"Amerikalılar, avropalılar, ruslar və iranlılar Ermənistanda qarşıdurmanın aktiv fazasına daxil olmağa başlayırlar". Belə bir açıqlama ilə erməni siyasi şərhçi Arman Abovyan çıxış edib.
O qeyd edir ki, bu hal Ermənistandın məhvi ilə nəticələnə bilər: "Əslində bir çox ekspertlərin və analitiklərin qorxduğu şey gerçəkləşdi. Amerikalılar və avropalılar bilavasitə bildirirlər ki, regionda mövcud olmalarının əsas məqsədləri Rusiya və İranın bölgədəki təsirini sıxışdırıb çıxarmaq və regional logistikaya nəzarət etməkdir. Öz növbəsində ruslar və iranlılar açıq şəkildə bəyan edirlər ki, onların təsirini zəiflətmək cəhdləri bölgədə sərt reaksiya ilə qarşılaşacaq. Ümumiyyətlə, əsas "film" indi başlayır". Ekspert bildirir ki, ABŞ Dövlət Departamentinin Avropa və Avrasiya məsələləri üzrə köməkçisi Ceyms O`Brayn tamamilə açıq, birbaşa və aydın şəkildə bəyan edib ki, ABŞ-ın regionda marağı elə bir vəziyyət yaratmaqdır ki, Ermənistan İran və Rusiya ilə birbaşa qarşıdurmaya girsin və sonra öz logistikasını idarə edəcək: "Lakin avroamerikalılar və xüsusən də O'Brayn deməyi unudublar ki, Ermənistanın məxməri hakimiyyətləri tranzit yollarını onların strateji müttəfiqləri olan Qərb ağalarının ciddi rəhbərliyi altında idarə edəcəklər. Ümid edirəm ki, Türkiyənin NATO-dakı varlığını, Türkiyədəki Amerika "İncirlik" bazasını və Aİ ilə Azərbaycan arasında enerji sektorunda strateji tərəfdaşlığı heç kim unutmayıb.
Düzdür, rəsmiyyət xatirinə qeyri-müəyyən eyhamlar səslənirdi ki, amerikalılar "Azərbaycana silah verməyəcəklər" və ümumilikdə bir neçə amerikalı məmur Bakıya getməyib. Bununla da, guya Türkiyə-Azərbaycan tandeminin Ermənistana hücum cəhdlərinin yolverilməzliyi ilə bağlı amerikalılar mesaj vermək istəyirlər. Amerikalıların bizi "qorumaq" istəyi məni göz yaşlarına boğdu. Amma kişilərin xəsis göz yaşlarını silib, yenə də düşündüm ki, cənab O'Brayn, yəqin ki, Ermənistan əhalisini amerikalıların və avropalıların nəzarəti naminə fiziki və milli intihara meylli xalq hesab edir. O hesab edir ki, İrəvan "erməni" logistikasına görə ruslar və iranlılarla əlaqələri kəsəcək və ermənilər bununla öz ölkələrini məhv edəcək. Bu faktdır ki, Ermənistanın indiki hakimiyyəti Rusiya-İran oxu boyunca münasibətləri kəskin şəkildə pisləşdirməyə hazırlaşır. O da bir həqiqətdir ki, Qərbin Paşinyan hakimiyyətinin məxməri əlləri ilə onların mövqelərini sarsıtmasına nə iranlılar, nə də ruslar oturub sakit baxacaq. İndi biz beynimizi yoruruq və anlamağa çalışırıq ki, açıq münaqişə harada baş verəcək və bu, Ermənistanın mövcudluğuna necə təsir edəcək".
Ekspert bu halda məhz Ermənistanın qarşıdurma məkanı olacağını proqnozlaşdırır: "Bu, sadəcə olaraq dəhşətlidir və mənim təxəyyülüm bir tərəfdən ruslar və iranlılar, digər tərəfdən isə türklər, amerikalılar və avropalıların Ermənistan ərazisində bir-birini döydüyü mənzərəni təsəvvür etməkdən imtina edir. Tiqran Köçəryanın dediyi kimi, bu, birotaqlı mənzilinizə begemot və fili buraxmaq, onları bir-birinə qarşı qoymaq və ölkənizi məhv etmək istəyənlərlə geosiyasi nəhənglərin mübarizəsindən dinc gələcək qurmağa çalışmaq kimidir. Ermənistan hakimiyyətinin etdikləri Ermənistanın siyasi sisteminə diaqnoz qoymaqdır, bu cüzamdır, çürüməkdir, dövlət olaraq yaşamağa imkan verən hər şeyi məhv etməkdir. Qlobal Qərb-Şərq qarşıdurmasını Ermənistanın başına gətirmək ölkəni istənilən seçimdə itirmək deməkdir. Ölkəni seçim qarşısında qoymaq, geosiyasi nəhəngləri oyundan çıxarmaq və Türkiyə-Azərbaycan tandemi ilə vulqar formada flört etməkdə davam etmək Ermənistanın məhvidir". Bunlar fonunda Ermənistan parlamentinin "Hayastan" fraksiyasının deputatı Armen Rüstəmyan parlamentdə jurnalistlərlə keçirdiyi brifinqdə Nikol Paşinyanın KTMT-nin iclasında iştirak etməyəcəyi məsələsinə toxunub. Rüstəmyanın sözlərinə görə, Paşinyanın KTMT-nin iclasında iştirak etməməsini diplomatiyada qəbul edilən demarşdan fərqli şəkildə adlandırmaq çətindir: "Artıq aydındır ki, birinci dərəcəli şəxs qismində iştirak etmədikləri dördüncü haldır. Bunu diplomatiyada qəbul edilən demarşdan fərqli şəkildə adlandırmaq çətindir. Əgər Ermənistanın siyasəti bir-birini tamamlamaq, təhlükəsizliyimizin əhatə dairəsini təmin etmək üçün biri ilə alınmadıqda digəri ilə tamamlamaq olsaydı, əlbəttə, bunu başa düşərdim". Erməni deputat bildirib ki, amma burada söhbət bir-birini tamamlamaqdan yox, düşərgələri dəyişdirməkdən gedir: "Bizim də ruslardan şikayətimiz çoxdur, bəli, problemlər çoxdur, bəs biz niyə onları özümüzə düşmən olmağa məcbur edirik?". Rusiyanın "RIA Novosti" portalı isə bunlar fonunda yazır ki, Rusiya Ermənistan baş naziri Nikol Paşinyanın Qərb xəttini tutmasını bağışlaya bilməz: "Ermənistan son vaxtlara qədər Hindistan, İran və Fars körfəzinin digər ölkələrini Rusiya, Şimali və Qərbi Avropa ilə birləşdirən Şimal-Cənub nəqliyyat dəhlizinin "qolu"ndan birini əldə etmək imkanına malik idi. İndi Paşinyanın sayəsində tərəfdaşlar tərəfindən bunun üzərinə böyük bir "krest" qoyulub və Ermənistan ərazisindən yan keçməklə çoxşaxəli dəhlizin bütün qolları açılır. Bu, ölkəni regionun gələcəyini müəyyən edən layihələrdə, demək olar, bərabərhüquqlu oyunçu olmaq imkanlarından məhrum edir. Ermənistanı məhv etmək onun baş naziri Paşinyanın məqsədi idisə, bizə ancaq gözlənilməz nəticələrlə dolu bu mənzərəni passiv izləyən, bizə yaxın olan bir ölkənin vətəndaşlarına rəğbət bəsləmək qalır. Ermənistanın taleyi onun xalqının əlindədir və onları Sorosun qəyyumlarının öz ölkələrini hara sürükləmələri maraqlandırmırsa, o zaman Rusiya onları cənnətə getməyə məcbur etməyəcək".
Samirə SƏFƏROVA
