Samir Adıgözəlli: "Azərbaycan Qarabağdan könüllü gedən ermənilərin mülklərini 17 noyabr qərarından çox əvvəl qorumağa başlayıb"
Ermənilər Qarabağı könüllü tərk etdikdən sonra Ermənistan mediası bir qayda olaraq faktları, gerçəklikləri təhrif etməklə məşğul olur.
Məsələn, 20 sentyabrdan sonra, daha dəqiq desək, sentyabrın sonu, oktyabrın əvvəllərində Xankəndidə mühüm infrastruktur obyektlərinin, eləcə də tarixi, dini və mədəni abidələrin Azərbaycan polisi tərəfindən mühafizəsi həyata keçirildiyi halda, erməni mediası məsələni elə qələmə verir ki, guya Qarabağda ermənilərin mülklərini Azərbaycan ancaq Beynəlxalq Ədalət məhkəməsinin 17 noyabr qərarından sonra qorumağa başlayıb. Guya bundan sonra evlər möhürlənib və sair. Halbuki, ilk gündən Azərbaycanın məqsədi o mülklərin toxunulmazlığını qorumaq olub.
"Ermənilərin hay-küyünün səbəblərindən biri də Xankəndi sakini olan azərbaycanlıların yenidən öz doğma evinə qayıtması niyyətinin qarşısını almaqdır"
İSBAM sədri Samir Adıgözəlli "Bakı-Xəbər"ə şərhində bildirdi ki, erməni mediası Azərbaycanla bağlı növbəti dəfə yanlış rəy formalaşdırmaq istəyir: "Sentyabrda keçirilən antiterror tədbirindən sonra Ermənistan və onun havadarları Azərbaycana qarşı növbəti çirkin kampaniya formalaşdırmaq istəyirlər. Erməni mediası da onların təxribatlarını təbliğ edir. Məqsədləri beynəlxalq aləmdə belə bir fikir formalaşdırmaqdır ki, guya 17 noyabra qədər Azərbaycan ermənilərin mülklərini qorumayıb, bunların mülkləri "təhlükədə" olub. Gələcəkdə Azərbaycandan kompensasiya almaq niyyətindədirlər. İndi hər erməni sakin özündən böyük bir siyahı düzəldib ki, guya Qarabağda hansısa böyük sərvəti qalıb. Onlar bu iddia ilə ona görə çıxış edirlər ki, Azərbaycandan daha böyük pullar alsınlar. Bundan başqa, Avropa İttifaqından və başqa təşkilatlardan daha çox pul qoparmaq üçün mülk hay-küyü salırlar. Qarabağdan gedən ermənilər pul dilənmək üçün hər cür varianta əl atırlar. Ona görə də, "Azərbaycan əvvəllər bizim mülkümüzü qorumayıb" iddiası ilə beynəlxalq rəy formalaşdırmaq istəyirlər. Halbuki, Azərbaycan Qarabağdan könüllü gedən ermənilərin mülklərini 17 noyabr qərarından çox əvvəl qorumağa başlayıb. Ümumiyyətlə, lokal antiterror tədbirləri zamanı mülki obyektlərə heç bir ziyan vurulmayıb. İnsanların təhlükəsizliyi, mülki obyektlərin, infrastrukturun qorunması əsas götürülüb.
Yadınıza gəlirsə, Xankəndidə yanacaqdoldurma məntəqəsində partlayışdan bir neçə gün sonra, oktyabrın 6-da Prezident İlham Əliyev Ümumdünya Səhiyyə Təşkilatının Avropa üzrə regional direktoru Hans Henri Klugeni qəbul edərkən ərazidə mühüm infrastruktur obyektlərinin, eləcə də tarixi, dini və mədəni abidələrin polis tərəfindən mühafizə olunduğunu, elektrik təchizatının həyata keçirildiyini bildirmişdi. Prezident vurğulayırdı ki, bütün bunlar Qarabağın erməni sakinlərinin reinteqrasiyası proqramının hazır olmasının və həyata keçirilməsinin göstəricisidir.
Heç olmasa erməni mediası yazanda Azərbaycan Prezidentinin bəyanatlarına baxsın".
S.Adıgözəlli qeyd etdi ki, Azərbaycan dövləti Qarabağda yaşayan ermənilərin rahatlığı üçün lazım olan dəstəyi göstərdi. Azərbaycanı onların özlərinin tərk etdiyini deyən S.Adıgözəlli qeyd etdi ki, hazırda Qarabağdan gedən ermənilərə "qaçqın" statusu almaq istəyirlər, bu da beynəlxalq qanunlara ziddir.
O vurğuladı ki, Azərbaycan XİN Beynəlxalq Ədalət Məhkəməsinin 17 noyabr 2023-cü il tarixli qərarı ilə bağlı mətbuata verdiyi məlumatda hər şeyi aydın şəkildə qeyd edib. "Bu sənəddə aydın şəkildə bildirilib: "Azərbaycan milli qanunvericiliyə və beynəlxalq öhdəliklərə uyğun olaraq şəxsi mülkiyyəti, mədəniyyət abidələrini, artefaktları, habelə qeydiyyat sənədlərini qoruyur. Beləliklə, Məhkəmənin bu sahələri qeyd etməsi eyni zamanda Azərbaycanın həyata keçirdiyi tədbirlərin təsdiqidir". Yəni məlumdur ki, ölkəmizdə bu sahələr qorunur. Xankəndidə həm ictimai və inzibati binaların, həm erməni vətəndaşların mənzilləri, dini obyektləri, başqa müəsissələri qorunur, özü də bu tədbirlər çox operativ həyata keçirilib. Ermənilərin hay-küyünün səbəblərindən biri də Xankəndi sakini olan azərbaycanlıların yenidən öz doğma evinə qayıtması niyyətinin qarşısını almaqdır. Amma bunu bacara bilməzlər. Xankəndi sakini olan azərbaycanlılar geri qayıtmalıdır. Bu onların hüququdur. Xankəndidə nə qədər azərbaycanlının evini gəlmə ermənilər zəbt edib, mülklərini mənimsəyib, var-dövlətlərini mənimsəyib. Onlar yaxşı bilirlər ki, kimlərin ora gəlmə olduğu və hansı azərbaycanlının evini kimlərin zəbt etdiyi artıq məlumdur. Çünki Azərbaycan separatçılardan qalan sənədlərlə, siyahılarla tanışdır. Bu sənədlərdən məlum olacaq ki, bizim orada nə qədər erməni əsilli vətəndaşımız var. Onlara məxsus mülkiyyət də, əmlak da dövlətimiz tərəfindən qorunur. Şəxsi mülkiyyət toxunulmazdır, Azərbaycan da o mülklərin toxunmazlığını təmin edir. Amma 17 noyabr tarixindən əvvəl bu işə başlanılıb".
Qarabağda mülkü olduğu təsdiqlənən ermənilər ya gəlib burada mülkünə yiyə durmalıdır, ya da alternativ alqı-satqı yolu işini görməlidir. Yoxsa dünyanın harasındansa gəlib Qarabağda yaşayıb azərbaycanlının evini zəbt edib "bu mülk mənimdir" deyənlərə qarşı tədbir görülməlidir.
Leyla QARAXANLI
