İkinci Qarabağ müharibəsindən sonra Azərbaycan Ermənistanla sülh müqaviləsinin imzalanmasında maraqlı olsa da, İrəvanın addımları qarşı tərəfin fərqli mövqedə olduğunu göstərir. Buna bir səbəb də Ermənistanın regionda gərgin vəziyyətin hökm sürməsində maraqlı olan qüvvələr tərəfindən qızışdırılmasıdır. Məsələn, Fransa buna nümunə ola bilər.
Faktdır ki, Ermənistan və ermənilər tarixən Fransa kimi dövlətlərin əlində müxtəlif bölgələrdə alət olublar. Təəssüf doğuran hal ondan ibarətdir ki, digər Qərb qurumları Ermənistana əlavə silahların verilməsinə göz yumur. Qərbin söz sahibi olan nüfuzlu qurumları, dövlətləri qəbul emək istəmirlər ki, bu siyasət Ermənistanın aqressiv iddialarını güclənməsinə gətirib çıxaracaq və bütün regionun sabitliyini təhlükə altına salacaq. Fransanın mövcud müqavilələr əsasında Ermənistana verməkdə olduğu silahlar regionda sabitliyə mənfi təsir edir və sülh prosesini çətinləşdirir. Düzdür, Fransa hərbi texnikası elə də güclü parametrlərə malik deyil. Bunu Fransanın "Ouest-France" portalında "Fransa Ermənistana "Bastion" tipli maşınlar çatdırıb" sərlövhəli məqalədə yer alan fikirlər də təsdiq edir. Burada qeyd edilir ki, Ukrayna fransız hərbi texnikasının zəifliyini dilə gətirərək, "Arquus" şirkətinin istehsalı olan "Bastion" zirehli maşınlarından imtina edib. Fransa isə bu ziyandan qurtulmaq üçün həmin zirehli maşınları Ermənistana göndərib. Məqalədə bildirilir ki, "Arquus" şirkəti tərəfindən istehsal olunan "Bastion" tipli yüngül zirehli maşınlar əvvəlcə Ukrayna üçün nəzərdə tutulurdu. Lakin Kiyev artilleriya atəşi və tank əleyhinə raketlərdən qorunmaq üçün həmin maşınların çox zəif olduğunu bildirərək onlardan imtina edib. Paris isə Ukraynanın zəif hesab etdiyi həmin maşınları himayədarlıq etdiyi Ermənistana göndərib. Bu maşınların Gürcüstanın Poti limanından keçərək dəmir yolu ilə Ermənistana tərəf aparıldığı bildirilir.
Həmçinin məqalədə Fransa xarici işlər nazirinin Ermənistana səfəri, səfər zamanı Parisin bu ölkəyə hərbi texnika çatdırılmasına razılıq verməsi, eləcə də Ermənistan müdafiə nazirinin Fransaya səfəri, bu səfər çərçivəsində bir neçə sazişin imzalanmasından bəhs edilib. Nəşr sonda qeyd edib ki, Azərbaycan Xarici İşlər Nazirliyi Fransanın Ermənistana zirehli texnika tədarükünü pisləyib və Fransanın bu addımının regionda vəziyyəti gərginləşməyə doğru aparacağını bildirib. Xatırladaq ki, Fransa İkinci Qarabağ müharibəsində və sonrakı müddətdə Ermənistanı silahlandıraraq bölgədə qarşıdurmanı gücləndirməyə çoxsaylı cəhdlər edib. Indi də Fransa iki ölkə arasında gərginliyi qoruyub saxlamaq siyasəti yürüdür, Azərbaycan və Ermənistan liderlərinin Avropa İttifaqının vasitəçiliyi ilə gedən sülh danışıqlarını pozmaq istiqamətində addımlar atmaqdadır. Avropa İttifaqının sərt məhdudiyyət qaydalarına baxmayaraq, Paris birtərəfli qaydada Ermənistanı silahlandırmaq kimi çirkin planını həyata keçirməyə çalışır. Azərbaycan isə bütün bunlara seyrçi qala bilməz.
Ölkəmiz Ermənistan üzərində hərbi üstünlüyünü qoruyub saxlamaq istiqamətində zəruri addımlar atır. Belə ki, yayılan məlumata əsasən, Azərbaycan 1,2 milyard ABŞ dolları dəyərində müqavilə ilə İsraildən əlavə İsrail istehsalı olan "Barak MX" hava hücumundan müdafiə sistemləri almağa qərar verib. Bu barədə məlumat yayan "Defence Industry Europe" saytı qeyd edir: "Bir neçə ay əvvəl "Defence Industry Europe" tərəfindən bildirildiyi kimi, "Israel Aerospace Industries" (IAI) Azərbaycanda "Barak MX" sistemlərinin uğurlu nümayişini həyata keçirib. İsrail Azərbaycana müdafiə sistemlərinin əsas tədarükçüsüdür. Bunlardan Ermənistanla son vaxtlar intensivləşən münaqişədə çox istifadə olunub". Sayt bildirir ki, Azərbaycanın rəsmi məlumatına görə, sınaq bu çox təkmil sistemin müxtəlif versiyalarının çoxlu buraxılışını əhatə edib. Sayt əlavə edib ki, "Israel Aerospace Industries" hava hücumundan müdafiə sisteminin bəzi versiyaları Azərbaycanda bir neçə ildir ki, fəaliyyət göstərir, lakin bu yaxınlarda keçirilən nümayişdə ən son təkmilləşdirilmiş versiyalardan bəziləri var. "Barak MX" modul tipli hava hücumundan müdafiə sistemidir, raket və təyyarə təhlükələrini aradan qaldırmaq üçün nəzərdə tutulub. O, həm dəniz platformalarında, həm də quruda fəaliyyət göstərir və "Barak" raket ailəsinə aiddir. "Barak MX" sistemi istənilən mövcud və yeni sensorlarla sadə inteqrasiyaya qadirdir. Bütün "Barak MX Land Deployable" komponentləri daimi infrastrukturdan idarə oluna və ya yük maşınına quraşdırıla və müvəqqəti əməliyyat sahələrinə yerləşdirilə bilər.
"Israel Aerospace Industries"in məlumatına görə, "Barak MX"in innovativ, proqrama əsaslanan modul yanaşması əməliyyatda təhdidlərə sadə uyğunlaşmanı təmin edərək istənilən hava şəraitində, gecə-gündüz fəaliyyət göstərir. Azərbaycanın rəsmi qurumları bu xəbəri hələ təsdiq etməyib. Bununla yanaşı, Azərbaycan Müdafiə Nazirliyinin bir müddət əvvəl yaydığı məlumatda deyilir ki, 2023-cü ilin hazırlıq planına əsasən Hərbi Hava Qüvvələrinin Hava Hücumundan Müdafiə bölmələri Barak raket ailəsinə daxil olan "Barak 8-ER" Zenit Raket Kompleksindən atışları icra edib: "Atış çalışmalarında döyüş heyətləri tərəfindən "Barak 8-ER" Zenit Raket Kompleksinin start mövqeyinə çıxarılması və döyüş tətbiqinə hazırlanması, eləcə də şərti düşmən tərəfindən atılan ballistik raketin aşkar olunaraq məhv edilməsi üzrə tapşırıqlar uğurla yerinə yetirilib".
Ramil QULİYEV
