Rauf Zeyni: "Konkret sahələr üzrə informasiyaların başqa məqsədlə toplandığı aşkara çıxır"
Barələrində həbs qətimkan tədbiri seçilmiş "Abzas Media" xəbər portalının rəhbəri Ülvi Həsənov, baş redaktor Sevinc Abbasova və layihə koordinatoru Məhəmməd Kekalov barəsində yeni məlumatlar üzə çıxıb.
Qeyd olunan şəxslər təxribatlar törətmək və digər qanunsuz niyyətlərini reallaşdırmaq üçün "demokratik inkişafa dəstək vermək" adı altında xeyli sayda donor təşkilatları ilə yaxın əlaqələr quraraq gizli əməkdaşlıq ediblər. Həmin təşkilatların adlarını sadalamaqla oxuculara həyata keçirilən mütəşəkkil işin səviyyəsini nümayiş etdirmək istərdik. Bunlar ABŞ-ın "Beynəlxalq İnkişaf Agentliyi" (USAID), "Milli Demokratiya Fondu" (NED), "Avropa Demokratiyaya Yardım Fondu" (EED), "Internews", "FreedomNow", "Qlobal Araşdırmaçı Jurnalistika Şəbəkəsi" (Global Investigative Journalism Network), "Amerika Beynəlxalq Təhsil Şurası" (American Councils for International Education), Çexiyanın "Praqa Vətəndaş Cəmiyyəti Mərkəzi" (PCSC), "People in Need" (PİN), "Avropa İttifaqı Müstəqil Media üçün" proqramı (EU4 İndependent Media), "Şərq Tərəfdaşlığı Vətəndaş Cəmiyyəti Forumu" (EPCSF), "Niderland Helsinki Komitəsi", "Norveç Helsinki Komitəsi", "Avropa Jurnalistika Fondu" (Journalizmfund Europe), "Yeni Demokratiya Fondu" (New Democracy Fund), "Forum 2000", "German Marşal" Fondu və digərləridir. Görün, Qafqazın bir ölkəsində "demokratiya carçısı" rolunda çıxış etmək üçün nə qədər qurum növbəyə dayanıb və bundan da Ülvi Həsənov və komandası maksimum dərəcədə istifadə etməyə cəhd göstərib.
Həmin pulların müqabilində isə hazırlanan layihələrin adı onların məzmununu və niyyətini açıq şəkildə nümayiş etdirir. Bunlar: "Azərbaycan Respublikasının qoşulduğu Beynəlxalq Konvensiyalara əməl etməsinin monitorinqi", "Məhkəmə orqanları tərəfindən qəbul edilmiş qərarların araşdırılması", "Araşdırılmamış 100 cinayət", "Turizm və kənd təsərrüfatı sahələrində korrupsiyanın araşdırılması", "Media haqqında qanunla bağlı vəkillik fəaliyyətinə dəstək", "Media portalının müasir texniki vasitələrlə təchiz edilməsi" və sair oxşar başlıqlı mövzular olub.
Beynəlxalq təşkilatların bu yöndə mövzuları araşdərmaqda hansı maraqları ola bilər?
Milli Qeyri Hökumət Forumunun prezidenti Rauf Zeyni "Bakı-Xəbər"ə açıqlamasında bildirdi ki, bu məlumatlarla tanış olduqda adamı dəhşət bürüyür: "Biz dəfələrlə çıxışlarımızda deyirik ki, bəzi təşkilatlar və şəxslər beynalxalq dairələrdən qrantlar alıb belə addımlar atır. Artıq bütün detallar çılpaqlığı ilə ortadadır. Pulun kimdən və hansı məbləğdə alınması da ortadadır. Hüquq-mühafizə orqanları da bu faktlar əsasında addımlar atır. Layihələr birbaşa və dolayısı ilə olur. Birbaşada konkret ad olur və donor şəffaf maliyyə verir. Dolayısı ilə olanda isə çirkli yollarla pulları ölkəyə gətirib, öz adamları arasında bölüşdürürlər. Öyrənilən sahələrdən görünür ki, onların məqsədi başqadır. Biz layihə ilə dərindən tanış olsaq, daha detallı məlumatlar üzə çıxır. 30 il müddətində bir çox belə layihələr məqsədyönlü şəkildə həyata keçirilib. Qaçqınlardan tutmuş, turizm sahəsinə kimi araşdırma aparıblar. Təbiidir ki, burada xoş niyyətdən söhbət gedə bilməz. Sual olunur: şəffaf layihə niyə qaranlıq üsullarla maliyyələşməlidir? Əgər bir ölkənin qanunları buna imkan vermirsə, deməli, buna riayət edilməlidir. Olunmursa, deməli, ortada məkrli niyyət var. Konkret sahələr üzrə informasiyaların başqa məqsədlə toplandığı aşkara çıxır".
Məhəmmədəli QƏRİBLİ
