLİ
