İbrahim Rüstəmli: "Rusiyanın kürəyinə vurulan bir bıçaqdır"
Fransanın yeddi təlim mərkəzində Rusiyaya qarşı müharibədə iştirak etmək üçün Ermənistandan olan əsgərlər hazırlanır. Bu barədə rusiyalı jurnalist Anastasiya Kaşevarova sosial şəbəkədə yazıb:
"Təkcə Fontevrault Labedəki təlim mərkəzi erməni əsgərlərinin hazırlanması üçün istifadə edilmir, onların sayı 7-dir. Bu təlim mərkəzlərindən təsdiq üçün bizə foto və video göndəriblər".
Fransanın belə bir addım ata bilməsi mümkündürmü və bunun nə kimi perspektivi ola bilər?
Hərbi-siyasi şərhçi, ehtiyatda olan polkovnik-leytenant İbrahim Rüstəmli "Bakı-Xəbər"ə açıqlamasında bildirdi ki, Fransa dövlətinin öz ərazisində erməni əsgərlərinə hərbi təlim keçməsi ilə bağlı faktlar artıq Rusiyanın xüsusi xidmət orqanları tərəfindən təsdiqlənib: "Bu faktların arxasında çox ciddi məqamlar dayanır. Bildiyiniz kimi, Fransa Rusiya sülhməramlılarını sıxışdırmaq, Rusiya sülhməramlılarının hazırkı missiyasını Cənubi Qafqazda yerinə yetirmək məqsədilə özünün 500 nəfərlik heyətini buraya gətirmək istəyirdi. 500 nəfərlik heyət də sıradan heyət deyildi, kəşfiyyatçılar, xüsusi xidmət orqanlarının əməkdaşları idi. Məqsəd bundan ibarət idi. Sonrasında isə Azərbaycan dövlətinin, Rusiyanın, İranın bu məsələyə elə sərt reaksiya verməsi onların yolunu bağladı. Bu gün artıq aydındır ki, Ermənistan Rusiya ilə bağlı bütün ümidlərini itirib. Ermənistan Kollektiv Təhlükəsizlik Müqaviləsi Təşkilatının iclaslarında iştirak etməkdən də boyun qaçırır. Rusiya birmənalı şəkildə Ermənistan üçün əhəmiyyətini itirmiş kimi görünür. Bunun da arxasında Soros Fondu dayanır. Bu fondun hakimiyyətə gətirdiyi Paşinyan höküməti Rusiya ilə münasibəti heç vaxt optimal şəraitdə qura bilməz. Əsasən Rusiya ilə münasibətlərin pozulmasının fonunda Qarabağ məsələsi durur. Qarabağ məsələsində rusların Ermənistana dəstək verməməsi onları çox pis vəziyyətə qoydu. Ancaq bilməlidirlər ki, bu torpaqlar Azərbaycanın tarixi torpaqlarıdır. Hətta Ermənistanın müharibənin ilk günündə Kollektiv Müqavilə Təşkilatına müdafiə məqsədilə müraciətini də nəzərə alsaq, Putinin də münasibətini xüsusi qeyd etsək, deyə bilərik ki, Rusiya Azərbaycanın beynəlxalq hüquq tərəfindən qorunan mövqeyini təqdir etmişdi. Putin Qarabağı Azərbaycan ərazisi kimi dəyərləndirmiş və xüsusi vurğulamışdı ki, əgər hərbi əməliyyatlar Ermənistan ərazisindən keçərsə, Kollektiv Təhlükəsizlik Müqaviləsi təşkilatı da bu məsələyə münasibət bildirə bilər. Ancaq göründüyü kimi, Ermənistanın Qarabağla bağlı ümidləri puça çıxdı. Xüsusilə vurğulayıram ki, Cənubi Qafqazda nə gürcülərin, nə ermənilərin halına yanan var. Hər bir dövlət yalnız öz maraqlarını düşünür. Fransa öz ərazisində Rusiyaya qarşı ermənilərdən ibarət döyüşçülər hazırlayır. Məndə olan məlumat ondan ibarətdir ki, bu təlim mərkəzlərində təkcə könüllü deyil, məcburi ermənilərin də olduğu öz təsdiqini tapib. Təsəvvür edin ki, ölkə öz ərazisində Rusiyaya qarşı bir növ döyüşən qüvvələr yetişdirir, eyni zamanda da sülhü dəstəkləmək üçün öz hərbi missiyasını Cənubi Qafqaza göndərmək istəyir. Fransanın Ermənistanda yerləşməsi də Rusiyaya qarşı bir cəbhə anlamına gəlir. Ermənistanla bağlı heç vaxt güzəştə getməyəcək. Fransanın öz ərazilərində Rusiyaya qarşı döyüş hazırlığı keçməsi, döyüşçülərin xüsusi silahlarla silahlandırılması Rusiyanın kürəyinə vurulan bir bıçaqdır. Bunun da cavabı özünü çox göstərməyəcək. Bu, Soros Fondunun bir ümumi layihəsidir. Cənubi Qafqazdan Rusiyanın sıxışdırılıb çıxarılması, onun yerinə Fransa, Amerika və digər dövlətlərin gəlməsi, yerləşdirilməsi Rusiyaya qarşı əsas mübarizə vasitəsi kimi qiymətləndirilir".
Məhəmmədəli QƏRİBLİ
