Samir Hümbətov: "Bura onlar üçün agentura şəbəkəsini geninə-boluna istifadə edəcəkləri bir ölkə deyil"
28 noyabr 2023-cü il tarixində Amerika Birləşmiş Ştatlarının və Almaniyanın müvəqqəti işlər vəkilləri, habelə Fransanın fövqəladə və səlahiyyətli səfiri ayrı-ayrılıqda Xarici İşlər Nazirliyinə (XİN) çağırılıb.
Bu barədə Xarici İşlər Nazirliyi məlumat yayıb.
Görüşlərdə, bu ölkələrdə qeydiyyatda olan təşkilatların iştirakı ilə "Abzas Media" xəbər portalının qeyri-qanuni maliyyə əməliyyatları həyata keçirdiyi, eləcə də sözügedən ölkələrin səfirliklərinin də bu fəaliyyətə cəlb olunduğu diqqətə çatdırılıb və bu fəaliyyətə ciddi etiraz bildirilib.
Çox ciddi məsələdir. Ölkədəki səfirliklərin öz funksiyasından kənar fəaliyyətlərlə məşğul olduğu rəsmən təsdiqlənir. Buna nə ad vermək olar?
Siyasi şərhçi Samir Hümbətov "Bakı-Xəbər"ə açıqlamasında bildirdi ki, son vaxtlar Qərb ölkələrinin Azərbaycana qarşı əvvəldən tutduğu mövqe yavaş-yavaş aşkara çıxmağa başlayır: "Bir şəkildə həm də onu göstərmiş oluruq ki, bu dövlətlər Azərbaycan əraziləri işğal altında olduğu dönəmdə başqa, indi isə tamam başqa mövqe tuturlar. Cəmiyyət də bunu görməyə başlayıb artıq. Hər bir dövlətin içərisində başqa dövlətlərin xüsusi xidmət orqanlarının əməkdaşları, agentura şəbəkəsi fəaliyyət göstərə bilər, bu mümkündür. Amma məsələ burasındadır ki, həm ABŞ, həm Almaniya, həm də Fransanın son dövrdə aktiv şəkildə Azərbaycan daxilində qeyri-stabil vəziyyət yaratmaq istədiyi Azərbaycan dövlətinin nəzarətindədir. Onlara bağlı olan qruplaşmaların, agentura şəbəkəsinin fəaliyyətini də görür. Əgər bu vaxta qədər Azərbaycan dövləti hər hansı bir addım atmırdısa, bu o deməkdir ki, Azərbaycan prosesləri yoxlayırdı, nəticənin nə olacağını gözləyirdi. Ancaq ortaya çıxır ki, onlar özlərinə bağlı olan media resursları vasitəsilə cəmiyyəti manipulyasiya etməyə çalışırlar. Son dövrə baxdığımda Qərb mərkəzlərinə bağlı olan media resurslarında açıq şəkildə təbliğat apardıqları görsənir. Yəni açıq şəkildə dövlətin siyasətinə zidd yol tuturlar. Burda çox təəssüf edici məqam odur ki, bu prosesi məhz Azərbaycan əsilli, ölkəmizdə və ya Avropada yaşayan insanların əli ilə aparırlar. Əlbəttə ki, bu sırada hansısa saytın, media resursunun belə aktiv işləməsi ölkəmiz üçün heç də xoş deyil. Həmin şəxslər Azərbaycan dövlətinə qarşı bu cür mövqe tutmalı deyil. Həmin dövlətlər agentura şəbəkəsini yox, ikili münasibətləri inkişaf etdirməlidirlər. Onlar Azərbaycanla bərabər normal hüquqlu tərəfdaşlıq münasibətlərini formalaşdırmalıdırlar. Biz bu hərəkətləri kiməsə qarşı etmiriksə, bizə də qarşı olmamalıdır. Amma bəzi insanlar var ki, görünür onları ələ almaq daha rahatdır. Nəticədə də həmin şəxslər vasitəsilə cəmiyyətin fikrinə təsir etməyə çalışırlar. Hesab edirəm ki, Xarici İşlər Nazirliyi haqlı olaraq bu iradı onlara bildirib. Bura onlar üçün agentura şəbəkəsini geninə-boluna istifadə edəcəkləri bir ölkə deyil. Bura onların əlində müstəmləkəyə çevrilmiş ölkə deyil. Bura Azərbaycandır və Azərbaycanın da özünün milli maraqları, dövlətçilik prinsipləri var. Onun qorunması bütün dövlətlərin hüquqlarının qorunmasından daha üstündür. Beynəlxalq hüququn bir nömrəli tələbi də hər bir dövlətin öz marağının qorunmasıdır. O baxımdan düşünürəm ki, Xarici İşlər Nazirliyinin addımları kifayət qədər lazımi və önəmlidir".
Məhəmməsəli QƏRİBLİ
