Ermənistan anlamalıdır ki, sülhün kökləri, toxumları Vaşinqton, Brüssel və Parisdə deyil, buradadır. Trend xəbər verir ki, bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev jurnalistlərə açıqlamasında deyib.
O bildirib ki, bu sülhün irəli aparılması, ciddi nailiyyətlərin əldə edilməsi üçün Ermənistan regionun içinə baxmalı, Azərbaycanla danışıqları davam etdirməlidir.
"Azərbaycanda xoş niyyət var. Ölkəmizin suverenliyi təmin edilib, regionda yeni status-kvo yaranıb və bu status-kvo ədalətə, beynəlxalq hüquqa əsaslanan legitim status-kvodur. Ermənistan Azərbaycan torpaqlarını işğal edərək yaratdığı status-kvonu Ermənistanın dəstəkləyicisi olan Minsk qrupu üzvləri də müdafiə edirdi, bu, haqsız və qəbuledilməz idi".
Xatırladaq ki, 2020-ci ildə İkinci Qarabağ müharibəsi bitdikdən sonra Azərbaycana Ermənistana 5 baza prinsipdən ibarət sülh təklifi edib. Ötən dövr ərzində Ermənistan tərəfindən müxtəlif yollarla sülh müqaviləsinin şərtlərinin razılaşdırılması və yekun müavilənin imzalanması yubadılır.
Hikmət Hacıyev deyib ki, regionda yaranan yeni reallıqlar çərçivəsində biz Ermənistanla Azərbaycan arasında sülh müqaviləsinin imzalanması üçün heç bir maneə görmürük.
O bildirib ki, Ermənistan tərəfinin sözlərlə oynamaqdansa, konkret addım atıb irəli gəlməsi və masada əyləşməsi çox önəmlidir.
"Hələlik bu barədə bir söz söyləmək çətindir. Ermənistan tərəfindən aydın fikirlər gözləntisindəyik. Ermənistan sülh müqaviləsi deyiləndə hələ də regionun çölünə baxır. Bizim dediyimiz odur ki, üçüncü tərəflərin gündəliyini buraya daşımaqdansa, regionun özünə sahib çıxıb sülh müqaviləsi ilə bağlı danışıqları irəli aparmaq lazımdır. Top hazırda Ermənistanın qapısındadır", - deyə H.Hacıyev əlavə edib.
O, daha sonra əlavə edib ki, həm Azərbaycan, həm də Türkiyə ilə sərhəd qapılarının bağlı qalmasının günahı Ermənistanın özündədir.
O bildirib ki, Ermınistanın işğalçılıq, təcavüzkarlıq siyasəti nəticəsində regionda belə bir vəziyyət yaranıb.
"Qardaş Türkiyənin qənaəti həmişə ondan ibarət olub ki, Ermənistan Azərbaycan torpaqlarının işğalına son verdiyi, həm Türkiyə, həm də Azərbaycana qarşı ərazi iddialarından əl çəkdiyi təqdirdə və nəhayət, regionda pozitiv gündəmlə çıxış etdiyi halda Ermənistanla münasibətlərin normallaşması mümkün ola bilər.
Azərbaycan və Türkiyə sinxron şəkildə hər zaman münasibətlərin normallaşdırılmasını dəstəkləyiblər və Ermənistana daim pozitiv mesajlar göndəriblər. Amma təbii ki, yenə də Ermənistan regionun potensialını özü qiymətləndirib, region problemlərinin daxildə həll edilməsi yanaşmasından çıxış etməlidir", - deyə H.Hacıyev bildirib.
Xatırladaq ki, Azərbaycan torpaqlarının işğalına etiraz olaraq Türkiyə 1993-cü ildən Ermənistanla sərhədlərini bağlayıb və bu ölkə ilə bütün əlaqələrini kəsib. İkinci Qarabağ müharibəsindən sonra rəsmi Ankara və İrəvan arasında münasibətlərin normallaşması istiqamətində addımlar atılıb. Türkiyə Serdar Kılıçı, Ermənistan isə Ruben Rubenyanı münasibətlərin normallaşması üzrə xüsusi nümayəndə təyin edib.
