Ramiyyə Məmmədova: "Özlərinin elan etdiyi rəqəmlərdən bir daha görünür ki, deyilən sayda şəxs Qarabağı tərk edə bilməzdi"
Qarabağdan könüllü miqrasiya edən ermənilərin yalnız 1143 nəfəri yataqxana və ictimai mənzillərdə yaşayır. Bu barədə erməni mediası məlumat yayıb.
Ermənistan Qarabağdan 100 min erməninin köçdüyünü iddia edib. Bu ermənilərin böyük əksəriyyətinin isə Qarabağ sakini olmadığı, işğal illərində qanunsuz məskunlaşdırıldığı və yaxud Ermənistan vətəndaşı olduğu haqda dəfələrlə yazılıb.
İndi Ermənistan mediasının əmək və əhalinin sosial müdafiəsi nazirinin müavini Terteryana istinadla yaydığı bu məlumatdan da görünür ki, Qarabağdan gedənlərin böyük əksəriyyətinin Ermənistanda evi, yaşamağa şəraiti var. Həmçinin onların əksəriyyəti Ermənistan pasportu daşıyır.
Zamanında Ermənistandan qovulan və Qarabağdan məcburi didərgin düşən bir milyona yaxın insanın hamısı Bakıda tələbə yataqxanalarında, qaçqın şəhərciklərində çadırlarda, vaqonlarda, tikilisi yarımçıq qalmış binalarda məskunlaşırdısa, hazırda Ermənistandakı "qaçqın"larla bağlı mənzərə nəyi deməyə əsas verir?
Siyasi şərhçi Ramiyyə Məmmədova "Bakı-Xəbər"ə açıqlamasında bildirdi ki, Ermənistanın qaçqınların sayını 100 min və daha artıq göstərməkdə məqsədi indiyə kimi uydurduğu yalanını siyasi avantüraya çevirməkdir: "Necə deyərlər, ermənilərin məqsədi bir gülləylə iki dovşan vurmaqdır. Birincisi, bu yalanı uydurmaqla iqtisadi cəhətdən ağır durumda olan Ermənistan beynəlxalq təşkilatlardan 100 min qaçqın üçün yardım almağı planlaşdırır. İkincisi, strateji hədəfləri qaçqınların sayını şişirtməklə Azərbaycana beynəlxalq təşkilatlar, onları himayə edən dövlətlər vasitəsilə təzyiq göstərməkdir. Ermənistanın qaçqınların sayını 100 min və daha artıq göstərməkdə məqsədi indiyə kimi uydurduğu yalanını siyasi avantüraya çevirməkdir. Burada bir məsələni də qeyd etməyi vacib bilirik. Ermənistanda iqtisadi böhran bu ölkədə əhalinin demoqrafik dəyişikliyinə ciddi surətdə təsir göstərib. Bu ölkənin Statistika Komitəsinin məlumatına görə, son zamanlar Ermənistanı tərk edənlərin sayı ciddi surətdə artmaqdadır. Sürətlə azalan Ermənistan əhalisinin sayını süni surətdə artırmaq məqsədilə Qarabağda yaşayan erməniləri Ermənistana çağıran Nikol hökuməti indi də bundan öz çirkin niyyətlərini həyata keçirmək üçün istifadə etməyə cəhd edir.
Ermənistan bilməlidir ki, Qarabağdan getmiş şəxslərin geri qayıtması məsələsindən öncə müzakirə mövzusu bu dövlətin zorla Qərbi Azərbaycandan deportasiya etdiyi soydaşlarımızın öz torpaqlarına ləyaqətlə qaytarılması məsələsidir.
Əslində ermənilər Azərbaycan vətəndaşlığını qəbul etməməklə, başqa ölkələrin pasportunu daşımaqla öz əlləri ilə bu statusdan özlərini məhrum ediblər. Məsələnin digər tərəfi odur ki, Azərbaycan erməni əhalini köçürməyib, ermənilər könüllü gediblər. Rusiya vətəndaşlığı olan ermənilərə də qaçqın statusu tanına bilməz, çünki onlar Rusiyadan Ermənistana qovulmayıb, qanunsuz miqrant kimi yaşadıqları Azərbaycandan köçüb gediblər.
Beynəlxalq hüquqla Qarabağdan köçən ermənilərə məcburi köçkün statusu da düşmür. Çünki məcburi köçkün statusu vətəndaşı olduğu ölkənin bir ərazisindən başqa bir ərazisinə məcburi köçmüş şəxslərə verilir. Bütün bu faktorlar Ermənistanın "qaçqın" sayı ilə manipulyasiya etdiyinin bariz nümunəsidir. Özlərinin elan etdiyi rəqəmlərdən bir daha görünür ki, deyilən sayda şəxs Qarabağı tərk edə bilməzdi. Ən azından bu özünü real və rəsmi statistikada göstərmiş olardı".
Məhəmmədəli QƏRİBLİ
