Avropanın fakt toplama missiyası gizli bir məqsəd üçün İrəvana gəldi...
Akif Nağı: "Birgə missiyanın da səfərinin məqsədi kəşfiyyat xarakterli ola bilər"
Avropa Xarici Fəaliyyət Xidməti və Avropa Komissiyasının (EEAS) birgə faktaraşdırıcı missiyası Ermənistandadır. Bu barədə Ermənistan xarici işlər nazirinin müavini Paruyr Hovhannisyan özünün X mikrobloqunda yazıb.
"Mən Avropa Xarici Fəaliyyət Xidmətinin və Avropa Komissiyasının Ermənistan və Avropa İttifaqı arasında əlaqələrin möhkəmləndirilməsinə yönəlmiş birgə faktaraşdırıcı missiyasını alqışlamaqdan məmnunam. Biz tərəfdaşlığın bir sıra sahələri üzrə məhsuldar və diqqət mərkəzində olan müzakirələri gözləyirik"-deyə Hovhannisyan yazıb.
Faktaradırıcı birgə missiyanın Ermənistana gəlməsi sosial şəbəkələrin erməni siqmentlərində başqa şəkildə təqdim edilib. Belə ki, yazılanlara görə, Avropa Komissiyası ilə Avropa Xarici Fəaliyyət Xidmətinin birgə faktaraşdırıcı missiyasının əsas məqsədi başqadır. Sosial şəbəkələrin erməni siqmentlərində birgə missiyanın əslində kəşfiyyata gəldiyi deyilir. Paşinyan Rusiyadan, KTMT - dən, başqa strukturlardan qəti şəkildə çıxmaq addımları atacağı təqdirdə Rusiyanın orada nələr edə biləcəyini yerində araşdırırlar. Əslində onların belə bir məqsədlə gəldiyi fikri qeyd edilir.
"Faktaraşdırıcı missiya da burada vəziyyəti öyrənir, müqavimət ehtimallarını araşdırır və onun aradan qaldırılması, neytrallaşdırılması üçün tədbirlər düşünürlər"
Məsələyə şərh verən Azad Vətən Partiyasının sədri Akif Nağı "Bakı-Xəbər"ə bildirdi ki, fakttoplama, araşdırma missiyasının Ermənistana gəlməsi, orada müəyyən işlərlə məşğul olması diqqət mərkəzindədir. "Ermənistan rəsmilərinin açıqlaması ilə faktaraşdırıcı missiyanın İrəvana səfər etməsinin mahiyyəti eyni deyil. Yəni deyilənlər birdir, səfərin mahiyyəti isə fərqlidir. Burada Ermənistanla əlaqələrin möhkəmləndirilməsi cəhdləri var. Ermənistan mətbuatı və rəsmiləri məsələni o şəkildə şərh edirlər ki, guya bu missiyanın məqsədi Ermənistanla münasibətləri daha da sıxlaşdırmağa, əməkdaşlığı genişləndirməyə xidmət edir. Bu da var, amma eyni zamanda deyilməyən, qapalı, məxfi məqamlar da olmamış deyil. Proseslər də ona doğru gedir ki, Qərb birmənalı şəkildə Ermənistana yerləşmək, Ermənistanı təsir dairəsinə salmaq və Rusiyanı regiondan çıxarmaq istəyirlər. Bu gün Qərbin apardığı siyasət ondan ibarətdir. Bunun kökündə Rusiyanın mümkün müqavimət ehtimalları var"-deyə A.Nağı qeyd etdi.
Partiya sədri vurğuladı ki, Ermənistanda Rusiyanın hərbi bazası var, İranla, Türkiyə ilə sərhədləri Rusiyanın sərhhəd qoşunları qoruyur, iqtisadiyyatın böyük bir hissəsi Rusiyanın nəzarətindədir: "Ona görə də Rusiyanı regiondan çıxarmaq Qərb üçün elə də asan deyil, müəyyən fəsadlar baş verə, Rusiya müqavimət göstərə bilər. Bilirsiz ki, xeyli müddətdir, Amerikanın Ermənistandakı səfirliyində 1500-2000 minlik kontingent saxlanılır və onlar təbii ki, diplomatlar deyil, xüsusi xidmət orqanlarının əməkdaşlarıdır, onlar da orada hazırdır. Bu birgə missiyanın da səfərinin məqsədi kəşfiyyat xarakterli ola bilər. Faktaraşırıcı missiya da burada vəziyyəti öyrənir, müqavimət ehtimallarını araşdırır və onun aradan qaldırılması, neytrallaşdırılması üçün tədbirlər düşünürlər. Belə görünür ki, Qərb artıq qərarını verib və birmənalı şəkildə Rusiyanı regiondan çıxartmağa doğru addım atır. Bunun əlamətləri Ermənistanın da hərəkətlərində özünü göstərir. Düzdür, Paşinyan arada Rusiyaya da reveranslar edir, Rusiya-Ermənistan dostluğunun "əbədi olduğuna" guya işarələr vurur. Əslində isə siyasət artıq gedir. Qərb Ermənistanı başa sala bilib ki, Qarabağ xülyasından əl çəkmək lazımdır, ora Azərbaycan torpağıdır, orada Azərbaycan hakimiyyəti tam şəkildə bərqərar olur və olmalıdır. Bunu Ermənistan da, rəhbərliyi də qəbul etməlidir, başa düşməlidir. Ermənistanı başa salmağa çalışırlar ki, onların Qarabağa hücumları, işğal cəhdləri Rusiya tərəfindən şirnikləndirilirdi, Rusiyanın məqsədi isə bu cür münaqişələr vasitəsilə regionda mövqeyini saxlamaq idi. Bunları artıq Ermənistan rəhbərliyi başa düşür və Qərbə tərəf üz tutub. Doğrudan da Qərblə münasibətləri nə qədər uğurlu olacaq, Ermənistan üçün istənilən nəticələrə səbəb olacaq ya yox, bunu gələcək göstərəcək. Amma proses gedir, Ermənistana gələn bu missiya da həmin prosesə, bu prosesin qarşsının alınmaz olmasına xidmət edir".
A.Nağı əlavə etdi ki, Azərbaycan prosesləri diqqətlə izləməlidir, izləyir də, ölkəmiz məsələlərlə bağlı öz maraqlarına uyğun mövqe tutmalıdır. A.Nağı hesab edir ki, hələlik bu proseslərdən Azərbaycan üçün elə bir təhlükəli məqam yoxdur. Onun fikrincə, Ermənistan Qərbyönümlü siyasət yürüdürsə, Qərbin himayəsinə sığınırsa, Azərbaycan da buna uyğun mövqe tutur, son 20 ildə balanslaşdırılmış siyasət yeridir, bu siyasət uğurla həyata keçirilir, həm Rusiya, həm də Qərblə məsafə saxlayır, eyni zamanda özünün hədəflərinə doğru gedir. "Hədəflər də Azərbayanın bütün ərazilərində suveren hüquqlarının bərqərar olması və möhkəmləndirilməsidir. Bu istiqamətdə Azərbaycan yaranmış vəziyyətdən istifadə etməyi bacarmalıdır və inanıram ki, bacaracaq da"-deyə partiya sədri vurğuladı.
İradə SARIYEVA
