Dünya qadınları Fransa müstəmləkəçiliyinə qarşı Bakıda tarix yazırlar...
Tural İsmayılov: "Fransa müstəmləkələrində qadınlara qarşı həyata keçirilən insanlıq dışı diskriminasiyaya qarşı Qoşulmama Hərəkatı nəzdində qadınlar etiraz formalaşdırır"
Bakıda Qoşulmama Hərəkatının Qadın Hüquqlarının İnkişafı və Qadınların Səlahiyyətləndirilməsi üzrə Konfransı keçirilib. Bununla da ölkəmiz növbəti beynəlxalq tədbirə ev sahibliyi edib.
Qeyd edək ki, Konfrans Qoşulmama Hərəkatının hazırkı sədri qismində Azərbaycan Respublikası ilə yanaşı, təsisatın növbəti sədrləri kimi Uqanda və Özbəkistanın birgə təşkilatçılığı ilə baş tutub. Tədbirdə Qoşulmama Hərəkatına üzv ölkələrin, həmçinin təsisat yanında müşahidəçi statusuna malik dövlətlərin, beynəlxalq təşkilatların nümayəndələri, həmçinin xüsusi qonaq qismində dəvət olunan yüksək vəzifəli rəsmi şəxslər də daxil olmaqla, ümumilikdə 60-a yaxın nümayəndə heyəti iştirak edib. Qoşulmama Hərəkatının Qadın Hüquqlarının İnkişafı və Qadınların Səlahiyyətləndirilməsi üzrə Konfransında yekun bəyannamə qəbul edilib.
"...Biz bəzi ölkələr, xüsusilə də Fransanın yürütdüyü neokolonializm siyasətini qlobal səviyyədə ifşa etmiş, bu utancverici praktikaya son qoyulması tələbini səsləndirmişik.
Kolonializm qadınların hüquqlarına da mənfi təsir göstərmişdir. Bu xüsusda, konfransa paralel olaraq müvafiq mövzuda tədbirin keçirilməsini alqışlayıram.
Qadınların hüquqlarının müdafiəsi, cəmiyyətdə rolunun gücləndirilməsi Qoşulmama Hərəkatının gündəliyində önəmli yer tutur. Hərəkat tərəfindən ardıcıl olaraq qəbul edilmiş sənədlərdə, o cümlədən 2019-cu il Bakı Zirvə toplantısının yekun sənədində bu mövzuya xüsusi diqqət yetirilmiş və bu sahədə üzv dövlətlərin öhdəlikləri müəyyən edilmişdir..." Bu fikirlər Azərbaycan Prezidenti, Qoşulmama Hərəkatının sədri İlham Əliyevin Qoşulmama Hərəkatının "Qadınların hüquqlarının inkişaf etdirilməsi və səlahiyyətlərinin artırılması" mövzusunda konfransının iştirakçılarına ünvanladığı müraciətdə əksini tapıb.
Qoşulmama hərəkatı qadınlarla bağlı konfransın əhəmiyyəti nədir? Qadınlar neokolonizmə qarşı mübarzəyə nə qədır töhfə verə bilər?
"...Qadınların bu məsələdə səsi çox mühüm əhəmiyyətə malik olacaq"
Siyasi şərhçi Tural İsmayılov "Bakı-Xəbər"ə şərhində "Qoşulmama Hərəkatı hazırda dünya siyasi trendlərini müəyyənləşdirən önəmli bir təşkilat halına gəlib. Özəlliklə, Azərbaycanın bu hərəkata sədrliyi dönəmində Qoşulmama Hərəkatı böyük bir cığırı adlayaraq beynəlxalq münasibətlər fonunda vacib oyuncuya çevrilib. Qoşulmama Hərəkatının aktivliyi nəticəsində hazırda dünyanı təkqütblü, kolonalist, imperialialist təşkilatlara bölən dünya dövlətlərinin aqressiv işğal siyasətlərinin qarşısında bir bufer yaradıb"-deyə bildirdi.
T.İsmayılovun sözlərinə görə, hərəkat bugünə qədər bir çox həssas məsələlərlə bağlı mövqe qoyub, bir çox həssas problemlərin işlənməyinə təkan verib. "Qoşulmama Hərəkatının qadınlarla bağlı konfransının çox böyük siyasi əhəmiyyəti var. Bu gün dünyada qadın hüquqlarından danışan bir çox Qərb ölkələrində qadınlara qarşı çox ciddi qısnamalar var. Eyni zamanda Yaxın Şərqdə, başqa aşırı radikal mühafizəkar cəmiyyətlərdə qadın hüquqları ilə bağlı çox ciddi problemlər yaşanır. Bu baxımdan Qoşulmama Hərəkatının qadınlarla bağlı konfransı belə bir həssas məsələyə mövqe, münasibət formalaşdıran vacib bir toplantıdır. Digər tərəfdən, Fransanın müstəmləkəçilik həyata keçirdiyi adalarda və coğrafi mövqelərdə, təəssüflər olsun ki, bugünə qədər çox ciddi insan hüquqları problemləri var. Bu gün Fransa müstəmləkələrində qadınlara qarşı həyata keçirilən insanlıq dışı diskriminasiyaya qarşı Qoşulmama Hərəkatı nəzdində qadınlar etiraz formalaşdırır. Hesab edirəm ki, qadınların bu məsələdə səsi çox mühüm əhəmiyyətə malik olacaq"-deyə T.İsmayılov vurğuladı.
İradə SARIYEVA
