Xəyal Bəşirov: "Azərbaycanın ümummilli maraqlarına, dövlət siyasətinə zidd olan hansısa bir təşkilatın ölkə ərazisində fəaliyyət göstərməsi mümkünsüzdür"
"Azərbaycan torpaqlarının Ermənistan tərəfindən 30 il davam edən işğalı zamanı daha bir milyon azərbaycanlının bədnam və qanlı etnik təmizləməyə məruz qaldığı bir vaxtda ABŞ işğalçı Ermənistan dövlətinin yanında dayanıb. İndi də həmin siyasət eyni formada davam edir".
Bu sözləri Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev ABŞ Beynəlxalq İnkişaf Agentliyinin rəhbəri Samanta Pauerin yazısına cavabında sosial şəbəkədə yazıb.
"Akademik və ya peşəkar qərəzsizliyə iddia etmək düzgün olmazdı, belə ki, universitetdə "İnsan haqları" təlimləri professoru kimi, Samanta Pauer "Cəhənnəmdən bir problem: Amerika və soyqırımı çağı" adlı təbliğat kitabında Ermənistanın günahsız mülki azərbaycanlılara qarşı törətdiyi soyqırımı və vəhşilik aktları qarşısında tamamilə susqun qalıb. Birləşmiş Ştatların Birləşmiş Millətlər Təşkilatının Təhlükəsizlik Şurasındakı daimi nümayəndəsi kimi, o heç vaxt azərbaycanlı qaçqın və məcburi köçkünlərin məsələsini qaldırmağa və BMT Təhlükəsizlik Şurasının qətnamələrinin yerinə yetirilməsini tələb etməyə, hətta Ermənistanın işğalını pisləməyə cəsarət etməyib.
"Avrora" mükafatı çətiri altında Samanta Pauer bu fondun təsisçisi, Ukraynada separatizmi maliyyələşdirən məşhur oliqarx və çirkli pulların yuyulması ilə məşğul olan Ruben Vardanyanla bir araya gəlib. Maraqlıdır ki, 2019-cu ildə Avropa Parlamentinin üzvləri "Troyka Dialoq"un təsisçisi Ruben Vardanyana qarşı çirkli pulların yuyulması sxemlərinə görə sanksiyalar tələb ediblər. Ruben Vardanyan da 2022-ci ilin oktyabrından Qarabağda möhkəmləndikdən sonra ABŞ-ın dəstəklədiyi Ermənistanın siyasi rəhbərliyinə qarşı dövlət çevrilişi planlaşdırırdı.
Azərbaycanofobiya, türkfobiya, siyasi korrupsiya, "pulbazlıq" və qondarma "Avrora" mükafatı altında siyasi spekulyasiyalar, yəqin ki, Ruben Vardanyan və Samanta Pauer arasında paylaşılan dəyərlər və maraqlar idi.
Maskanı çıxarın! Artıq Azərbaycanda USAID-in əməliyyatlarına yer yoxdur!", - Hikmət Hacıyev bildirib.
USAİD Azərbaycandan necə gedəcək? Onun Azərbaycanda fəaliyyətinə necə son qoymaq olar?
"...Azərbaycan öz qərarını verib"
Siyasi və Hüquqi Araşdırmalar Mərkəzinin (SHAM) sədri Xəyal Bəşirov "Bakı-Xəbər"ə şərhində bildirdi ki, bu qəbildən olan beynəlxalq təşkilatlar həmişə ermənipərəst mövqedən çıxış ediblər: "USAID kimi təşkilatlar həmişə Azərbaycanın haqlı mövqeyinə qarşı əsassız ittihamlar səsləndiriblər. Azərbaycanı nüfuzdan salmağa hesablanan, Azərbaycan dövlətinin yürütdüyü siyasəti kölgə altına alamağa cəhd göstərən addımlar atıblar. Onlardan da biri ABŞ aid olan USAID-dır. Əslində, o Beynəlxalq İnkişaf Agentiyi adı altında dünyada fərqli məqsədlərə xidmət edən bir təşkilatdır. Onlar bu təşkilatın dünyada fərqli xidmətlərlə məşğul olduğunu dəfələrlə sübut ediblər. Hazırda onun rəhbəri olan Samanta Pauerin nə dərəcədə ermənipərəst olduğunu həmişə görmüşük. O bütün çıxışlarında, əlinə keçən hər fürsətdə Azərbaycana qarşı əsassız ittihamlar səsləndirməklə öz ermənipərəstliyini dəfələrlə isbat edib. Bir məqamı da diqqətinizə çatdırım, bu şəxs onunla öyünürdü ki, süni şəkildə "qaçqın" və "məcburi köçkün" adı vermək istədikləri adamlarla görüşüb. Bu adam, halbuki, Azərbaycan torpaqları işğal altında olanda Azərbaycana gəlib gerçək məcbiri köçkünlərlə heç zaman görüş keçirməyib. Bu da ondan xəbər verir ki, bu təşkilata rəhbərlik edən, bu təşkilatın yaradılmasını qarşılarına məqsəd qoyan şəxslərin hamısı dünyada haqq-ədalətə, beynəlxalq inkişafa deyil, tamamilə fərqli məqsədlərə, maraqlara xidmət etmək niyyəti daşıyıblar. Əlbəttə, USAID kimi təşkilatlarla Azərbaycanın əməkdaşlığı davam edə bilməz. Çünki o, Azərbaycanın haqlı mövqeyinə zidd fəaliyyət göstərən təşkilatdır. Azəbaycan haqq-ədaləti, regionda sülhü, təhlükəsizliyi, sabitliyi bərqərar edən siyasət yürütməyə çalışır. Azərbaycan yeni reallıq formalaşdırıb. Bu reallığın mahiyyəti ilə bu kimi təşkilatların mahiyyəti daban-dabana zidd olması səbəbindən belə təşkilatlarla bizim əlaqələrimiz hardasa qırılmalı idi. Qırılma anı hazırkı məqamda yetişdi. Çünki onlar İkinci Qarabağ müharibəsindən sonra Azərbaycanın qələbəsini, Azərbaycanın formalaşdırdığı yeni reallığı, Azərbaycanın Cənubi Qafqazda sülhü, sabitliyi və təhlükəsizliyi, əməkdaşlığı təşviq edən addımlarını qəbul etmək istəmirlər".
X.Bəşirovun sözlərinə görə, onların Azərbaycandakı fəaliyyəti ilə bağlı o prosesdə çat yaranmalı idi, o çat da artıq demək olar yaranıb. "Ona görədir ki, Prezidentin köməkçisi Hikmət Hacıyev onlara və o qəbildən olan digər təşkilatlara, onların nümayəndələrinə maskalarını çıxarmaları ilə bağlı çağırış edib. Əslində heç onların maskalarını çıxarmalarına da ehtiyac yoxdur, çünki onlar maskanın altından belə hansı neqativ stereotiplərə xidmət etdiklərini büruzə verirlər. Təbii ki, bu çağırış pozitiv bir çağırışdır. Nəyə görə? Çünki biz onları haqqa dəvət edirik. Biz dövlət başçısının köməkçisi Hikmət Hacıyevin dilindən həmin o təşkilatı, həmin o təşkilata rəhbərlik edən şəxsləri, onların məsul nümayəndələrini haqqa-ədalətə çağırırıq. Təbii ki, bu çağırışı eşitmək imkanları olsa da, onlar bu çağırış istiqamətində addım atmırlar. Amma bizim xoş niyyətimiz son ana qədər ondan ibarətdir ki, yenə də biz öz üzərimizə düşəni edək, bu çağırışı ünvanlayaq, bəlkə də onlar öz yanlışlarını düzəltdilər. Amma sözsüz ki, bu olsa da, olmasa da Azərbaycan öz qərarını verib. Azərbaycanın ümumilli maraqlarına, dövlət siyasətinə zidd olan hansısa bir təşkilatın ölkə ərazisində fəaliyyət göstərməsi mümkünsüzdür. Azərbaycan 90-cı illərin zəif Azərbaycanı deyil ki, ölkəmizdə bu kimi təşkilatlar at oynatsınlar, təsirləri altına aldıqları, cəmiyyətdən sözün hər mənasında oğurladıqları insanları öz maraqlarına və öz diqtələrinə xidmət etməyə məcbur qoysunlar. Təbii ki, bu, bu qəbildən olan və hələ əməkdaşlığımızda çat yaranmayan digər xarici təşkilatlara bir nümunə olmalıdır, onlar bundan nəticə çıxarmalıdırlar. Əgər çıxarmayacaqlarsa, təbii ki, onların da taleyi eyni şəkildə sonlanacaq"-deyə X.Bəşirov əlavə etdi.
İradə SARIYEVA
