Qabil Hüseynli: "Bu prosesdə ABŞ-ın rolunu da mütləq qiymətləndirmək lazımdır"
Ermənistanla Səudiyyə Ərəbistanı arasında diplomatik əlaqələr qurulub. Bu barədə Ermənistan Xarici İşlər Nazirliyi məlumat yayıb:
"Bu barədə protokolu ötən gün Əbu-Dabidə Ermənistanın BƏƏ-dəki səfiri Karen Qriqoryan və Səudiyyə Ərəbistanının səfiri Sultan bin Abdulla Əl-Anqar imzalayıb".
Qeyd edək ki, Səudiyyə Ərəbistanı Azərbaycan torpaqlarını işğal etdiyinə görə Ermənistanla diplomatik əlaqələrdən imtina etmişdi.
Hazırda Ermənistanla Azərbaycan arasında sülh sazişi imzalanmayıbsa, Səudiyyə Ərəbistanının Ermənistana yönəlik belə tələsik davranışı nə ilə bağlıdır? Səudiyyə Ərəbistanını buna Azərbaycana təzyiq göstərmək üçün ABŞ məcbur edə bilərmi?
Politoloq Qabil Hüseynli "Bakı-Xəbər"ə açıqlamasında bildirdi ki, ABŞ-ın bu məsələdə təlqinedici rolu olub: "Bunu inkar etmək olmaz. Amma Səudiyyə Ərəbistanının özü də Ermənistanla əlaqalər qurmağa can atırdı. Bunun üçün dünyadakı erməni lobbisi Səudiyyə Ərəbistanına ciddi təsir gösrirdi. Ər-Riyadın bu addımından sonra digər ərəb ölkələri də bu yarışa qoşulacaqlar. Burada qorxulu bir şey görmürəm. Sülh müqaviləsinin imzalanması uzansa da, hamı görür ki, bölgədə yeni müharibənin başlaması ehtimalı çox zəifdir. Proses sülhə doğru gedir. Bir daha qeyd edim ki, bu prosesdə ABŞ-ın rolunu da mütləq qiymətləndirmək lazımdır".
Səudiyyə Ərəbistanı Ermənistanla diplomatik münasibətlərin qurulması ilə bağlı dost və qardaş ölkə olaraq bu barədə öncədən Azərbaycana məlumat verib. Bu barədə diplomatik mənbəyə istinadən məlumat yayıb. Həmin məlumata görə, Azərbaycan Səudiyyə Ərabistanına 30 il ərzində İslam dünyası üçün nümunəvi və ədalətli mövgeyinə görə təşəkkür edib.
Belə ki, uzun illər Səudiyyə Ərəbistanı Ermənistanla diplomatik əlaqələr qurmayıb və Ermənistanı işğalçı dövlət kimi tanıyıb. İndi isə reallıqlar dəyişib. Azərbaycan Ermənistanın işğalına son qoydu. Hələ 2020-ci ildə Livan vasitəsilə Ermənistan Səudiyyə Ərəbistanına yaxınlaşaraq diplomatik əlaqələr qurmaq istəyib. Amma o zaman qanunsuz erməni hərbi birləşmələri Qarabağda qalmaqda davam edirdi. Səudiyyə Ərəbistanı əlavə 3 il də gözlədi. Nəzərə almaq lazımdır ki, ABŞ və Fransa bu məqsədlə Səudiyyə Ərəbistanına müraciət ediblər. İstənilən halda bu, Səudiyyə Ərəbistanı ilə bizim münasibətlərimizə mənfi mənada təsir etməyəcək. Çünki ölkələrimiz arasında dərin köklərə bağlı münasibətlər mövcuddur.
Nikol Paşinyan bildirib ki, son illər Ermənistanın xarici işlər naziri Səudiyyə Ərəbistanının rəsmiləri ilə iki dəfə görüşüb, telefon danışığı aparıb: "Çoxsaylı işgüzar müzakirə olub".
Baş nazir bildirib ki, münasibətlərdə irəliləyiş var: "Yaxın zamanda Ermənistanla Səudiyyə Ərəbistanı arasında rəsmi diplomatik əlaqələrin inkişaf edəcəyinə ümid edirəm. Bu çox vacib hadisə olacaq".
Nikol Paşinyan qeyd edib ki, sentyabradək Əl-Riyada mövsümi təyyarə reysləri reallaşıb: "Gələn il bunun davamlı olacağına ümidvaram".
Məhəmmədəli QƏRİBLİ
