Azərbaycanda şikəst "Qızıl qələm" indiyədək nə qədər şəxsə verilib... - MÜSAHİBƏ
Çingiz Qurbanoğlu: "Bu mükafın verildiyi adamların ümumi sayını bilmirəm"
Məlum olduğu kimi, Azərbaycan Mətbuat Şurası Kütləvi İnformasiya Vasitələri İşçiləri Həmkarlar İttifaqı adlanan qurumun təsis etdiyi "Qızıl qələm" mükafatı barədə məlumat yayıb və mükafatın artıq dayandırıldığını bəyan edib.
"Vaxtilə cəmiyyətdə müəyyən nüfuz qazanmış, dəyərli qələm adamlarına verilmiş, Kütləvi İnformasiya Vasitələri İşçiləri Həmkarlar İttifaqı adlanan qurumun təsis etdiyi "Qızıl qələm" mükafatı son illər jurnalistikadan uzaq insanlara təqdim olunmaqla öz etibarını itirmiş, cəmiyyətdə haqlı narazılığa səbəb olmuşdur.
Mətbuat Şurası jurnalistikamızın və peşəkar media işçilərinin nüfuzuna xələl gətirən bu məsələyə biğanə qala bilməzdi. Buna görə də MŞ-nın tapşırığıyla quruma faktiki rəhbərlik edən Ç.Qurbanoğlu Şuraya dəvət olunmuş, icraçı katibin müavini İlqar Tağıyev Mətbuat Şurasının mövqeyini, irad və tövsiyələrini onun diqqətinə çatdırmışdır".
Qeyd edək ki, Ç.Qurbanoğlu Azərbaycan Mətbuat Şurasına bununla bağlı müraciət ünvanlayıb:"Son zamanlar mətbuatda və sosial şəbəkələrdə sədri olduğum Kütləvi İnformasiya Vasitələri İşçiləri Həmkarlar İttifaqının müxtəlif insanlara təqdim etdiyi "Qızıl qələm" və digər media mükafatları ilə bağlı narazılıqları, həmçinin, MŞ-nın tövsiyələrini nəzərə alaraq, KİVİHİ Rəyasət Heyətinin qərarı ilə bu mükafatların təqdimatını dayandırdığımızı bildirirəm."
Bildirək ki, Mətbuat Şurası müraciəti anlayışla qarşılayaraq problemin həllini tapdığını bildirir, yeri gəlmişkən, diğər ictimai qurumlara da müraciət edərək media adıyla mükafatlar verilməsində ehtiyatlı davranmağa, jurnalistikamızın nüfuzuna xələl gətirən addımlardan çəkinməyə çağırır.
Bildiyimiz kimi, KİVİHİ-nin təsis etdiyi "Qızıl qələm" mükafatının veriməsi artıq dayandırılıb.
"Ola bilsin, kimsə haradasa nə isə edib, amma mənim ondan xəbərim yoxdur"
Məsələ ilə bağlı KİVİHİ sədri Çingiz Qurbanoğlu ilə əlaqə saxladıq.
- Necə oldu ki, "Qızıl qələm" mükafatının dayandırılması ilə bağlı belə bir qərar qəbul edildi?
- Əslində, "Qızıl qələm" mükafatı ləğv olunmayıb, sadəcə o mükafatın verilməsini dayandırmışıq. Gördüm ki, narazılıq edənlər var, "kitab yazıram, mənə "Qızıl qələm" düşür, niyə vermirlər" deyənlər, söz-söhbət var. Ona görə də o mükafatın verilməsini dayandırdım.
- "Qızıl qələm" hansı şərtlərlə verilirdi? Hətta "Qızıl qələm"in pulla satıldığını da iddia edənlər vardı...İddialar haradan qaynaqlanırdı?
- Bu söhbətlər əvvəllər də olub. 2016-cı, 2017-ci illərdə də bu məsələ qalxmışdı. Sadəcə olaraq, Nəşriyyatda (Azərbaycan Nəşriyyatı – red.) ortada gəzən adamlar vardı ki, o işlə məşğul olurdular. Onlar o mükafatı nəyinsə müqabilində verirdilər. Davud Dəmirlini eşitmiş olarsınız.
- Bəli.
- O, çatanın qarşısını kəsib o mükafatı verirdi. Daha bir neçə nəfər şəxsin bu işlə məşğul olduğunu eşitmişdim, amma dəqiqləşdirməmiş ad çəkə bilmərəm. Eşitmişdim ki, bunu bizdən xəbərsiz təqdim edirlər. İndi də bilmirəm kim onları satıb. Bu barədə mətbuatda yazılar getmişdi ki, bu mükafatı filan məblığə satırlar. Amma bizdə elə şey olmayıb, tərəfimizdən kiməsə nəyinsə müqabilində verilməyib. Məsləhət olub ki, filankəsin yaxşı qələmi var, yaxşı yazır, kitabları çıxıb, ona vermək lazımdır, vermişik. Şərt o olub ki, yaxşı yazsın, qələmi yaxşı olsun və sair. Biz sonuncu dəfə "Qızıl qələm"i Kərim Kərimliyə vermişik. Kərim Kərimlinin imzası da mətbuatda kifayət qədər tanınır, peşəkar qələm adamıdır. Bu baxımdan, ola bilsin kimsə haradasa nə isə edib, amma mənim ondan xəbərim yoxdur.
- İndiyə kimi nə qədər adama verilib?
- Hər həftəyə bir nəfərdən hesablasaq, bu, ildə 52 nəfər edir və il ərzində 52 nəfərə "Qızıl qələm" verilib. Bunlar arasında yazıçı da, jurnalist də var. Bizə yazıçılar, jurnalistlər tərəfindən təqdim edilən şəxslər olub biz də onlara diplom vermişik. Biz kor-koranə yoldan keçənə "Qızıl qələm" verməmişik. Amma bu mükafatın verildiyi adamların ümumi sayını bilmirəm. Kütləvi İnformasiya Vasitələri İşçiləri Həmkarlar İttifaqını 1993-cü ildə Oqtay Salamzadə təsis edib, bu mükafatı da bu qurum yaradıb. 2012-ci ildən isə mən həmin təşkilata rəhbərlik edirəm. Biz əvvəllər diplom verənlərin hesablamasını apardıq, sonra dayandırdıq. O vaxt 20-30 nəfər olsaydı böyük iş idi ki, kiməsə təqdim edək. Söz-söhbət olduğu üçün biz 2016, 2017, 2018-ci illərdə bu mükafatın verilməsini dayandırmışdıq.
- Bu mükafatı kifayət qədər adam alıb...İndi bu mükafat dayandırılıb, onun etibarlı olub-olmadığı onu alanları düşündürür. Nə etsin onlar?
- Bu sadəcə yazarlara verilən bir mükafat olub. Təbii ki, o, dövlət səviyyəli bir ödül də deyil, amma "Qızıl qələm"in adı böyük idi. Deyirlər əvvəllər bu adda mükafat çox nüfuzlu olub. Sovet dövründə onun yüksək dəyəri olub. Amma sonradan bəziləri o "Qızıl qələm"i hörmətdən, qiymətdən saldılar. Düşündük ki, bu mükafat nüfuzdan düşdüyünə və ətrafında söz-söhbət yarandığına görə onu dayandıraq.
- Qəribədir, təşkiatın rəhbəri faktiki siz ola-ola necə ola bilər ki, kimlərsə sizdən xəbərsiz "Qızıl qələm"i satsın, yoxsa kiməsə versin? Rəhmətlik Davud müəllim sizin təşkilatda işləyirdi ki?
- Bəli, bizdə müavin idi. Bir neçə dəfə özüm o mükafatın diplomunun "kserokopyalar"ını tapmışdım, kimsə hardansa çıxarıb gətirib. Sadəcə üstünə qələmlə ad yazıb verirdilər. Belə hallar olub. Həm də biz onun fəaliyyətinə nəzarət etmirdik. Ağsaqqal idi. Uzun müddət Azərbaycan mətbuatında çalışmış adam olmuşdu, Sovet dövründə bir neçə mətbuat orqanına rəhbərlik etmişdi, "Kirpi"də də işləmişdi. Biz ona heç nə demirdik. Çox təəssüf ki, "Qızıl qələm"in səviyyəsi düşdü. İndi də düşünürük ki, hər adama verməklə onu gözdən salırıq, bundan heç nə əldə edə bilmərik, adımız da ləkələnir, bu səbəbdən də dayandırdıq.
- İndiyə qədər bu mükafatı hansı səbəbdən daha nüfuzlu bir mükafata çevirə bilmədiniz, ona status ala bilmədiniz?
- Bu təşkilatın adı böyükdür, amma fəaliyyəti yoxdur. Həmkarların fəaliyyəti yoxdur deyə bu təşkilat ciddiyə alınmır. Medianın indiki durumu necədirsə, həmkarlar təşkilatı da o vəziyyətdədir. Biz jurnalistlərlə, media ilə daha sıx işləmək, onlara dəstək göstəmək niyyətində olmuşuq, sadəcə bunun üçün bizim maddi imkanımız olmayıb, büdcəmiz də yoxdur.
- Azərbaycan Mətbuat Şurasının çağırışlarına müsbət yanaşdınız...
- Sosial şəbəkələrdə, müəyyən yerlərdə narazılıqlar edilib ki, bu mükafat lazım olan adamlara verilmir, qələmi olanlar qala-qala qələmi zəif olanlara verilir. Belə narazılıqlar vardı. Azərbaycan Mətbuat Şurasından da bizə bu iradlar bildirildi və tövsiyə olundu ki, biz bu mükafatın təqdim olunmasını dayandıraq.
İradə SARlYEVA
