Elşən Mustafayev: "Nəticədə Ermənistan bütün qonşuları ilə münasibətləri daha da korlayacaq"
Qərb Cənubi Qafqazı yenidən böhrana, münaqişəyə sürükləmək istəyir. Rusiyanın daxilindəkı respublikaları "ayağa qaldırmaq" iradəsi nümayiş etdirə bilməyən ABŞ daha həssas bir coğrafiyada - Cənubi Qafqazda yeni təlatümlər yaratmağa çalışır. ABŞ və Qərb bu planı Ermənistanın əli ilə reallaşdırmaq istəyir.
Paşinyan hakimiyyəti Qərbi Ermənistana gətirir. Bu isə regionun iki nəhəngi - İran və Rusiyanın bütün maraqlarına ziddir. Hələ bir müddət əvvəl Ermənistana Avropa İttifaqının (Aİ) müşahidəçi missiyasını dəvət edən Nikol Paşinyan bununla da Rusiya ilə bütün iplərini qoparacağının siqnalını vermişdi. Bu gün isə Aİ missiyasının tərkibinin genişləndirilməsindən söhbət gedir. Maraqlıdır ki, bu missiyanın rəhbəri Almaniyanın keçmiş xarici kəşfiyyat zabiti, müavini isə Fransanın xarici kəşfiyyat xidmətinin əməkdaşıdır. Elə bu iki şəxsin Ermənistanda hansı məqsədlə "müşahidə" apardıqları gün kimi aydındır. Sirr deyil ki, ABŞ və Qərb, xüsusən də Fransa Ermənistan vasitəsilə Rusiyanı regiondan sıxışdırıb çıxarmağa çalışır. Rəsmi İrəvan isə Rusiyaya qarşı bütün sifarişləri dərhal yerinə yetirməyə çalışır. İrəvanın Rusiyaya qarşı xəyanət siyasəti Ermənistanın ictimai rəyində açıq şəkildə etiraf edilir.
Ermənistan Qərbə yaxınlaşmaqla həm Rusiyanı, həm də İranı özündən küsdürməkdə israrlıdır. Regionun nəhəng dövlətləri ilə münasibətləri pisləşdirmək Ermənistanla həmin ölkələrin münasibətlərinin perspektivinə nə vəd edir? Rusiya və İranın Qərbə qarşı birgə siyasəti və Ermənistana sərt cəza tədbirləri nə olacaq?
Təbiidir ki, Avropa İttifaqı belə qərəzli mövqeyi ilə həm də öz vasitəçilik missiyasına kölgə salmış olur.
Politoloq Elşən Mustafayev "Bakı-Xəbər"ə açıqlamasında bildirdi ki, Ermənistanın sadalanan addımları rəsmi Tehranı da narahat etməyə başlayıb: "Son günlər Azərbaycanla İran arasında münasibətlərin istiləşməsi, Tehran rəsmilərinin dilindən Azərbaycanın ərazi bütövlüyü barədə səsləndirilən bəyanatlar da bunu sübut edir. Tehran da İrəvanın niyyətini tam dərk edib. Qərbin, xüsusən də əzəli düşməni ABŞ-ın regionda mövcudluğunu artırması İslam Respublikasında xoş qarşılanmır. Aİ müşahidəçilərinin sərhəddə patrul xidməti adı altında kəşfiyyat materialları toplaması İranda çoxdan bilinir. Təsadüfi deyil ki, İran rəsmiləri dəfələrlə regionda xarici qüvvələrin mövcudluğunu qəbuledilməz adlandırıblar. Bu isə Ermənistana ötürülən mesaj sayılır. Amma İrəvan bu açıqlamanı qulaqardına vurmaqla yanaşı, Aİ müşahidəçi sayını artırmaq qərarına gəlib. Fransadan silah alımı da rəsmi Tehran tərəfindən xoş qarşılanmır. İran region ölkələrinə silah satışında çox maraqlıdır və bazarda yeni rəqibin olmasını qəbul etməyəcək. Hələlik rəsmilər açıq-aşkar narazılıqlarını bildirməsələr də, rəsmi Tehran dəfələrlə regionda, xüsusən də sərhədində xarici qüvvələrin mövcudluğunu qəbul etmədiyini bildirib. Rusiyanın da Ermənistana münasibəti bəllidir. Çox güman ki, Rusiya Ukrayna müharibəsini bitirəndən sonra Ermənistanı daha ciddi cəzalandırmaq fikrinə düşəcək. Ukrayna ilə məsələnin isə növbəti ildə həll ediləcəyi deyilir. Nəticədə Ermənistan bütün qonşuları ilə münasibətləri daha da korlayacaq. Bölgəni əhatə edən bütün gəlir gətirən layihələrdən kənar saxlanılacaq. Türkiyə ilə də münasibətləri yaxşı olmayacaq. Ermənistandan çox-çox uzaqda olan ABŞ və Fransa isə ona yalnız maddi dəstək verə biləcək. Bu isə yetərli deyil. Rusiya fürsətçil Ermənistana daha qəzəblidir. Ermənistan bu mövqeyi ilə özünü daha da uçuruma aparır".
Məhəmmədəli QƏRİBLİ
