Amid Əliyev: "Bütün bu faktlar onu deməyə əsas verirdi ki, son anda ABŞ öz daimi maraqlarına sadiq qalacaq"
ABŞ Dövlət katibi Blinken münasibətlərin normallaşdırılması məqsədilə dekabrda ABŞ Dövlət katibinin köməkçisi Ceyms O`Braynın Azərbaycana səfərinə icazə verilməsini xahiş edib.
Bu barədə Dövlət katibi Blinken Azərbaycan Prezidenti İlham Əliyevlə telefon söhbəti zamanı deyib.
Prezident İlham Əliyev həmin təkliflə bir şərtlə razılaşıb ki, bu səfərdən sonra Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağa aradan qaldırılsın.
Deməli, ortaya çıxır ki, ABŞ yüksək post tutan Azərbaycan rəsmilərinə ölkəsinə səfərə qadağa qoyubmuş. Azərbaycan da adekvat addım atıb. İndi isə Azərbaycandan xahiş edir ki, vəziyyət əvvəlki məcraya qayıtsın. ABŞ-ın geri addım atması nə ilə bağlıdır?
Politoloq Amid Əliyev "Bakı-Xəbər"ə açıqlamasında bildirdi ki, hər bir Qərb dövləti kimi, ABŞ da öz xarici siyasətində milli və daimi maraqları hər şeydən üstün tutur: "Azərbaycana qarşı başlanmış bu kampaniyanın sonunda ABŞ dövlət katibinin son anda prosesə qoşularaq məsələni müsbət məcraya yönləndirəcəyi gözlənilən idi. Bu birinci dəfə deyil ki, dövlət katibinin köməkçiləri Azərbaycana qarşı reallığa uyğun olmayan fikirlər söyləyirlər. Bundan qabaq da belə hallar olub və son anda ABŞ yenə də Azərbaycanla əməkdaşlığı daha üstün tutub. Bu da heç təsadüfi deyil. Azərbaycan ABŞ-ın bölgədəki strateji müttəfiqidir. Enerji layihələrindəki tərəfdaşıdır, beynəlxalq terrorizmə qarşı mübarizədə etibarlı silahdaşıdır və nəhayət, ABŞ son iki il ərzində sülhün əldə olunması prosesində vasitəçi olmaqla yanaşı, Azərbaycanın mövqeyini dəstəkləyən dövlətdir. Bütün bu faktlar onu deməyə əsas verirdi ki, son anda ABŞ öz daimi maraqlarına sadiq qalacaq. Lakin bununla yanaşı, ABŞ Azərbaycanın nəbz yoxlamasını da etdi, S.3000 qanununu da qəbul etdi və yüksək səfərləri də təxirə saldı. Yəni müvafiq addımlar sırasında bunları etməklə Azərbaycana mənəvi təzyiq rıçaqlarını işə saldı. Amma inersiya qüvvəsi tam tərsinə işlədi. Azərbaycana qarşı proqramların müəllifi olan Ceyms O'Braynın dekabrda Azərbaycana gəlişinə yüksək səviyyəli telefon trafikində icazə istənildi. Nəticədə isə Azərbaycanın da şərti məntiqli və real oldu ki, bunun ikitərəfli əsasda olması vacibdir. Bunu da ABŞ tərəfi qəbul etdi. Telefon trafikinin baş tutması onu göstərdi ki, Azərbaycanla danışıqlarda amiranə, təzyiq, sıxışdırmaq leksikonundan yox, qalib dövlətə məxsus olan lüğətdən istifadə etmək lazımdır. Əks halda şərtlər qarşısına paritet şərtlər qoyula bilər və qoyuldu da.
İndi ABŞ gələn ilə keçməmiş və ya da ki, gələn ilin ilk rübündə sülhün imzalnmasına nail olmağa çalışacaq. Bunun isə bir yolu var - Ermənistana təzyiq, Azərbaycana isə etimada və ədalətə əsaslanan münasibət göstərmək".
Məhəmmədli QƏRİBLİ
