Sahil Kərimli: "Savaşda məğlub olmasına görə onu ciddi şəkildə ittiham etsələr də, qınasalar da, hər halda nifrət də etmirlər"
Nikol Paşinyanın səkkiz saatlıq mətbuat konfransı vaxt itkisi idi, çünki imic formalaşdırmaq baxımından hökumət başçısına heç nə vermədi.
Bu sözləri erməni politoloq Armen Badalyan Baş nazir Nikol Paşinyanın 24 noyabrda diaspor və yerli fəallar üçün keçirdiyi mətbuat konfransı haqda qeyd edib:
"Paşinyan oxşar mətbuat konfransları keçirən Putini yamsılamağa çalışdı. Putinə hazırlanmış suallar da verilir, lakin onlara cavab verməklə Rusiya prezidenti hansı problemi həll etdiyini bilir. Paşinyanın məsələsində belə bir anlayış yox idi, sadəcə olaraq, Baş naziri qəzəbləndirməmək üçün belə sualları seçmişdilər".
Badalyan vurğulayıb ki, hakim partiyanın reytinqi düşsə də, yenə də rəqiblərinin reytinqindən yüksəkdir və əsas problem də budur.
Doğrudan da maraqlıdır, hakimiyyətə gəldiyi gündən uğursuzluğu davam edən Paşinyan və partiyasının reytinqi niyə hələ də yüksəkdir? Müharibədən dərhal sonra, məğlub olmasına baxmayaraq, seçkini belə uddu.
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Ermənistan baş naziri Nikol Paşinyanın reytinqinin yüksək olması sadə erməni xalqının ona inam göstərməsi, hələ də etibar etməsindən irəli gəlir: "Çünki, Ermənistan cəmiyyətində hər nə qədər də radikal qüvvələr, destruktiv qruplaşmalar olsa da, ağaşı təbəqə Paşinyana güvənir. Baxmayaraq ki, Paşinyan müharibəni uduzub, məğlub ölkənin lideridir, bu amil onun reytinqinə böyük zərbə vurmur. Çünki, Paşinyanı dəstəkləyən insanlar müharibə istəmir, sülh və sabitlik tərəfdardırlar. Erməni xalqının böyük hissəsi qonşularla dinc normal münasibətlər qurulmaısının tərəfdarıdır. Eyni zamanda Paşinyanın antirusiya siyasəti, Qərbyönümlü siyasət yürütməsi də Ermənistanın cəmiyyətinin bir hissəsində alqışlanır. Əlbəttə ki, Paşinyan hər nə qədər müstəqil və praqmatik siyasət yürüdə bilməsə də yaxşı anlayır ki, Azərbaycanla tez bir müddətdə sülh müqaviləsi imzalamağa məhkumdur. Onun yeganə yolu budur. Baş nazir bu məsələlər ətrafında bir çox siyasi manipulyasiyalar etməklə daxili auditoriyada özünə xal qazana bilir. Daha bir amil isə Ermənistan siyasi eltitasında təmsil olunan insanların qaragüruh səviyyəsində addım atmalarıdır. Elə Paşinyan hakimiyyətində təmsil olunan əksər şəxslər də qeyri ciddi bəyanatlar səsləndirməklə, radikal çıxışlar etməklə və bununla da Ermənistanı ciddi təhlükəlrə sürükləməklə öz reputasiyalarına ciddi ziyan vururlar. Bu prosesləri erməni xalqı düzgün qiymətləndirir və ermənilərin Nikol Paşinyana güvənməkdən başqa çarəsi yoxdur".
Ekspertin sözlərinə görə, Ermənistanda başqa heç bir normal ölkədə reallaşması mümkün olmayacaq hadisə baş verdi: "Hakimiyyəti dövründə ölkəsi üçün taleyüklü xarakter daşıyan bir savaşı uduzmuş baş nazir yenidən seçicilərin səslərinin mütləq çoxluğunu qazandı. Hər halda, baş nazir N.Paşinyanın siyasi partiyasının 53,92 faiz səs toplaması bəzi daxili və xarici qüvvələrə problem yarada biləcək faktordur. Artıq hər kəsə aydın oldu ki, Ermənistan cəmiyyəti keçmişə geri dönmək istəmir. Çünki N.Paşinyanın siyasi düşmən-rəqibləri Köçəryan-Sarkisyan cütlüyünün liderlik etdiyi Qarabağ klanı Ermənistanı keçmişə götürməyə, yenidən savaşa yol aça biləcək gərginliyə götürməyi vəd edirdi. Məhz bu səbəbdən də N.Paşinyan və onun partiyası seçkilərdə qalib gəldi.
Əslində, N.Paşinyanın Ermənistan cəmiyyətində xüsusi nüfuza və dəstəyə sahib olduğunu düşünmək sadəlövhlük olardı. Ancaq savaşda məğlub olmasına görə onu ciddi şəkildə ittiham etsələr də, qınasalar da, hər halda nifrət də etmirlər. Əksinə, Ermənistan cəmiyyətinin nifrəti, əsasən hərbi cinayətkarların – Robert Köçəryan və Serj Sarkisyanın liderlik etdiyi Qarabağ klanına qarşı yönəlib.
Ona görə də, Paşinyanın qələbəsini məhz etiraz elektoratı təmin etmiş oldu".
Məhəmmədəli QƏRİBLİ
