Ramil Məmmədli: "Allahdan, Ermənistanın hansısa açıq dənizə çıxışı yoxdur"
Keçirdiyimiz görüş ölkələrimiz arasında olan strateji səviyyəli dialoqun bariz nümunəsidir. Bunu müdafiə naziri general-polkovnik Zakir Həsənov Bakıda Türkiyənin milli müdafiə naziri Yaşar Gülər və Gürcüstanın müdafiə naziri Cuanşer Burçuladze ilə üçtərəfli görüşdən sonra keçirilən mətbaut konfransında deyib.
Nazir bildirib ki, regiondan kənar ölkələrin bölgədə vəziyyəti gərginləşdirməyə yönəlmiş cəhdləri qəbuledilməzdir: "Müzakirələr zamanı bölgədə sülhün, sabitliyin, təhlükəsizliyin və birgə əməkdaşlığın əhəmiyyəti vurğulanıb. Xüsusilə bölgədəki terrorizm və separatizm fəaliyyətlərinin davam etdirilməsi regionda sülh və sabitliyin bərqərar olmasına, iqtisadiyyatın inkişafına, eləcə də, beynəlxalq layihələrin təhlükəsizliyinə birbaşa təhdiddir. Regiondan kənar ölkələrin bölgədəki vəziyyəti gərginləşdirməyə yönəlmiş cəhdlərinin qəbuledilməz olduğunu söylədik".
Müzakirələrdə regiondan kənar ölkələrin bölgədə vəziyyəti gərginləşdirməyə yönəlmiş cəhdlərinin qəbuledilməz olmasına önəm verilməsi xüsusi əhəmiyyət kəsb edir. Bu gün bölgədən kənar hansı dövlətlərin regionda vəziyyəti gərginləşdirmək istədikləri bəllidir. Bunlar Fransa, Almaniya və ABŞ-dır. O baxımdan hesab etmək olarmı ki, bu üç ölkənin bölgəmizdəki pozucu siyasətinə qarşı Azərbaycan-Gürcüstan-Türkiyənin birgə əməkdaşlığının əsası qoyuldu?
"3 ölkənin hərbi-siyasi sahədə əməkdaşlığı genişləndirməsi kənar dövlətlərin bölgəyə müdaxilə imkanlarını məhdudlaşdırır"
Məsələ ilə bağlı "Bakı-Xəbər"ə açıqlama verən hərbi ekspert Ramil Məmmədlinin fikrincə, prinsipcə, hesab etmək olar: "Əvvəla, Azərbaycanın təşəbbüskarı olduğu üçtərəfli əməkdaşlıq formatlarından birincisi Azərbaycan-Gürcüstan-Türkiyə əməkdaşlığıdır. Bu üçlük Cənubi Qafqazdan əlavə Xəzər-Qara-Aralıq dənizi hövzələrini birləşdirən strateji regionu da əhatə edir. Bu üçbucağın formalaşmasının əsasında tarixi və mədəni əlaqələr, coğrafi qonşuluq, vahid tranzit dəhlizinin tərkib hissələri olmaq, birgə iqtisadi əməkdaşlıq üçün əlverişli şərait və siyasi iradə dayanır. Hər üç ölkə bir-biri ilə strateji tərəfdaşdır. Belə ki, Azərbaycan həm Türkiyə, həm Gürcüstanla, eləcə də Türkiyə ilə Gürcüstan öz aralarında strateji tərəfdaşdırlar. Hələ 1997-ci il fevralın 18- də "Azərbaycan Respublikası ilə Gürcüstan arasında strateji əməkdaşlığın daha da dərinləşdirilməsi haqqında Bəyannamə", 1997-ci ilin mayın 5-də isə "Azərbaycan Respublikası ilə Türkiyə Respublikası arasında strateji əməkdaşlığın dərinləşdirilməsi haqqında Bəyannamə" imzalanıb. 2021-ci ilin iyununda isə Azərbaycanla Türkiyə arasında strateji müttəfiqliyə dair "Şuşa bəyannaməsi" imzalanıb. Üç ölkə illlərdir birgə təlimlər keçirir. Bu ölkələrdən keçən enerji kəmərlərinin, nəqliyyat-kommunikasiya xətlərinin mühafizəsində birgə işlər görülür, informasiya mübadiləsi həyata keçirilir. Azərbaycan-Gürcüstan-Türkiyənin hərbi-siyasi sahədə əməkdaşlığı genişləndirməsi, regiondan kənar dövlətlərin bölgəyə müdaxilə imkanlarını məhdudlaşdırır. Həqiqətən də Fransa regiona soxulmaq üçün xüsusi canfəşanlıq edir. Söhbət əsasın Fransanın Ermənistana hərbi müstəvidə göstərdiyi dəstəkdən gedir. Faktiki olaraq Ermənistanı silahlandırır. Allahdan, Ermənistanın hansısa açıq dənizə çıxışı yoxdur. O zaman daha ciddi problemlər yarana bilərdi. Bu üç ölkədən başqa Ermənistanın həmsərhəd olduğu ölkə İrandır. Fransanın İran vasitəsilə Ermənistanı silahlandırması real görünmür. Ona görə ki, İran Qərbin regionda hərbi baxımdan mövcudluğunda maraqlı deyil. O baxımdan hesab edirəm ki, bu əməkdaşlıq çərçivəsində məlum ölkələrin pozucu siyasətini önləmək mümkündür".
Vidadi ORDAHALLI
