Məhərrəm Zülfüqarlı: "Tədbirdə ölkəmizə yönəlik tənqidlərdə məqsəd Azərbaycana siyasi təzyiq göstərməkdir"
Məlum olduğu kimi, noyabrın 10-da 6-cı Paris Sülh Konfransı keçirilib. Sülh adı altında keçirilən konfransda adına uyğun olaraq sülh çağırışları, təşəbbüsləri yox, faktiki olaraq müharibə çağırışları səslənib.
Çağırışları həm Ermənistan, həm də Fransa rəsmiləri Azərbaycana qarşı ünvanlayıb. Ermənistan baş naziri Nikol Paşinyan 6-cı Paris Sülh Konfransının panel müzakirələrində növbəti dəfə əsassız iddialar səsləndirib.
Adından da göründüyü kimi, əslində bu, sülhə xidmət edən bir tədbir olmalı idi. Ancaq həmin tədbirdə həm təcavüzkar Ermənistan, həm də ölkəmizə qarşı qərəzli mövqe tutan Fransa rəsmiləri yenə də Azərbaycan əleyhinə həqiqətə uyğun olmayan ənənəvi fikirlər səsləndiriblər. Digər tərəfdən, bu gün Fransanın dünyada imici kəskin şəkildə aşağı düşüb. Ən azından son aylar Fransanın timsalında Afrika ölkələrində yaşanan biabırçılıq bunu deməyə əsas verir. Faktiki olaraq, Fransa mərhələli şəkildə Afrika ölkələrindən qovulur. Bütün bunların fonunda, Fransa hansı mənəvi-siyasi haqla "Beynəlxalq Sülh Konfransına" ev sahibliyi edə bilər?
"Müstəmləkə keçmişi olan, Afrika və Asiyada soyqırımlar törədən Fransanın belə bir tədbirə ev sahibliyi etməyə mənəvi haqqı yoxdur"
Məsələ ilə bağlı "Bakı-Xəbər"ə açıqlama verən AVCİYA-nın vitse-prezidenti, professor Məhərrəm Zülfüqarlı hesab edir ki, Fransanın buna siyasi-mənəvi haqqı yoxdur: "Əvvəla, Qərbi Avropa ölkələrində keçirilən belə tədbirlərin çox zaman mahiyyəti ilə forması uyğun gəlmir. Məsələn, 1993-cü ildə BMT Təhlükəsizlik Şurası işğal olunmuş ərazilərimizlə bağlı 4 qətnamə qəbul etdi. İşğal dövründə Azərbaycan dəfələrlə bu qətnamələrin yerinə yetirilməsini tələb etdi. Ancaq buna əhəmiyyət verən olmadı. O cümlədən, Fransa başda olmaqla bəzi Avropa ölkələri bunu görməzdən gəldi. Müharibəyə qədər sadəlövhcəsinə hesab edirdik ki, bu qətnamələr bizim xeyrimizədir və bunlar problemin həllinə yönəlib. Ancaq məlum oldu ki, bu heç də belə deyilmiş. Ən başlıcası, həmin qətnamələrin heç birində Ermənistan Respublikası işğalçı tərəf kimi göstərilmədi. Qətnamələrdə söhbət yalnız Qarabağdakı etnik ermənilərdən gedirdi. Üstəlik, Qarabağdaki erməniləri bizə tərəf kimi sırımağa çalışırdılar. Yəni faktiki, bu qətnamələr bizim əleyhimizə idi. Qeyd edilirdi ki, Azərbaycan Qarabağ erməniləri ilə danışıqlar aparıb ərazilərin azad edilməsinə nail olmalıdır. Faktiki olaraq bu o demək idi ki, biz Qarabağ ermənilərini tərəf kimi tanıyacağıq. Daha sonra dünya onları tanıyacaq. Ancaq Vətən müharibəsi və əldə etdiyimiz qələbə bütün məkrli planların üstündən xətt çəkdi. Ondan sonra bir sıra ölkələrin, əsasən də Fransanın iç üzü açıldı. Məlum oldu ki, ərazilərimizin azad olunmasından Fransa Ermənistandan daha çox narahatdır. Müstəmləkə keçmişi olan, Afrika və Asiyada soyqırımlar törədən Fransanın belə bir tədbirə ev sahibliyi etməyə mənəvi haqqı yoxdur. Çünki bununla bağlı çoxsaylı tarixi faktlar var. Fransa törətdiyi söyqırımlara görə heç üzr də istəməyib. Azərbaycanın iştirak etmədiyi tədbirdə ölkəmizin hədəf alınması simasızlıqdır. Tədbirdə ölkəmizə yönəlik tənqidlərdə məqsəd Azərbaycana siyasi təzyiq göstərməkdir. Ona görə də biz belə tədbirlərə fikir verməməli və öz işimizdə olmalıyıq. Yəni güclü olmalıyıq".
Vidadi ORDAHALLI
