İran İslam İnqilabı Keşikçiləri Korpusunun dəniz qüvvələrinin komandiri Əlirza Təngsiri xəbərdarlıq edib ki, ABŞ gəmiləri Fars körfəzində "ağıllı" hərəkət etməlidir, çünki onlar raket məsafəsi daxilindədirlər.
Bundan başqa o qeyd edib: "ABŞ-ın Körfəzdə ağıllı davranması sağlam düşüncədir. Onların son illərdə Fars körfəzində görünmələri sırasında bir qarış belə sularımıza daxil olmaları ilə bağlı bir hal olmayıb. ABŞ Fars körfəzində olanda özləri də bilirlər ki, Hörmüz boğazı bizim əlimizdə olan bir "çanta"dır və onlar tamamilə bizim raket və silahlarımızın hədəfindədir. Gərək heç vaxt bizimlə vuruşmağa və ya duelə girməyə çalışmasınlar".
Tanqsirinin sözlərinə görə, İranda Amerika gəmilərinin bütün hərəkətləri ilə bağlı foto və video materiallar var. Qeyd edək ki, bu günlərdə ABŞ Mərkəzi Komandanlığı bildirib ki, "Duayt Eyzenhauer" təyyarədaşıyan gəmisinin başçılıq etdiyi Amerika zərbə qrupu Hörmüz boğazından keçərək Fars körfəzinin sularına daxil olub. Qrupa flaqman təyyarədaşıyan gəmi, idarə olunan raket kreyseri, esmineslər və doqquz təyyarə eskadrilya daxildir. Məlumata görə, Amerika gəmiləri ilə bir Fransız freqatı olan "Lanqedok" da bölgəyə gəlib. Bütün bunlar İrana bağlı qüvvələrin İraq və Suriyada ABŞ hərbi bazalarına qarşı hücumlarının artması fonunda baş verir. Məhz bu hal ABŞ-ın İrana zərbələr endirmə ehtimalını xeyli artırıb. Bunu NATO-nun baş katibi Yens Stoltenberqin açıqlamaları da təsdiq edir. Onun sözlərinə görə, İraqdakı və Suriyadakı ABŞ bazalarının vurulması və ticarət gəmilərinə hücumlar eskalasiya risqini göstərir. Stoltenberq qeyd edib ki, İran öz proksilərini nəzarətdə saxlamalıdır: "İran Yaxın Şərqdə İranyönlü qüvvələrin sabitliyi pozan hərəkətlərini dayandırmalıdır. Biz ABŞ-ın İraq və Suriyadakı mövqelərinə pilotsuz təyyarələr və raket zərbələri, eləcə də kommersiya gəmiçiliyinə hücumlar gördük. Bu, eskalasiya risqini artırır. İran öz etibarlı qüvvələrini cilovlamalıdır". Stoltenberq qeyd edib ki, iranpərəst qüvvələrin hərəkətləri NATO-nun Yaxın Şərqdə geniş mövcudluğu fonunda, o cümlədən alyansın İraqda öz imkanlarını artırmaq missiyasının bir hissəsi kimi həyata keçirilir. Bundan öncə ABŞ prezidenti Co Bayden də İran Yaxın Şərqdəki Amerika hərbçilərinə hücum edəcəyi təqdirdə onlara cavab veriləcəyini açıqlayıb. ABŞ lideri xəbərdarlıq edib ki, rəsmi Tehrandan ABŞ ordusuna qarşı reaksiya davam edərsə, Vaşinqton cavab verəcək. Bayden vurğulayıb ki, ABŞ ordusu Yaxın Şərq regionunda İsrail və Fələstin arasında gərginləşən münaqişəyə görə deyil, terrorçu qruplarla mübarizə üçün orada yerləşdirilib. İranın xarici işlər nazirinin müavini Məhəmməd Həsən Şeyx Ol-İslami isə vurğulayıb ki, ABŞ İrana və onunla əlaqəli infrastruktura hücum etməyə cəsarət etsə, cavab təsəvvüredilməz olacaq: "Bu, ABŞ-ın bizə qarşı ilk hədəsi deyil, biz gündəlik təhdidlərə öyrəşmişik. Amma hər halda, əgər bu baş versə, səhvlərə yol versələr, İranın cavabı bütün təsəvvürlərdən kənar olacaq. İran 30 ildir fələstinlilərin hüquqlarını müdafiə edir və bundan sonra da müdafiə edəcək. Suriyalılar öz ölkələrini müdafiə edə bilərlər, lakin kömək istəsələr, İran onlara dəstək verəcək. Vəziyyət fəlakətlidir, biz bunu dayandırmalıyıq. Biz indi İraq və digərləri ilə birlikdə münaqişənin genişlənməsinin qarşısını almaq üçün əlimizdən gələni edirik".
Qeyd edək ki, artıq Fars Körfəzi və Oman dənizi sahillərində İran İnqilabı Keşikçiləri Korpusunun bütün yeraltı raket və pilotsuz bazaları yüksək hazırlıq vəziyyətinə gətirilib. Bu addım ABŞ-ın bölgədəki hərbi mövcudluğunun genişlənməsinə cavab sayılır. Baş verənləri İsrail də diqqətlə izləyir. İsrailin keçmiş xarici işlər naziri, müxalif "Yisrael Beytenu" Partiyasının sədri Aviqdor Liberman qeyd edir ki, İsrail hökuməti Livan və Yəməndə İranın dəstəklədiyi terror qruplaşmalarının təxribatlarına daha sərt cavab verməlidir. Sabiq nazir "Hizbullah" terror təşkilatının İsrailin şimal bölgəsini tez-tez hədəfə almasını qəbuledilməz adlandırıb. Liberman əlavə edib ki, İsrail "Hizbullah"ı sərhəd bölgəsindən geri çəkilməyə məcbur etməlidir: "İsrail dövləti yumruq torbası ola bilməz, "Husilər"lə əlaqədar baş verən hər şey dözülməzdir". Keçmiş nazir vurğulayıb ki, İrana bağlı bu qüvvələrə qarşı ABŞ-ın da daha sərt addımlar atmasına ehtiyac var. Məhz bu fonda ABŞ-ın müdafiə naziri Lloyd Ostin İraq və Suriyada ABŞ hərbçilərinə qarşı hücumlar dayandırılmayacağı təqdirdə İrana bağlı qruplara yeni zərbələrin endirilməsi ehtimalını açıq saxlayıb. Bu durumda ABŞ ordusu Suriyada bir neçə həftə ərzində üçüncü hava hücumunu həyata keçirərək, Albu Kamal qəsəbəsi yaxınlığındakı təlim obyektini və Mayadin şəhəri yaxınlığındakı İrana bağlı sığınacaqları vurub. Ostin bildirib ki, Suriyanın şərqindəki son hava zərbələri İslam İnqilabı Keşikçiləri Korpusu və ona bağlı qrupların istifadə etdiyi obyektləri hədəf alıb: "Bu zərbələr İraq və Suriyada ABŞ qüvvələrinə qarşı hücumlara görə bilavasitə məsuliyyət daşıyan bu qrupların fəaliyyət azadlığını sarsıtmaq üçün nəzərdə tutulub".
Nahid SALAYEV
