Mübariz Göyüşlü: "ABŞ-dakı erməni diasporu çox yaxşı bilir ki, artıq bu məsələ bitib, hansısa "Arsax" yoxdur, yığılan iaənələr də mənimsənilir"
30 ildən çoxdur ki, Ermənistan dünyadan pul dilənir və yığdığı ianələr hesabına birtəhər özünü ayaqda saxlamaq istəyir. İndiyə qədər erməni diasporu, lobbisi müxtəlif adlar altında ianələr toplayıblar.
"Ermənistanın səsi" yazır ki, dünya ermənilərinin topladığı yüz milyonlarla dollar mənimsənilib. Qeyd edilir ki, noyabrın 23-də keçirilən "Hayastan" Fondunun 26-cı illik telemarafonu xoşagəlməz təəssürat yaradıb (təbii, onlar üçün xoş olmayan təəssürat-İ.S). Qeyd edilir ki, təşkilatçılar bir gün əvvəl tədbirin formatında hansısa dəyişiklikdən danışmışdılar: "Lakin bu, gördüklərimizi nəzərdə tutursa, heç nəyi dəyişməmək daha yaxşı olardı.
Efir müddətində (Paşinyandan əvvəlki 12 saat əvəzinə - 3 saat) darıxdırıcı aparıcılar, "məşhurların", "sürünən xətt"in olmaması ilə ifadə olunan tamamilə minimalist üslub diqqəti çəkdi. Real rejimdə ianələrin Los-Ancelesdən televiziya studiyasına müntəzəm daxil edilməsi (burada telemarafon Ermənistanda yayımın bitməsindən bir saat sonra başlayıb və 6 saat davam edib). Aydındır ki, vacib bir məsələnin belə təşkili ilə görünməmiş miqdarda pul yığımına ümid etmək son dərəcə sadəlövhlük olardı (24 noyabr saat 15:30-a olan məlumata görə, fondun saytında telemarafonun yekun nəticələri hələ də yox idi)...Ən acınacaqlısı isə odur ki, 2020-ci il müharibəsində biabırçı məğlubiyyət nəticəsində bütün dünya erməni icmasının dörddə bir əsrdən artıq müddətdə topladığı yüz milyonlarla ABŞ dolları hədər getdi və bu fəlakətin səbəbkarı hələ də hazırkı baş nazir Paşinyandır. İndi fond "Artsax"dan olan qaçqınlara yardım proqramlarını daraltmağa, həmçinin festivalları maliyyələşdirməyə məcburdur…"
"Ermənistanın səsi"nin yazdığından aydın olur ki, indiyə qədər Qarabağa "yardım" adı altında xaricdən gələn pulları Ermənistan hökuməti mənimsəyib. Qeyd edilir ki, Paşinyan hakimiyyətə gəlməzdən əvvəl, 2017-ci ildə telemarafonda 12,5 milyon dollardan çox vəsait toplanmışdı, bu vəsait günəş enerjisinin inkişafına, dərin quyuların qazılmasına və yeni suvarma şəbəkəsinin tikintisinə xərclənmişdi. 2016-cı ildə 15,4 milyon dollardan çox vəsait toplanıb ki, bu da "Dağlıq Qarabağın" "zərər çəkmiş ərazilərinin bərpasına, onun sakinlərinin təhlükəsizliyinin təmin edilməsinə və çoxuşaqlı ailələr üçün evlərin tikintisinə sərf olunub". "Bu baxımdan 1996-cı il telemarafonunu da xatırlayırıq ki, o zaman amerikalı həmyerlimiz Kirk Krokryan tərəfindən toplanmış, demək olar ki, 5,6 milyon dollar ikiqat artırılmışdı. 2018-ci ilin noyabrında Ermənistanda hakimiyyət dəyişikliyindən sonra 11,1 milyon dollardan çox, 2019-cu ildə isə 10 milyon dollardan çox pul yığılıb. Yığımlarda mənfi dinamika müşahidə olunmağa başlayıb, müharibədən sonra isə milyonlarla ianə (ABŞ dolları ilə) tamamilə yoxa çıxıb. Düzdür, 2020-ci ildə müharibədən sonrakı vəziyyətdə telemarafonda məlum səbəblərə görə, demək olar ki, 23 milyon dollar toplamışdı, lakin növbəti il bu rəqəm 12,35 milyon dollara, sonra 2022-ci ildə 11 milyon dollara düşüb və ən böyük məbləğ 2008-ci ildə toplanıb-31 milyon dollar…"
Onlar bu vəsaitin "Arsax" "qaçqınlarına" "yardım" üçün toplandığını deyirlər.
Qeyd edilir ki, Ermənistan və diaspor arasında artıq problem mövcuddur. Bildirilir ki, bundan əlavə, potensial donorların əhval-ruhiyyəsinə 2020-ci il müharibəsi zamanı Hayastan Fondu tərəfindən toplanan 52 milyard dramdan (107 milyon dollar) çox pulun hökumətə köçürülməsinin qaranlıq hekayəsi də təsir edib, bundan sonra bəzi üzvlərin tənqidi oldu. Fondun Himayəçilər Şurasının maliyyə resurslarından sui-istifadə etdiyinə görə Ermənistanın o zamankı prezidenti, sözügedən şuranın rəhbəri Armen Sarkisyan yoxlama tələb edib. Onu da qeyd edək ki, eyni zamanda müxalifət deputatlarının təşəbbüsü ilə iki ildir fəaliyyət göstərməyən müvəqqəti parlament komissiyası yaradılıb və onun gəldiyi nəticə məlum deyil. "Hayastan" ümumerməni fondunun icraçı direktoru Haykak Arşamyanın Ermənistan İctimai Televiziyasının 1-ci kanalına müsahibəsində bildirdiyinə görə, fonda qarşı nüfuzdansalma kampaniyası aparılır. "Hazırkı telemarafon zamanı lakonik müsahibəsində Haykak Arşamyan təbəssümlə bu mövzunun uzun müddət müzakirə mövzusu olacağını bildirib və Ermənistanın Hesablama Palatası 8 ay ərzində bu məsələni araşdırdıqdan sonra bu qənaətə gəldiyini bildirib. Bu vəsaitlər nizamnamə fonduna uyğun olaraq məqsədyönlü şəkildə istifadə olunduğuna görə indi onlar fondun balansından bütövlükdə silinə bilər. Buna kim şübhə edər ki..."-deyə erməni nəşri yazır.
"Onların pulyığma marafonu daha özünü doğrulda bilməz"
Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə şərhində bildirdi ki, uzun illərdir Ermənistan hökuməti xarici diaspor təşkilatlarının topladığı ianələri mənimsəyir. "Bu gün ABŞ-da ermənilərin pulyığma marafonunun iflasa uğraması təsadüfi deyil və artıq pul ödəyənlər o pulun mənimsənildiyini bilirlər. Ermənilərin Qarabağla bağlı həyata keçirmək istədiyi bütün planlar iflasa uğrayıb, iflasa uğrmaqda da davam edir. O cümlədən də onların pulyığma marafonu daha özünü doğrulda bilməz. Əvvəllər qondarma "Arsax"a "yardım", "infrastrukturun qurulması", "təmir-tikinti" adı ilə pul yığırdılar. Üstəlik də, bu prosesdə xeyli pul mənimsəyirdilər. Artıq "Arsax" da, başqa şeylər də tarixin zibilliyinə gedib, Azərbaycan problemi həll edib, ərazi bütövlüyünü təmin edib. Erməni mediasının yaydığı statistikaya baxdıqda görürük ki, nə qədər böyük pullar yığılıb, ən böyük ianə isə 2008-ci ildə yayılıb. 44 günlük müharibə zamanı da böyük vəsait toplanıbmış və sonradan görüblər ki, vəsait ünvanına çatmır, bu səbəbdən indi xaricdəki ermənilər ianə marafonuna elə də can yandırmır. ABŞ-dakı erməni diasporu çox yaxşı bilir ki, artıq bu məsələ bitib, hansısa "Arsax" yoxdur, yığılan iaənələr də mənimsənilir, ona görə də geri çəkilir. Azərbaycan bu problemi artıq həll edib və Hayastan Fondunun da əvvəlki donorları daha ona dəstək vermirlər. Paşinyanın ziddiyyətli mövqeyi də fondun gələcəyini şübhə altına alır. Onlar Paşinyının fəaliyyətindən narazılıq edir"-deyə M.Göyüşlü qeyd etdi.
O bildirdi ki, Hayastan indi də ianəni Qarabağdan könüllü köçən və hazırda Ermənistanda məskunlaşan ermənilər üçün yığır, guya onlar "qaçqın" düşüblər. Bu mövzu artıq bitib və Ermənistan cəmiyyətinin bu mövzu ilə artıq manipulyasiya edilməsinə ehtiyac olmadığını deyən M.Göyüşlü "hesab edirəm ki, Hayastan fondunun xarici donorları artıq reallığı dərk edirlər, bilirlər ki, məsələ həll olunub, ianələri Paşinyan hökumətinə qismət olacaq. Onlar artıq ianə etməkdən imtina edəcəklər"-deyə vurğuladı.
İradə SARIYEVA
