Məhərrəm Zülfüqarlı: "Çünki həmin beynəlxalq təşkilatlar Birləşmiş Ştatlar və onun müttəfiqlərinin təsiri altındadır"
7 oktyabrda Qəzzada məlum hadisələr başlayandan sonra 66 jurnalist həyatını itirib. Fələstin Jurnalistlər Birliyi İsrailin blokadada olan Qəzza zolağına hücumları zamanı həlak olan jurnalistlərlə bağlı məlumat yayıb.
Açıqlamada İsrailin hücumlarında 6-sı qadın olmaqla 66 jurnalistin öldüyü, 2 jurnalistin itkin düşdüyü, 31 jurnalistin isə İsrail həbsxanalarında saxlanıldığı bildirilib. Birlik beynəlxalq insan haqları təşkilatlarını İsrailin jurnalistlərə qarşı qanun pozuntularını yaxından izləməyə çağırıb.
Diqqəti çəkən məqam odur ki, bir belə media təmsilçisinin öldürülməsinə baxmayaraq, dünyadakı media qurumları, jurnalist təşkilatları susur. Niyə?
"İnsan haqları, jurnalist hüquqları və digər məsələlər Qərb ölkələrinin əlində bir silahdır"
Sözügedən məsələ ilə bağlı fikirlərini "Bakı-Xəbər"lə bölüşən AVCİYA-nın vitse-prezidenti, professor Məhərrəm Zülfüqarlı bunu bir sıra amillərlə əlaqələndirdi: "Birincisi, Yaxın Şərqdə, xüsusən də Fələstin-İsrail, HƏMAS-İsrail münasibətlərində çoxsaylı müəmmalı məsələlər var. Burada müəmmalardan biri odur ki, hətta müəyyən dövrdə hansı qüvvənin hansı qüvvəni müdafiə etməsi, yerdəyişmə prosesləri olur. Ancaq İsraili müdafiə edən qüvvələr artıq əvvəldən məlumdur. Yəni Birləşmiş Ştatlar başda olmaqla, böyük dövlətlər İsraili müdafiə edir. Sözügedən proseslərə beynəlxalq media qurumlarının səssiz qalması təəccüb doğurur. Məsələ ondadır ki, digər münaqişə bölgələrində nəinki 66 jurnalist, adi bir media təmsilçisinə xəsarət yetiriləndə o dəqiqə beynəlxalq təşkilatlar, media institutları sərt reaksiya verirlər. İnsan haqları, jurnalistlərin hüquqlarının müdafiəsini gündəmə gətirirlər. Bir sıra məsələləri bəhanə edərək dünyaya car çəkirlər. İndi isə susmağın səbəbi ondan ibarətdir ki, aparıcı dövlətlərdən çəkinirlər. Çünki həmin beynəlxalq təşkilatlar Birləşmiş Ştatlar və onun müttəfiqlərinin təsiri altındadılar. Yəni böyük dövlətlərin tezis və təlimatlarına uyğun öz işlərini qururlar. Bütün bunlar onu göstərir ki, insan haqları, jurnalist hüquqları və digər məsələlər Qərb ölkələrinin əlində bir silahdır. Yəni lazım olanda ondan bir bəhanə kimi dövlətlərə qarşı istifadə edirlər. Lazım olmayanda isə baş verənlərin üstündən sükutla keçirlər. İndi yaşananlar da bunun əyani göstəricisidir. Baxın, 66 jurnalist öldürülüb, jurnalistlərin hüquqlarının qorunmasından dəm vuran ixtisaslaşmış beynəlxalq jurnalist təşkilatları, digər qurumlar susur. Bütün bunlar bir daha onu göstərir ki, Azərbaycan müasir dövrdə düz yoldadır. Qərbin bizə yönəlik tənqidləri əsasən ikili standartlara söykənir. Hesab edirəm ki, biz zəif olsaq o təzyiqlər daha da güclənər. Ona görə də biz hamımız çalışmalıyıq ki, Azərbaycan dövləti güclü olsun. Ona görə ki, ikili standartlarla yanaşan Qərb ölkələrinin təzyiqlərinə biz daim cavab verə bilək və öz haqqımızı müdafiə edə bilək".
Vidadi ORDAHALLI
