Təbriz Musayev: "Zəngəzur dəhlizi olmasa, o zaman Qazax-İcevan dəmir yolu da açılmayacaq"
Rusiya Xarici İşlər Nazirliyinin rəsmisi Mariya Zaxarova komunikasiya xətlərinin açılmamasına görə Qərb və Ermənistanı ittiham edib. Onun sözlərinə görə, Ermənistan rəhbərliyinə müqavilələri kağız üzərində yekunlaşdırmağa nəyin mane olduğu çox yaxşı anlaşılır.
Bu, qərbli dostlarının məsləhətidir. Zaxarova vurğulayıb ki, üç ölkə liderinin 2021-ci ilin yanvarında başlatdığı kommunikasiyaların blokdan çıxarılması prosesi hələ də başa çatmayıb: "İrəvan ABŞ və Avropa İttifaqının məsləhəti ilə hərəkət edərək gələcək regional konfiqurasiyadan kənarda qalmaq risqi ilə üzləşir".
Zaxarova onu da qeyd edib ki, Vaşinqton və Brüssel dəfələrlə müəyyən proseslərdə "qarant" kimi çıxış etsə də, heç vaxt uğur əldə etməyib: "Biz yalnız konkret marşrutun yaradılmasının deyil, Cənubi Qafqazda iqtisadi və nəqliyyat kommunikasiyalarının tamamilə blokdan çıxarılmasının tərəfdarıyıq".
"Ermənistanda ekspertlərin Azərbaycanla kommunikasiya xətlərinin açılmasına münasibəti birmənalı deyil"
Sözügedən məsələ ilə bağlı "Bakı-Xəbər"ə açıqlama verən İrəvan Azadlıq Təşkilatının sədri Təbriz Musayev hesab edir ki, Rusiya nəyin baş verdiyinin fərqindədir: "Burada söhbət təkcə Zəngəzur dəhlizinə eksterritorial statusun verilməsinə Ermənistanın qarşı olmasından getmir. Bəli, Ermənistan buna qarşıdır, bu öz yerində. Söhbət həm də ondan gedir ki, Ermənistan ölkədən keçən tranzit yollarına Rusiya Federal Təhlükəsizlik Xidmətinin ümumiyyətlə nəzarət etməsini istəmir. Bunu həm də Qərb istəmir. Çünki Qərb maraqlı deyil ki, Çindən Avropaya daşınan yüklərə hər hansı bir formada Rusiya nəzarət etsin. Ona görə də Zaxarova açıq deyir ki, Qərbin məsləhətinə görə Ermənistan bu addımı atmır. Bu o deməkdir ki, Ermənistan təkbaşına buna qarşı çıxmaq gücündə deyil. Ancaq o da həqiqətdir ki, Ermənistan Zəngəzur dəhlizinə razılıq verməsə, gələcəkdə regional nəqliyyat-tranzit konfiqurasiyadan kənarda qalacaq. Çünki Zəngəzur dəhlizi olmasa, o zaman Qazax-İcevan dəmir yolu da açılmayacaq. Azərbaycan buna imkan verməyəcək. Çünki bizim maraqlarımız təmin olunmursa, o zaman biz niyə güzəştə getməliyik ki? Bir məqamı da qeyd edim ki, Ermənistanda ekspertlərin Azərbaycanla kommunikasiya xətlərin açılmasına münasibəti birmənalı deyil. Revanşist mövqeli ekspertlər qeyd edirlər ki, kommunikasiya yollarının Ermənistan üçün əhəmiyyəti şişirdilir. Bunu onunla əsaslandırırlar ki, 3 milyonluq Ermənistan üçün Gürcüstan və İranla sərhədlərin açıq olması yetərlidir. Onsuz da Ermənistana yüklər əsasən avtomobil yolu ilə daşınır. Əhalinin az olmasını əsas gətirib qeyd edirlər ki, dəmir yolu açılmasa da olar. Ermənistanda Qərbpərəst ekspertlər qeyd edirlər ki, Zəngəzur dəhlizi daha çox Rusiyaya lazımdır. Sanksiyalar səbəbindən Avropaya gedən yollar bağlı olduğu üçün Rusiya bu minvalla nəqliyyat blokadasından çıxmağa çalışır. Ancaq nə desələr də, Ermənistan dəhlizə razılıq verməsə, bundan itirən tərəf onlar olacaq".
Vidadi ORDAHALLI
