Paşinyan ötən ay MDB-nin Bişkek zirvəsindən imtina edəndən sonra Mirzoyan MDB Xİ nazirlərinin görüşündən, Qriqoryan isə Təhlükəsizlik Şuraları katiblərinin görüşündən imtina etmişdi. Proses davamlı şəkil almaqdadır. Baş nazir Paşinyan noyabrın 23-ə planlaşdırılmış MDB dövlət başçılarının Minsk zirvəsindən də imtina etdi...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
- Paşinyanın və digər erməni rəsmilərinin bu addımları Ermənistanın getdikcə Rusiyanın orbitindən çıxmaq cəhdlərinin bariz nümunəsi kimi özünü göstərir. Paşinyanın bu cəhdlərlə nəyə nail olacağı gələcəyin işidir. Fakt budur ki, Paşinyan Rusiyadan uzaqlaşmasını artıq siyasi iradə kimi ortaya qoyub. Bu müddətdə Paşinyanın müxtəlif Avropa paytaxtlarında çeşidli tədbirlərə qatılması da fakt kimi diqqəti çəkir. Bizim Prezident İlham Əliyev dəqiq eyham etmişdi ki, Qranadaya saatlarla uçan Paşinyan Bişkekə bir neçə saatlıq uçuş məsafəsini qət etməyə "can çəkdi". Həm də tək Qranadaya yox, Parisə, Almaniyaya, digər "cici-bacılarının" yanına həvəslə uçdu...
Bu səfərlərin və bölgəmizə Fransanın, Kanadanın, Amerikanın hərbi qüvvələrini gətirməsinin ardınca Minsk zirvəsindən imtina edən Paşinyanın siyasətinə Peskovun qiymət verməsi çox "infantil" görünür. Peskov deyir: "Fikir mübadiləsi, saatların tutuşdurulması üçün yaxşı fürsət idi". Baxın, Paşinyan Cənubi Qafqaz bölgəsində Rusiyanın təhlükəsizlik və geosiyasi maraq sxemlərini "kərpic- kərpic" sökür, Peskov uyğunsuz bir əda ilə "saat tutuşdurur"... Eyni sözləri İranın da sükutu barədə demək olar. Sanki Paşinyanın bölgəyə NATO qüvvələrini gətirməsi İranı heç narahat etmirmiş... Ancaq qətiyyən belə deyil və Paşinyan İranın da "altına bombaları döşəməklə" məşğuldur...
Azərbaycan Prezidentinin Vətən müharibəsi və Antiterror tədbiri ilə regionda yaratdığı reallıqların daha biri göz önündədir. Ənənəvi və azı 150-200 illik regional geosiyasət vektorları dəyişilir. Azərbaycan dəyişdirir...
İran bir vaxtlar Ermənistan üçün ölməyə də hazır idi, hələ bu hazırlıq tam şəkildə ortadan qalxmasa da, İran- Ermənistan strateji müttəfiqliyi ağır zədə alıb. Rusiya- Ermənistan münasibətləri də bu vəziyyətdədir. Hər istiqamətdə münasibətlər çat verir, gündən-günə çatlar genişlənir. Təkcə bu iki fakt regionumuzdakı ənənəvi geosiyasət vektorlarının ciddi dəyişiklik ərəfəsində olduğunu göstərir.
Kimsə düşünməsin ki, Azərbaycan diplomatiyası Rusiya- Ermənistan və Ermənistan-İran münasibətlərini məqsədyönlü şəkildə pozdu. Xeyr, Azərbaycanın bu yöndə heç bir xüsusi səy, siyasət yürütməsini kimsə sübut edə bilməz. İlham Əliyev sadəcə hər bir bacarıqlı və ölkəsini sevən dövlət başçısına xas siyasət sərgilədi ki, bizim torpaqlarımız işğaldan tam azad olsun və suverenlik tam bərpa olunsun. Bu hədəflər yüksək peşəkarlıqla vuruldu və erməni işğalçılar çoxları üçün inanılmaz bir şəkildə torpaqlarımızdan çıxarıldı. İndi Prezident İlham Əliyevin nə "günahı" var ki, bəzi qonşu ölkələr Ermənistanın işğal siyasətinin dəstəkçiləri oldular və Azərbaycan öz haqlarını döyüşə-döyüşə əldə edəndən sonra Ermənistan özünün dünənki dostlarına düşmən kəsildi ki, niyə "Azərbaycanın bizi diz çökdürməsinə imkan verdiniz"... Bu Azərbaycanın günahı deyildi ki...
Tahir TAĞIYEV
