Yadigar Məmmədli: "Paris destruktiv mövqeyinə son qoymasa, nəticədə itirən tərəf olacaq"
"Ermənistandan təklifimizə dair qeydləri gözləyirik. Biz bir neçə dəfə sülh müqaviləsinin layihəsi ilə bağlı təklifləri mübadilə etmişik. Lakin indi biz sentyabrın 11-dən bəri Ermənistan hökumətindən bu qeydlərlə bağlı rəyinin nədən ibarət olduğuna dair cavab verməsini iki aydan artıqdır ki, gözləyirik və bizə heç bir cavab gəlməyib".
Bunu Prezident İlham Əliyev Bakıda İraq Prezidenti Əbdüllətif Camal Rəşid ilə mətbuata bəyanatında deyib.
Ölkə başçısının fikrincə, Fransa buna mane olur: "Yenə də bunun səbəbinin onlara pis məsləhətlərin, xüsusilə Fransadan pis məsləhətlərin verilməsinin olduğunu düşünürəm. Fransa Cənubi Qafqazda çox destruktiv rol oynayır. Əslində, indi Ermənistan Fransa hökumətinin marionetinə çevrilib və bu, regional sabitliyə ciddi təhlükə ola bilər. Bizə heç bir müharibə lazım deyil. Biz öz ərazimizdə vuruşurduq və ədaləti, beynəlxalq hüquqi bərqərar etdik".
Görünən odur ki, Fransa sülh sazişi təkliflərini iqnor edir. Niyə?
"Fransa yaranan yeni reallıqlarla barışmaq istəmədiyi üçün davamlı olaraq pozucu mövqedən çıxış edir"
Sözügedən məsələ ilə bağlı fikirlərini "Bakı-Xəbər"lə bölüşən media eksperti Yadigar Məmmədli hesab edir ki, bütün bunlar Fransanın pozucu mövqedən çıxış etməsindən irəli gəlir: "Çünki Prezident İlham Əliyevin də qeyd etdiyi kimi, Fransa Cənubi Qafqazda destruktiv mövqedən çıxış edir. Regionda sülhün bərqərar olması bir çox dövlətləri maraqlandırır, Fransa xaric. Çünki Azərbaycanla Ermənistan arasında münasibətlərin gərgin olması bölgə üçün təhdid yaradır, bir sıra meqa layihələrin həyata keçirilməsinə əngəllər törədir. Ona görə də Avropa İttifaqı da maraqlı olmalıdır ki, tərəflər arasında münasibətlər yoluna düşsün. Çünki Azərbaycan işğal altında olan ərazilərini azad edib, ərazi bütövlüyünü təmin edib və suverenliyini bütün Qarabağda bərqərar edib. Ancaq nədənsə Fransa bu məsələyə qısqanclıqla yanaşır və sülh prosesini əngəlləməyə cəhd edir. Hətta deyərdim ki, ermənilərdən daha çox bu məğlubiyyəti həzm etmir. Faktiki olaraq, Fransa regionda destruktiv mövqedən çıxış edərək yeni qarşıdurmalara rəvac verir. Fransa sülhü pozmaq məsələsində ən öndə gedən ölkədir. Belə olmasaydı, yeri gəldi-gəlmədi Qarabağ məsələsini BMT Təhlükəsizlik Şurası müstəvisinə çıxarmazdı. Görəndə ki, bu nəticə vermir, Ermənistanı silahlandırmaq yolunu tutdu. Fikrimcə, Fransa yaranan yeni reallıqlarla barışmaq istəmədiyi üçün davamlı olaraq pozucu mövqedən çıxış edir. Belə olmasaydı, sülh danışıqları prosesi bu qədər uzanmazdı. Üç ildir ki, tərəflər arasında sülh sazişini imzalamaq mümkün olmur. Paris destruktiv mövqeyinə son qoymasa, nəticədə itirən tərəf olacaq".
Vidadi ORDAHALLI
