Məhəmməd Əsədullazadə: "Onlar yaxşı bilirlər ki, ermənilər qaçqın deyil"
ATƏT PA-nın prezidenti Pia Kaumanın rəsmi açıqlaması bəzi məqamlara görə diqqəti cəlb edir. ATƏT-in rəsmi saytında xanım prezidentin Ermənistana səfəri barədə məlumat yayılıb.
Bildirilir ki, Pia Kauma Ermənistan baş naziri Nikol Paşinyan, Milli Assambleyanın sədri Alen Simonyan və xarici işlər nazirinin müavini Vahe Gevorqyanla görüşüb və əsasən sülhdən danışıb. Açıqlamada Qarabağı könüllü tərk edən ermənilər "Azərbaycandan gələn qaçqınlar" adlandırılıb və Qarabağın Azərbaycan ərazisi olduğu bir daha təsdiqlənib.
Məgər Qarabağı öz xoşu ilə tərk edən etnik ermənilər qaçqındır? Hələ onların statusunu heç Ermənistanın özü müəyyənləşdirmədiyi halda ATƏT sədri indidən onları qaçqın adlandırır. Məgər onları Azərbaycandan kimsə qovub, onlara kimsə təzyiq edib? Etnik erməni əhalisi öz xoşu ilə Qarabağı tərk edib. Belə olduğu halda onlar qaçqın yox, sadəcə yaşayış yerini dəyişmiş miqrantdılar. Yəni onlara ölkə daxilində heç bir status müəyyənlşdirilmədiyi halda, Ermənistan özü onların statusunu müəyyənləşdirə bilmir. Bilmir onlara konkret hansı statusla müraciət etsin. Onları necə qaçqın hesab etmək olar ki, əllərində Ermənistan pasportu var? Məcburi köçkün necə desinlər ki, Qarabağ Azərbaycan torpağıdır? Bir sözlə, hələ Ermənistanın özünün onların statusunu müəyyən etməkdə çətinlik çəkdiyi bir vaxtda ATƏT sədrinin onlara qaçqın deməsi nə dərəcədə doğrudur?
"Əgər qurum ədalətli mövqedən çıxış etsəydi, Ermənistanı atdığı bu addıma görə qınayardı"
Sözügedən məsələni "Bakı-Xəbər"ə şərh edən politoloq Məhəmməd Əsədullazadə hesab edir ki, ATƏT PA prezidentinin yanaşması doğru deyil: "ATƏT PA daima Azərbaycana münasibətdə qərəzli mövqe ortaya qoyub. Ölkəmizə qarşı qərəzli mövqedən çıxış edib. ATƏT PA-da Fransadan olan, Parisin təsiri altında olan başqa ölkələrin deputatları üstünlük təşkil edir. Ona görə də biz bu qurumdan ədalət gözləyə bilmərik. Qarabağda yaşayan ermənilər Ermənistan pasportu daşıyırlar. Ermənistan ilk növbədə beynəlxalq qanunu pozub. Çünki Ermənistanın haqqı yoxdur ki, Qarabağda yaşayan etnik ermənilərə pasport versin. Ermənistan pasportu daşıyanlar Azərbaycan ərazisindən gədiblərsə, onlara qaçqın, ya məcbur köçkün demək olmaz. Hazırda da oların pasportları Ermənistana məxsusdur. Ümumiyyətlə, ATƏT PA regionda Azərbaycanın yaratdığı reallıqları qəbul etmək istəmir və buna bəhanə axtarırlar. Əgər qurum ədalətli mövqedən çıxış etsəydi, Ermənistanı atdığı bu addıma görə qınayardı. Bir dəfə olsun bunu etməyiblər. Avropadan ölkəmizə qarşı siyasi təzyiqlər edilir. Hesab edirəm ki, bu da onun bir formasıdır. Onlar yaxşı bilirlər ki, ermənilər qaçqın deyil. Ermənistan rəhbərliyi bilərəkdən buna şərait yaradır. Bu onu göstərir ki, hər iki tərəf sülh müqaviləsinin bağlanmasında maraqlı deyil. Sülhün alternativi müharibədir. Görünür, Ermənistan müharibədə maraqlıdır".
Vidadi ORDAHALLI
