Sahil Kərimli: "Ermənistan hələ də anlamır ki, bu dəhliz daha çox iqtisadi xarakter daşıyır"
Ermənistan 9-10 noyabr səhvini təkrar etməyəcək. Məqsədimiz odur ki, sülh sazişi imzalanandan sonra konkret təminatçılarımız olsun ki, hər hansı pozuntu baş verərsə, biz hansı beynəlxalq mexanizmlərdən istifadə edə biləcəyimizi bilək.
Bu barədə Ermənistan parlamentinin milli müdafiə və təhlükəsizlik komitəsinin sədr müavini, deputat Armen Xaçatryan deyib.
Onun sözlərinə görə, noyabrın 10-dan sonra Rusiyanın bütün zəmanətləri itdi: "Ermənistan bu səhvi ikinci dəfə təkrar etməyəcək. Rusiyanın "əgər Naxçıvanla Azərbaycan arasında yol açılsa, ona nəzarət Rusiya tərəfindən həyata keçirilməlidir" kimi son bəyanatlarına gəlincə, demək istəyirəm ki, bu heç bir halda ola bilməz, heç bir ölkənin qüvvələri Ermənistanın yollarında ola bilməz. Ölkəmizin xüsusi təyinatlı qüvvələri yollarda təhlükəsizliyi təmin edəcək".
Ermənilər yenə hansısa beynəlxalq təminatdan danışır. Rusiyaya güvənmirlərsə, beynəlxalq təminaçı adı ilə kimlərisə regiona gətirmək məqsədini güdürlərmi?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Ermənistan siyasi rəhbərliyi son zamanlar qeyri-konstruktiv mövqeyini davam etdirməklə bölgədə vəziyyəti daha da gərginləşdirməyə çalışır: "Məsuliyyətsiz bəyanatlar, qeyri-ciddi açıqlamalar, bir-birini təkzib edən siyasi mövqe sərgiləyən Ermənistan rəsmiləri regionda sülhə və təhlükəsziliyə zərbə vurur. Hazırda Ermənistanın antirusiya siyasəti, Qərbdə havadar axtarışına çıxaması rəsmi İrəvan üçün yaxşı heç nə vəd etmir. Bu gün Ermənistan XİN Azərbaycanla danışıqlara hazır olduğunu bildirib. Amma digər tərəfdən bu cür riyakar və ikiüzlü çıxışlar anlaşılan deyil. Ermənistan elə zənn edir ki, bölgədə hərbi siyasi vəziyyəti gərginləşdirməklə Avropa dairələrinin dəstəyi ilə nəsə əldə edəcək. Görünür, Ermənistan 2020-ci ildən bugünə kimi baş verən hadilərdən ciddi nəticə çıxara bilmir. Paşinyan hakimiyyəti anlamalıdır ki, onu arxalandığı dairələr xilas edə bilməyəcək. Regionda sabitlik və sülh üçün yeganə vasitə konstruktiv mövqe tutmaq və Azərbaycanla sülh müqavuiləsi imzalamaqdır. Özü də Ermənistan bu addımı heç bir kənar qüvvənin diqtəsi və iştirakı ilə yox, konkret olaraq Azərbaycanla ikitərəfli danışıqlar aparmaqla atmalıdır. Əks təqdirdə uduzan həmişə olduğu kimi yenə Ermənistan olacaq. Ermənistan kənarda və ya Qərbdə təminatçı axtarmaq əvəzinə ilk öncə sülh masasına oturmalıdır. Çünki ən böyük təminat elə sülh müqaviləsidir ki, Azərbaycan yalnız və yalnız Ermənistanla sülh imzalamaq niyyətindədir. Naxçıvanla Azərbaycanı quru yolla birləşdirəcək Zəngəzur dəhlzinin açılması məsələsinə gəldikdə isə, Ermənistan hələ də anlamır ki, bu dəhliz daha çox iqtisadi xarakter daşıyır. Ermənistanın da iqtisadi inkişafını təmin edəcək Zəngəzur dəhlizi açılarsa, təbiidir ki, dəhlziin təhlükəsizliyinə Azərbaycan tərəfindən də təminat verilir. Digər tərəfdən Zəngəzur dəhlizi, demək olar ki, bütün dünyanın marağında olan bir layihədir. Belə olduğu halda dəhlizin təhlükəsziliyinə beynəlxalq səviyyədə zəmanət olacaq".
Məhəmmədəli QƏRİBLİ
