Elşad Həsənov: "Amerika kimi ölkə, Avropa ölkələri qeyri hökumət təşkilatlarına pulu səbəbsiz vermir"
ABŞ qeyri-hökumət təşkilatlarından (QHT) təsir alətləri kimi istifadə edir və postsovet məkanında, xüsusən də Mərkəzi Asiyada fəal şəkildə onlardan yararlanmağa çalışır.
Bu sözləri Rusiya xarici işlər naziri Sergey Lavrov "Primakov qiraətləri" forumunda deyib.
Nazir ABŞ-ın irəli sürdüyü QHT ideyasını "amerikalıların qloballaşma modelinin bir hissəsi kimi bütün dünyada təbliğ etdikləri fəlsəfənin bir hissəsi" adlandırıb:
"Nəticədə Vaşinqton minlərlə qeyri-hökumət təşkilatı yaratdı, yüzlərləsi postsovet məkanında, xüsusən Ermənistanda, Qırğızıstanda fəaliyyət göstərir".
Son proseslər və həbslər göstərir ki, bu şəbəkə Azərbaycanda da geniş fəaliyyət göstərir. O halda niyə Lavrov bizim adımızı çəkmir? Niyə xüsusi vurğunu Ermənistan və Qırğızıstana edir?
Siyasi şərhçi Elşad Həsənov "Bakı-Xəbər"ə açıqlamasında bildirdi ki, ABŞ qeyri hökümət təşkilatlarından öz məqsədləri üçün istifadə edir və bu təbiidir: "Amerika kimi ölkə, Avropa ölkələri qeyri hökumət təşkilatlarına pulu səbəbsiz vermirlər. Onların hər hansı bir sahəyə maraqları, diqqəti var və o sahəyədə kapital qoyurlar. Nəticə də əldə olunur. Bu qədimdən, SSRİ zamanından belədir. Bütün ölkələrdə də bu işlər aparılır. Onlar Lavrovun Ermənistanda, Qırğızıstanda daha fəal olduğunu qeyd etməklə deyə bilməzlər ki, digər ölkələrdə yoxdur. Hər birində var. Bizdə də qeyri hökümət təşkilatlarının fəaliyyəti göz qabağındadır, qrant ayırdıqları adamlardan istifadə edirlər. Bu sahəyə də baxan bizim dövlət təhlükəsizlik xidmətinin əməkdaşlarıdır ki, onlar belə hadisələr olarsa, onun qarşısını alırlar. Son günlər Amerika Senatında Azərbaycana qarşı ABŞ dövlət katibinin köməkçisinin çıxışı, Azərbaycana qarşı qəbul olunan qeyri-qanuni bəyanatlar yolverilməzdir, qəbul olunan deyil. Bu da Azərbaycanla münasibətləri daha da gərginləşdirir. Biz anlamaq istəyirik ki, Amerika hər zaman özünü sülhün carçısı kimi göstərdiyi halda, indi ərazilərimizin süverenliyini bərpa edəndən sonra bizə hücumlara başlamasının səbəbi nədir? Bunları aydınlaşdırmaq lazımdır. Təbii ki, bizim diplomatik korpus bu sahədə araşdırmalar aparır. Amma görünən odur ki, bu yetərli deyil. Biz öz sözümüzü deməliyik. Amerikanın müəyyən siyasi qüvvələrinin, o cümlədən erməni lobbisinin təsirində olan həmin Senatın əməkdaşları Azərbaycana yönəlik səhv addımlar atırlar və biz də bunu göstərməliyik. Bizim münasibətlərdə gərginlik yarandığına görə də, bu gün ABŞ dövlət katibi Azərbaycan Prezidentinə zəng edib, Ermənistanla sülh müqaviləsi barədə müəyyən məsələlərdə ikitərəfli görüşlər keçirilməsini alqışlayıb və eyni zamanda böyük dəhlizin açılmasını dəstəkləyib. Biz də eynilə belə demişdik, amma onlar razı olmadılar. Biz İranla yolları açandan sonra əl - ayağa düşdülər ki, həmin yol açılsın. 2020 - ci il noyabr ayının 10-da qeyd olunan 9 - cu maddə irəli sürülür burda da. Həmçinin Azərbaycan Prezidenti dövlət katibi ilə danışanda, noyabr ayının 15 - də Azərbaycana qarşı qeyri - səmimi bəyanatlar verilməsinin yolverilməz olduğunu bildirib. O isə əvəzində bildirib ki, vəziyyəti normallaşdırmaq üçün yüksək rəsmilərin Azərbaycana gəlməsinə icazə verilsin. Həmçinin Azərbaycanın dövlət nümayəndələrinin də Amerikaya səfərinin vəziyyəti daha da normallaşdıracağını bildiriblər. Yəni bir neçə gündə qeyri-hökümət təşkilatlarının Azərbaycanda qanunsuz hərəkətləri üzə çıxdı, həbslər oldu. Ancaq bizim Amerikaya, Avropaya düşmən deməyimiz doğru deyil. Hətta mətbuatda Amerikada oxuyanların hamısının casus şəbəkəsinin üzvü olduqları bildirildi. Bu da çox sərt ittihamdır. Azərbaycan dövlətini, xalqını istəyən oğlanlarımızı göndərmişik ki, Amerikada təhsil alıb, Azərbaycanda müxtəlif sahələrdə uğurla çalışırlar, Azərbaycan iqtisadiyyatını irəli aparırlar. Bunların hamısına Amerikada oxuyanlar casusdur deyə damğa vurmaq çox ciddi səhvdir, qəbuledilməzdir və Azərbaycan cəmiyyətini içəridən parçalamaq deməkdir. Bizim bu gün irəlidə gedən nüfuz sahiblərimizin, rəsmilərimizin əksəriyyəti xaricdə təhsil alıb. Demək, onlar casusdurlar? Xeyr, əsla. Hörmətli jurnalistlər, belə ifadələrdən qaçmaq lazımdır. Adi bir narazılıq var, o da həll olub artıq. Bu gün dövlət katibi və Prezident vəziyyəti normallaşdırdı. Amerikanın apardığı ikili standartlar var. Mən istəməzdim ki, biz Amerika ilə düşmən olaq. Xeyr, bizim hər birilə əlaqələrimiz var. Amerika bizi bir çox şeydə dəstəkləyib. Düşünürəm ki, Amerikanın siyasiləri buraxdıqları səhvlərə baxıb, öz düzəlişlərini edəcəklər. Ona görə də, hegemon dövlətləri özünə düşmən elan etmək düzgün deyil. Rusiyanın yanında olanlar da bilməlidirlər ki, biz heç kimin yanında deyilik. Biz doğrunun, Azərbaycan dövlətinin maraqlarının yanındayıq. Biz qəhrəman ordumuz ilə torpaqlarımızı azad etdik. Bu gün ermənilərlə, Amerika, Avropa ilə heç bir problemimiz yoxdur. Onların da bizim daxili işlərimizə qarışmasına imkan verməyəcəyik. Müstəqil ölkə, müstəqil dövlət olaraq müstəqil siyasətimizə davam edəcəyik".
Məhəmmədəli QƏRİBLİ
