Bəzi Qərb ölkələrinin diqtəsi ilə hərəkət edən Ermənistan artıq xarici siyasətində Rusiya ilə ciddi problemlər yaşayır. Lakin buna paralel olaraq, Ermənistanın İranla da münasibətlərinin pisləşməsi qaçılmaz hesab edilir. Artıq bu xüsusda Ermənistanın özündə həyəcan təbili çalanların sayı yetərincədir.
Burada həm də ona diqqət edilir ki, Azərbaycan yaranmış situasiyadan olduqca məharətli şəkildə istifadə edərək, Ermənistanı daha çətin vəziyyətə salır. Erməni politoloq Argişti Kiviryan qeyd olunanlar fonunda bildirir: "Qərb uzun müddətdir ki, Ermənistanın qarşısında bir sıra şərtlər qoyub. Ermənistanın indiki hakimiyyəti bu şərtləri yerinə yetirir və KTMT ətrafında mövcud vəziyyət də bu məntiqə uyğundur". Onun sözlərinə görə, Qərb Rusiyanı regiondan çıxarmağa və İranın bura daxil olmasına imkan verməməyə çalışır: "KTMT missiyası baş tutsaydı, Ermənistana heç bir ziyan vurmazdı. Üstəlik bu, Avropa İttifaqı müşahidəçilərinin mövcudluğunu balanslaşdıracaqdı. Ermənistan hakimiyyəti bildirir ki, İrəvanın KTMT-dən çıxması məsələsi gündəmdə deyil, lakin bu o demək deyil ki, o yarana bilməz. Hər şey regionda və dünyada baş verən proseslərdən asılı olacaq. Əgər Rusiya zəifləsə, o zaman İrəvan KTMT-ni və Moskva ilə əlaqəli digər təşkilatları tərk edəcək". Kiviryan əlavə edib ki, heç kim Ermənistana alternativ təhlükəsizlik yastığı təklif etmir: "Ermənistan hakimiyyəti də bunu başa düşür, sadəcə olaraq, onların vecinə deyil, çünki onlar yalnız öz planlarını həyata keçirməyə çalışırlar. Hər iki tərəfə oynamaq artıq Qarabağın tam itirilməsinə, ermənilərin Qarabağdan "qovulmasına" və Ermənistanın üzərində təhlükəyə gətirib çıxarıb. Ermənistana təhlükəsizlik təminatının verilməsi məsələsini nə NATO gündəliyinə daxil edib, nə də ABŞ. Azərbaycanın öz enerji resursları ilə Qərb üçün erməni xalqının maraqlarından daha əhəmiyyətli olduğu ortaya çıxdı, ona görə də öz məsələlərini uduzan erməni tərəfinin hesabına həll etdi". O iddia edib ki, Qərb Rusiya və İranın regiondan çıxarılmasına nail olmaq üçün sadəcə, Ermənistandan istifadə etmək istəyir, sonra isə gözünü qırpmadan, Ermənistanı da qurban verəcək: "İrəvan hakimiyyətinin yeritdiyi siyasət Ermənistanı təhlükə altında qoyur. Bu siyasi xətti, belə demək mümkünsə, onların siyasi savadsızlığı müəyyən edir. İrəvan hakimiyyətinin addımlarının Ermənistanı tam fəlakətə gətirib çıxaracağı faktdır, bunu başa düşmək üçün ağıllı olmaq lazım deyil. Bu adamların siyasi hiylələri Ermənistanı bölgədə tək qoyub və hazırda onun regionda müttəfiqi yoxdur. Bakının siyasətinə gəlincə, o, Qərb platformalarında istədiyini aldı - Qarabağ məsələsini bağladı. Azərbaycan və Qərb sıx tellərlə bağlıdır. Məhz bunun əsasında Bakı bilir ki, hazırki bəyanatları Qərbdə həzm olunacaq. Bakı öz yeni gündəmini Qərbə diqtə etmək istəyir. Və buna nail olsa, o zaman Azərbaycan hakimiyyəti Qərbə gedəcək və marağında olduqlarını alacaq. Biz gördük ki, Bakı son illər böyük uğurlar qazanıb. Üç il ərzində müxtəlif siyasi manevrlər nəticəsində Azərbaycan Qarabağ məsələsini bağlaya bildi. Bundan sonra İranla gərginlik yarandı və son aylarda bu problemi də həll etməyə çalışır. Azərbaycan Qərbə Paşinyan kimi məcbur deyil, öz gündəmi ilə getmək istəyir. Paşinyan nə edir? Ora-bura gedir, müəyyən qərarlar vermək məcburiyyətində qalır, hər şeylə razılaşır, sonra parlamentə gəlib qəhrəmanlıq simasını təqdim etməyə başlayır. İrəvandan fərqli olaraq, Bakının dəqiq siyasəti var və Azərbaycan peşəkar, bir-birini tamamlayan siyasət həyata keçirir. Əgər Bakı bu və ya digər platformada görünürsə, qarşıya qoyulan vəzifələri həll etmək iqtidarındadır. Bakı öz siyasəti nəticəsində Qərbdən nəsə əldə etsə, həmin Qərb Paşinyanın qulağından tutub Brüsselə gətirib Azərbaycanın istədiyinə imza atmağa məcbur edəcək. Belə olan halda, İran və Rusiya ilə münasibətləri korlayan Paşinyanın başqa yolu qalmayacaq".
Bunlar fonunda Ermənistanın "Qraparak" nəşri də yazır ki, İrəvan Bakının Qərblə münasibətlərində indiki gərginliyə çox da aldanmamalıdır. Qeyd edilir ki, Qərbin diqtəsi ilə Rusiya və İranla korlanan münasibətlər Ermənistan üçün ağır nəticələrə səbəb olacaq: "Qərb Azərbaycandan vaz keçməyəcək. məlumdur ki, noyabrın 15-də ABŞ Konqresinin Nümayəndələr Palatasının Xarici Əlaqələr Komitəsinin Avropa məsələləri üzrə alt komitəsində "Qarabağın gələcəyi" adlı dinləmələr keçirilib. Dinləmələr zamanı ABŞ rəsmilərinin Bakıya səfərlərinin ləğv edildiyi açıqlanıb. Bundan başqa, ABŞ 20 ildə ilk dəfə olaraq 907-ci maddədən yan keçmək və Azərbaycana hərbi dəstək verməmək qərarına gəlib. ABŞ-nin bu gecikmiş və tamamilə mənəvi bəyanatlarına baxmayaraq, Bakıda bu addımlar kifayət qədər sərt şəkildə qarşılanıb. Azərbaycan Xarici İşlər Nazirliyi ABŞ-ın birtərəfli yanaşmasının onun vasitəçi rolunu itirməsinə səbəb ola biləcəyi və bu addımların, bəyanatların nəqliyyat təhlükəsizliyi istiqamətində səylərə xələl gətirdiyi barədə bəyanat yayıb. Azərbaycan tərəfi, həmçinin, ABŞ-ın yüksək rütbəli rəsmilərinin Azərbaycana səfərini mənasız hesab edib və bütün bunların təhrikçisinin ABŞ olduğunu, buna adekvat cavab verəcəklərini vurğulayıb. Region ölkələrinin maraqları kifayət qədər qarışıb, bir tərəfdən Rusiya ilə İranın dərin əlaqələri var və bu əlaqələr həm də hərbi sahədədir, hər ikisi Şimal-Cənub dəhlizində, Naxçıvandan keçən dəhlizdə maraqlıdır. Digər tərəfdən, İran gələcəkdə Ermənistan və Gürcüstan vasitəsilə Qara dənizə çıxmaqda maraqlıdır ki, bu da Rusiyanın maraqları ilə demək olar üst-üstə düşmür. Burada Rusiya ilə İran arasında üst-üstə düşən maraqlar da var, üst-üstə düşməyən maraqlar da var". Nəşr bildirib ki, bu halda Ermənistan yenə ortalıqda qalacaq.
Nahid SALAYEV
