Firdovsi Şahbazov: "İslam irsinə qarşı vandallıq törədən Ermənistanla BƏƏ-nin hərbi sahədə əməkdaşlığı utancvericidir"
Ermənistanın müdafiə naziri Suren Papikyan Birləşmiş Ərəb Əmirliklərinə səfəri zamanı BƏƏ-nin müdafiə naziri Məhəmməd Əhməd Əl Bovardi ilə görüşüb. Nazirlər tərəfdaşlıq məsələlərini müzakirə ediblər.
Bu barədə məlumatı Ermənistan Müdafiə Nazirliyinin mətbuat xidməti yayıb.
Danışıqlarda Ermənistanın yüksək texnologiyalar sənayesi naziri Robert Xaçatryan da iştirak edib. Görüşdə Ermənistan ilə BƏƏ arasında müdafiə sahəsində əməkdaşlığın inkişaf perspektivləri ilə bağlı məsələlər müzakirə edilib. Tərəflər əməkdaşlığın inkişafı, o cümlədən bu əməkdaşlığın hüquqi bazasının yaradılması üçün səylər göstərməyə hazır olduqlarını bildiriblər. Papikyan BƏƏ-yə səfəri çərçivəsində "Dubai Airshow" aviasiya sərgisinin açılışında iştirak edib. Bundan bir neçə gün əvvəl Ermənistan baş naziri Nikol Paşinyan BƏƏ-nin iqtisadiyyat və xarici ticarət üzrə dövlət naziri Əhməd Əli Məhəmməd Əl Sayeqi qəbul edib.
Maraqlıdır, BƏƏ-nin Ermənistanla bu qədər çoxşaxəli əməkdaşlığa maraq göstərməsinin səbəbi nədir? Zatən bu dövlətin Azərbaycanla yüksək səviyyəli əməkdaşlığı var. BƏƏ-nin "Masdar" şirkəti Qaradağ rayonunda külək və günəş elektrik stansiyaları tikib. Nəzərə alsaq ki, Azərbaycan və Ermənistanla sülh sazişi hələ imzalanmayıb, o zaman İrəvanla hərbi sahədə əməkdaşlıq nə deməkdir?
"Bütün bunları nəzərə almadan Ermənistanla yaxınlaşma qəbuledilməzdir"
Məsələ ilə bağlı"Bakı-Xəbər"ə açıqlama verən iqtisad üzrə fəlsəfə doktoru Firdovsi Şahbazov hesab edir ki, BƏƏ-nin Ermənistanla belə hərtərəfli əməkdaşlığa can atmasına anlam vermək çətindir: "Ermənistanın iqtisadi baxımdan elə cəlbediciliyi yoxdur ki, deyəsən ərəb ölkələri bu səbəbdən buna xüsusi maraq göstərir. Ermənistan neft ölkəsi deyil ki, deyəsən BƏƏ orada bu işlərlə məşğul olacaq. Ermənistan Sinqapur kimi böyük nəqliyyat yollarının kəsişməsində yerləşən ölkə deyil ki, o dərəcədə mühüm əhəmiyyət kəsb etsin. Bu gün BƏƏ Azərbaycanda "yaşıl enerji" layihələri ilə bağlı genişmiqyaslı investisiya layihələri həyata keçirir. O cümlədən, digər layihələrdə BƏƏ şirkətləri fəal iştirak edirlər. İki ölkə arasında ticarət dövriyyəsi artır. Bütün bunlara baxmayaraq, BƏƏ-nin Ermənistanla əməkdaşlığa xüsusi maraq göstərməsini anlamaq olmur. İqtisadi əməkdaşlıq azmış kimi, hərbi sahədə də iki ölkənin əməkdaşlığı qəbuledilməzdir. Ən azından ona görə ki, BƏƏ İslam Əməkdaşlıq Təşkilatının üzvüdür və bu qurumun illər öncə Qarabağla bağlı qərarları var. 3 il əvvəl Qarabağ işğaldan azad edilsə də, orada erməni vandallığına məruz qalan müsəlman abidələrini unutmaq olmaz. Bu, bilavasitə islam irsinə qarşı törədilmiş cinayətdir. Belə bir vandallığı törədən Ermənistanla BƏƏ-nin hərbi sahədə əməkdaşlığı utancvericidir. Bu baxımdan BƏƏ İƏT-in qərarlarına hörmət etməli idi. Digər tərəfdən, Azərbaycan ərazilərini işğaldan azad etsə də, Ermənistanla sülh sazişi imzalanmayıb. Hələ bəlli də deyil ki, saziş haçan imzalanacaq. Çünki 3 ildir bu istiqamətdə ortada ciddi nəticə yoxdur. Bütün bunları nəzərə almadan Ermənistanla yaxınlaşma qəbuledilməzdir".
Vidadi ORDAHALLI
