Abutalıb Səmədov: "Tamamilə mümkündür ki, növbəti toplantılarda bu iki ölkənin SPEKA-ya üzvlük məsələsi təklif olunsun"
Hazırda Azərbaycan SPECA-ya sədrlik edir. İyirmi beş il ərzində ölkələrimiz arasında hərtərəfli əlaqələr uğurla inkişaf edib, ancaq SPECA-ya üzv dövlətlərin Zirvə görüşü ilk dəfə keçirilir.
Prezident İlham Əliyev Zirvə görüşünün keçirilməsi ilə əlaqədar Azərbaycanın təşəbbüsünə dəstək verdikləri üçün Mərkəzi Asiya ölkələrinin rəhbərlərinə təşəkkürünü bildirib: "Bu gün Azərbaycan, Qazaxıstan, Qırğızıstan, Tacikistan, Türkmənistan və Özbəkistan bir sıra çoxtərəfli formatlarda uğurla əməkdaşlıq edir. Mənim dəvətimlə bu gün Zirvə görüşündə Gürcüstanın və Macarıstanın baş nazirləri, Körfəz Əməkdaşlıq Şurasının baş katibi fəxri qonaqlar qismində iştirak edirlər. Əminəm ki, bu tərkibdə keçirilən Zirvə görüşü daha geniş iqtisadi əməkdaşlıq formatına yol açacaq".
Prezidentin SPECA-nın gələcəyi ilə bağlı irəli sürdüyü yeni təşəbbüslər qurumun perspektivinə nələr vəd edir?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, SPECA BMT tərəfindən 1998-ci ildə təsis edilib: "Azərbaycan bu xüsusi proqrama 2002-ci ildə üzv olub. Bəzi səbəblərə görə bu proqram böyük uğur qazana bilməyib. SPECA-nın Bakıda keçirilən toplantısında Azərbaycan Prezidenti proqrama yeni nəfəs vermək təşəbbüsü ilə çıxış edib. Macarıstan və Gürcüstanın da Bakıdakı tədbirə müşahidəçi kimi dəvət olunması gələcəkdə SPECA-nın miqyasının daha da genişlənməsinə hesablanıb. Şərq-Qərb nəqliyyat dəhlizinin Azərbaycandan keçən orta dəhlizinin imkanlarının genişlğnməsi zəruridir. Burada xüsusi rolu Zəngəzur dəhlizi oynaya bilər. Buradan keçib Avropa ilə iqtisadi əlaqələrin qurulması Mərkəzi Asiya ölkələri üçün böyük əhəmiyyətə malikdir. Ermənistanın müstəqil siyasət yürüdə bilməməsi bölgənin inkişaf imkanlarını azaldır. Bu məqamı Prezident xüsusi vurğuladı. Ermənistan kommunikasiyaların açılmasında ciddi maneəyə çevrilib. İlham Əliyev proqramın inkişafı üçün yeni yollar axtarır. Macarıstan türk ölkələri ilə əməkdaşlığa ciddi əhəmiyyət verir. Gürcüstan da Cənubi Qafqaz bölgəsində mühüm tranzit ölkələrdən biridir. Belə bir ölkənin tranzit imkanlarından istifadə SPECA-ya fayda verə bilər. Bu, dəhliz yolu ilə yüklərin dəfələrlə artmasına gətirib çıxara bilər. Azərbaycanın Mərkəzi Asiya ölkələri iqtisadi əməkdaşlığının səviyyəsi çox da böyük deyil. 2023-cü ildə bu sahədə artım müşahidə olunur. 2022-ci ilə müqayisədə bu rəqəm xeyli artıb. Azərbaycanın yeni təşəbbüsləri mühüm əhəmiyyətə malikdir. Tamamilə mümkündür ki, növbəti toplantılarda bu iki ölkənin SPECA-ya üzvlük məsələsi təklif olunsun. Burada Azərbaycanın oynaya biləcəyi rol çox böyükdür".
SPECA Mərkəzi Asiya ölkələrində iqtisadiyyatın davamlı inkişafını və qarşılıqlı əlaqələrin gücləndirilməsini təşviq edən iqtisadi platformadır. Proqramın əhatə etdiyi ölkələrin siyahısına və coğrafi mövqeyinə nəzər salsaq görərik ki, Proqramın üzvü olan Azərbaycan son illərdə bu ölkələrlə əməkdaşlığın daha da inkişafı istiqamətində çoxşaxəli fəaliyyət həyata keçirir. Azərbaycan, həmçinin, Mərkəzi Asiya ölkələrinin Avropa ilə iqtisadi əlaqələrinin inkişafında mühüm rol oynayır. Başqa sözlə, ölkəmizin həm Şərqlə Qərbin, həm də Şimal ilə Cənubun kəsişməsində yerləşməsi ona əlverişli tranzit imkanları yaradır.
Məhəmmədəli QƏRİBLİ
