Mirkazım Seyidov: "ABŞ-ın yaxın gələcəkdə Ermənistanı nəyə sürükləyəcəyindən sadəcə dəhşətə gəlməli idilər"
Ermənistanın Baş naziri Nikol Paşinyan çox cəsarətli davrandı, o, Rusiyadan tam asılı olmaq istəmədiyini açıq şəkildə ifadə etdi. Bu sözləri ABŞ Dövlət katibi Blinkenin köməkçisi Ceyms O`Brayn deyib.
"Deyərdim ki, Baş nazir Paşinyan çox cəsarətlidir, o, Ermənistanın sərhədlərinin açılması və Qərblə münasibətlərin inkişafı baxımından irəliləməsini istədiyini, Ermənistanın Rusiyadan tam asılı olmasını istəmədiyini açıq şəkildə bildirdi", - o vurğulayıb.
O`Brayn qeyd edib ki, son 1-2 ildə Paşinyanın həyata keçirdiyi islahatlar nəticəsində ölkədə sürətli iqtisadi artım davam edir.
Sanki Paşinyanı "qaza" gətirirlər və əsas olmadan tərifləyirlər. Ermənistanda son bir ildə hansı iqtisadi artım olub?
Paşinyanı belə tərifləməklə, Ukrayna və digər ölkələrdə olduğu kimi, onu burulğanın altına salmaq meylləri nəzərə çarpırmı?
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki, ABŞ-ın kimləri yarı yolda buraxdığını yada salmaq elə də çətin deyil: "Ən azından, bunun üçün postsovet ölkələrində yaşananlara diqqət etmək gərəkdir. Qonşu Gürcüstanı da belə sevdaya salmışdılar. Nəticədə Rusiya ölkəyə hərbi müdaxilə etdi. Demokratik hərəkatın başında duran Saakaşvili görün harada və nə vəziyyətdədir? ABŞ və Qərb bu cür fədakarlıq göstərən adamı heç əməlli – başlı müdafiə də etmir. Ukraynaya nəzər salaq. Zelenskini müharibə aparmağa təhrik etdilər. Ortada heç bir nəticə yoxdur. Müharibə Ukraynada gedir, viran qalan da ABŞ yox, Ukraynadı. Əhalisi Avropada qaçqın olan da Ukraynadır. Bir neçə dəfə Zelenski şikayət edib ki, onlara heç lazım olan silahları da vaxtında vermirlər. ABŞ-ın layihələri budur. Maraqlıdır ki, bu cür burulğana saldıqları ölkələri heç bəyənib NATO-ya da üzv etmirlər. İndi də bu rolu Paşinyan icra edir. Rusiyanı bölgədən çıxarmaq öhdəliyini götürüb. Zelenskilik, Saakaşvililik etmək istəyir. Ancaq ortada yalnız məğlubiyyət görünür. Ölkənin iqtisadiyyatı, əksinə, daha acınacaqlı vəziyyətə düşüb. ABŞ deməlidir ki, Ermənistanın yeganə çıxış yolu qonşuları ilə mehriban yaşamaqdan keçir. Yalnız belə olan təqdirdə yollar açılar və Ermənistanın iqtisadiyyatı inkişaf edə bilər. ABŞ Paşinyanın xarakterindən istifadə edir. Görürlər ki, alınır, onu daha da qızışdırırlar. Onlara Rusiyaya yaxın ərazilərdə qaynar ocaqlar lazımdır. Ermənistanın hazırkı şəraiti onlar üçün münbitdir. Ermənistan KTMT-dən çıxmaq planlarını açıqlamayıb, Rusiya bazasının çıxarılmasını tələb etmir, lakin aydındır ki, Paşinyan Rusiya üçün sürpriz hazırlayır. İrəvan bütün bunları, demək olar ki, eyni vaxtda və tamamilə qəfil edəcək. Bundan sonra İrəvanla Moskva arasında qarşıdurma kəskin mərhələyə keçəcək. Amerikanın Ermənistana təklif etdiyi, mahiyyət etibarı ilə silah tədarüküdür və bu, başqa bir ölkə ilə hərbi münaqişə vəziyyətində olan bir ölkə üçün nəzərdə tutulub. İrəvandakı ayıq düşüncəli siyasətçilər ABŞ-ın yaxın gələcəkdə Ermənistanı nəyə sürükləyəcəyindən sadəcə dəhşətə gəlməli idilər, lakin revanşist infeksiyasına yoluxan ermənilər açıq-aşkar optimist ssenariyə ümid edirlər".
Məhəmmədəli QƏRİBLİ
