Azər Həsrət: "Mehriban xanımın müraciətində xüsusi olaraq humanitar tərəfin vurğulanması..."
"İsrail-Fələstin münaqişə zonasında gərginliyin miqyasının gündən-günə genişlənməsi və daha böyük insan faciəsinə səbəb olması ciddi narahatlıq doğurur. Ürək ağrısı ilə izlədiyimiz dözülməz insan iztirabları hər birimizi dərindən sarsıdır".
Bu fikirlər Birinci xanım Mehriban Əliyevanın noyabrın 15-də İstanbulda keçirilən dövlət və hökumət başçılarının xanımlarının "Fələstin üçün tək ürək" toplantısının iştirakçılarına müraciətində yer alıb.
"Bu silahlı qarşıdurmadan ən çox əziyyət çəkənlərin mülki şəxslər, xüsusilə də qadınlar və uşaqlar olması olduqca üzücüdür. Hərbi əməliyyatların aparılması zamanı beynəlxalq humanitar hüquqa riayət edilməsi zəruridir", - deyən birinci xanım həlak olanların yaxınlarına başsağlığı verib, yaralananların tezliklə şəfa tapmasını diləyib.
Birinci xanımın müraciətində "Azərbaycan hərbi əməliyyatların dərhal dayandırılması ilə bağlı çağırışları dəstəkləyir və son gərginliklə əlaqədar oktyabr ayında BMT Baş Assambleyasında qəbul edilmiş qətnamənin lehinə səs vermişdir. Ölkəmiz beynəlxalq hüquqa və BMT-nin müvafiq qətnamələrinə uyğun olaraq, İsrail-Fələstin münaqişəsinin "iki dövlət" prinsipi əsasında həllinin tərəfdarıdır. 2019-ci ildən etibarən Qoşulmama Hərəkatına sədrliyimiz dövründə Fələstin məsələsinə daim diqqət ayırmışıq. İnanıram ki, bu il Ramallah şəhərində ölkəmizin Təmsilçilik Ofisinin fəaliyyətə başlaması Azərbaycan-Fələstin əlaqələrinin inkişafına təkan verəcəkdir.
Son on il ərzində ölkəmiz BMT-nin Fələstinli Qaçqınlara Yardım və İşlərin Təşkili üzrə Yaxın Şərq Agentliyi xətti ilə dəfələrlə humanitar və maliyyə yardımı göstərmişdir. Eyni zamanda, Azərbaycan Fələstinə siyasi və maliyyə dəstəyinin cəlb edilməsi məqsədilə bir sıra beynəlxalq tədbirlərə ev sahibliyi etmişdir. Bunların sırasında Fələstin Dövlətinə yardım məqsədilə İslam Maliyyə Təhlükəsizlik Şəbəkəsinin təsis konfransını və Qüds şəhərinin inkişafına dəstək məqsədilə donor konfransını qeyd etmək istərdim. Azərbaycan dövlətinin verdiyi təqaüd əsasında fələstinli gənclər ölkəmizdə ali təhsil alırlar. Azərbaycan tərəfindən Fələstində inşa ediləcək məktəb Fələstin xalqına dəstəyimizin növbəti təzahürü olacaqdır.
Geniş səlahiyyətlərə malik beynəlxalq təsisatların üzləşdiyi hazırkı böhran vacib məsələlərin həllini əngəlləyir. Dərin kökləri olan bu böhran başqa bir müzakirə mövzusudur. Qeyd etmək istəyirəm ki, müasir dövrdə hərbi münaqişələrin həll olunmaması böyük ölçüdə beynəlxalq hüququn selektiv şəkildə tətbiq olunmasından irəli gəlir. İkili standartlar və qərəzli yanaşma bu böhranın daha da kəskinləşməsinə şərait yaradır.
İctimai rəyin çaşdırılması və beynəlxalq hüququn manipulyasiyası üçün qərəzli media platformaları vasitəsilə yalan hekayələr yayılır. Bundan daha təhlükəlisi isə mənəvi dəyərlərdən manipulyasiya məqsədilə sui-istifadə olunması hallarıdır.
Ermənistanın Azərbaycana qarşı 30 il davam edən təcavüzü nəticəsində ərazilərimiz işğal olunmuş, bir milyona yaxın soydaşımız öz dədə-baba yurdlarından didərgin düşmüş, 300-dən artıq şəhər və kəndimiz darmadağın edilmiş, dini və mədəni irsimiz dağıdılmışdır. Vaxtilə işğal edilmiş torpaqlarımızda 67 məsciddən 65-i yerlə-yeksan edilmişdir.
Təəssüflə qeyd etmək istərdim ki, BMT Təhlükəsizlik Şurasının 1993-cü ildə qəbul etdiyi 4 qətnaməsi 27 il kağız üzərində qaldı. Azərbaycan 2020-ci ildə 44 günlük Vətən müharibəsində torpaqlarını özü işğaldan azad etdi və bu ilin sentyabr ayında antiterror əməliyyatı ilə Ermənistan silahlı qüvvələrinin qalıqlarının mövcudluğuna və separatizmə son qoyaraq suverenliyini tam bərpa etdi…" kimi diqqətçəkən fikirlər yer alıb.
"...Azərbaycanın belə humanitar məsələlərə biganə olmadığını göstərmiş oldu"
Mehriban Əliyevanın İstanbulda "Fələstin üçün tək ürək" konfransına müraciətində dünyaya hansı mesajlar verilir?
Siyasi şərhçi Azər Həsrət "Bakı-Xəbər"ə "Mehriban xanımın müraciətində xüsusi olaraq humanitar tərəfin vurğulanması, eyni zamanda Azərbaycan dövlətinin Fələstinlə İsrail arasındakı münaqişənin daha məqbul şəkildə çözümünə yönəlik mövqenin vurğulanması diqqətçəkəndir. Əlavə olaraq, Mehriban xanım öz müraciətində Azərbaycanın özünün BMT də daxil olmaqla beynəlxalq platformalarda humanitar məsələləri önə çəkməsi və məsələlərin ümumiyyətlə dinc yolla həlli üçün çalışdığını qeyd edir. Bu nə deməkdir? Bu o deməkdir ki, Azərbaycan dövləti özü də terrordan, ərazi işğalından, müharibədən əziyyət çəkən dövlət kimi Fələstinin və İsrailin nə yaşdığını yaxşı başa düşür"!-deyə bildirdi.
A.Həsrətin fikrincə, buna görə də, Azərbaycan bu əzab-əziyyətlərin çəkilməməsi üçün çalışır, səy göstərir. "Mehriban Əliyeva müraciətində o məsələni ön plana çəkir. Azərbaycanın özünün də məhz erməni işğalından çəkdiyi əziyyət, onun gətirdiyi nəticələr, o nəticələrin aradan qaldırılması üçün həyata keçirilən işlərin diqqətə çatdırılması ilə paralel aparır və eyni zamanda qeyd edir ki, BMT-nin qətnamələri uzun müddət yerinə yetirilməyib və yerinə yetirilmədiyinə görə də bu cür münaqişələr davam edir. Xüsusi olaraq vurğulamaq lazımdır ki, Azərbaycanın Fələstinə humanitar yardımları, ümumiyyətlə Fələstinlə bağlı təşəbbüsləri məsələnin yenə də dinc yolla çözümünə yönəlikdir. Azərbaycanın Fələstində tikəcəyi məktəb humanitar-sosial məsələlərin həlli istiqamətində atılacaq addımlardandır. Ümumilkdə bu müraciətdə biz əsasən humanitar səsləniş, istənilən münaqişəli məsələlərin dinc yolla masa arxasında həllinə çağırış iradəsi görürük. Bütövlükdə onu da qeyd etməliyik ki, Mehriban xanım Azərbaycanın belə humanitar məsələlərə biganə olmadığını göstərmiş oldu. Onun bu müraciəti Azərbaycanın kiçik və ya böyük dövlət olmasından asılı olmayaraq qlobal və regional məsələlərə hər zaman töhfə verməyə çalışmasının vurğulanmasıdır. Düşünürəm ki, biz bu yöndə də davam etməliyik. Müraciətdə də qeyd edildiyi kimi, Azərbaycan iki dövlətli həll yolunun tərəfdarıdır, bunun üçün də əlindən gələni edir"-deyə A.Həsrət bildirdi.
İradə SARIYEVA
