Samir Hümbətov: "Son vaxtlar Ermənistan tərəfinin bu məsələdə nisbətən aktivlik göstərməsi onu göstərir ki, onların başqa variantı yoxdur"
Ermənistan-Azərbaycan sərhədində delimitasiya komissiyasının iclası keçiriləcək. Diplomatik mənbələrdən daxil olan məlumata görə, iclas noyabrın 29-u və 30-da baş tutacaq.
Müvafiq razılaşmaları hər iki tərəf təsdiqləyib.
Qeyd edək ki, iki ölkənin delimitasiya məsələlərini vasitəçi olmadan özləri həll etməyə çalışması, şübhəsiz ki, müsbət göstəricidir. Xatırladaq ki, sərhədin delimitasiyası komissiyası ötən müddət ərzində iki dəfə, ən son isə bu ilin iyulunda iclas keçirib. Görüşün sərhəddə keçirilməsinin anlamı nədir? Ola bilər ki, ermənilər Moskvaya, Azərbaycan da Qərbə getmək istəmir. Görüşün sərhəddə keçirilməsi bununla bağlı ola bilərmi? Qeyd edək ki, 2021-ci ildə Arazdəyəndə belə bir görüş olub.
Siyasi şərhçi Samir Hümbətov "Bakı- Xəbər"ə açıqlamasında bildirdi ki, sərhəddə Azərbaycanla Ermənistan nümayəndələri tərəfindən delimitasiya komissiyasının növbəti görüşünün keçirilməsi, amma bunun ikili olması çox önəmli məsələdir: "Mən deyərdim ki, hətta çox vacib bir işdir. Çünki bugünə kimi ya Qərb ölkələri, ya da Rusiya bu və ya digər formada özlərini ortaya atıb, mən də varam anlayışı ilə yanaşırlar məsələyə. Ona görə də, ilkin nəticə əldə etmək mümkün olmayıb. Amma indi artıq Azərbaycan və Ermənistan nümayəndələri özləri görüşürlər, özləri danışırlar. Mən düşünürəm ki, bu çox önəmli məsələdir. Xəritələr ortaya qoyulacaq. Düzdür, Rusiya tərəfi deyir ki, guya xəritələr yalnız Rusiya Müdafiə Nazirliyinin qərargahındadır. Amma yalan söhbətdir. Azərbaycanda da, Ermənistanda da var. Xəritələr açılıb ortaya qoyulacaq, onların əsasında neçənci ilin xəritələrindən, hansı formada istifadə etmək lazımdırsa, özləri qərarlaşdıracaqlar. Kənardan edilən müdaxilə prosesi yalnız pozmağa hesablanır. Qarabağ məsələsində kənar oyunçular olmasa, düşünürəm ki, Ermənistan Azərbaycanla dil tapa bilər, məsələləri həll edə bilər. Son vaxtlar Ermənistan tərəfinin bu məsələdə nisbətən aktivlik göstərməsi onu göstərir ki, onların başqa variantı yoxdur. Azərbaycan Qərbi istəmir, Ermənistan da Rusiyanı istəmir. Ona görə də, məcbur qalıb özləri söhbət edirlər. Onu da deyim ki, bu təcrübədən keçib. Hətta işğal dövrü olan 1999- cu ildə, rəhmətlik Heydər Əliyevin dövründə Robert Köçəryanla Sədərəkdə görüşdülər. Yəni bu problemli məsələ deyil. Liderlər səviyyəsində də görüşmək mümkündür. Bunun üçün kifayət qədər imkan da var. Ya Naxçıvan ərazisində, ya da Azərbaycan ərazisində, sərhəddə bir yer təşkil edib, özləri arasında görüş keçirə bilərlər və yekun nəticə də əldə edə bilərlər. Burada iradənin ortaya qoyulması vacibdir. Ermənistan hazırda deyir ki, hər şey edirəm, görüşürəm. Amma axıra kimi gedib çıxacağı sual altındadır. Mənə elə gəlir ki, lazımdır. Ağlı başında olan dövlət, yəni Ermənistan bu addımı atmalıdır və birbaşa danışıq aparmalıdır".
Məhəmmədəli QƏRİBLİ
