Şəmsəddin Əliyev: "Ermənilərin xeyrinə hansısa addım atılarsa, bu bir daha BMT-nin hansısa lobbilərin əlində oyuncağa çevrildiyinin təsdiqi olacaq"
Noyabrın 17- də Beynəlxalq Haaqa məhləməsinin Ermənistanın bu il sentyabrın 28-də Azərbaycana qarşı qaldırdığı iddia üzrə qərar verəcəyi gözlənilir. Ermənistan sentyabrın 20-dən sonra guya ermənilərin Qarabağdan zorla qovulduğu və hüquqlarının pozulduğu iddiası ilə Azərbaycan barədə tədbir görməyi Məhkəmədən istəyib.
Ermənilər neçə dəfə dalbadal Azərbaycana qarşı qərar çıxartdırmaq iddiasında iflasa uğrayıblar. Antiterror tədbirlərindən sonra BMT 2 dəfə Qarabağa missiya göndərib və hər iki missiya ermənilərə qarşı heç bir zorakılığın edilmədiyini aydın şəkildə bəyan edibsə, məhkəmə ermənilərin xeyrinə hansı qərarı verə bilər?
Hüquqşünas Şəmsəddin Əliyev "Bakı-Xəbər"ə açıqlamasında bildirdi ki, belə bir vəziyyətlə bağlı təəssüf hissi keçirir: "Əslində Haaqa Məhkəməsi öz yurisdiksiyasına uyğun olan məsələni icraatına götürməlidir. 30 il ərzində ermənilərin bizə qarşı həyata keçirdiyi etnik təmizləmə siyasətinə niyə qiymət vermir? Onlar bizi tam genosid etməyi qarşılarına məqsəd olaraq qoymuşdular. Bəzi obyektiv səbəblərə görə məqsədlərinə nail ola bilmədilər. Ermənilər bizim ərazilərimizi qarış-qarış minalayıblar. Burda da məqsəd bizi kütləvi məhv olmaya aparmaqdır. Bütün bunlarla bağlı BMT-nin özü əlahiddə bir hərbi tribunal yaradıb, nasist Almaniya ilə bağlı atdığı addıma uyğun mövqe sərgiləməliydi. Çox təəssüf ki, bu cür ciddi dəlilləri araşdırmaq əvəzinə onlar, güya ermənilərin Qarabağdan zorla köçürüldüyünü araşdırmaq qərarına gəliblər. BMT-nin missiyası iki dəfə bölgədə olub. Erməni əsilli vətəndaşların zorla bölgədən çıxarıldığının şahidi olmadılar. Bununla bağlı BMT-yə geniş arayış da təqdim ediblər. Ermənilərin xeyrinə hansısa addım atılarsa, bu bir daha BMT-nin hansısa lobbilərin əlində oyuncağa çevrildiyinin təsdiqi olacaq. Biz də öz növbəmizdə sakit durmamalıyıq. Ermənistanın törətdiyi vəhşiliklərlə bağlı bütün beynəlxalq məhkəmə instansiyalarına şikayətlər ünvanlamalıyıq. Bütün dünyaya bəllidir ki, bizim təqdim etdiyimiz faktlar reallığı əks etdirir. Dünyada qeyri-obyektivliyə söykənilən addımlar çox atılır. Biz bunu BMT-dən görmək istəməzdik. Ermənilər məğlubiyyətlə barışmaq istəmədikləri üçün belə iftiralara əl atırlar. Hətta hər hansı yanlış qərar qəbul etsələr belə, istəklərinə nail ola bilməyəcəklər".
Azərbaycan xarici işlər nazirinin müavini Elnur Məmmədov bildirib ki, Bakı Dağlıq Qarabağla bağlı "min səhifəlik sübuta" əsaslanaraq İrəvana qarşı Beynəlxalq Cinayət Məhkəməsində (ICC) iddia qaldırıb.
Haaqa Məhkəməsinə müraciət edən Azərbaycan və Ermənistan bir-birini "İrqi ayrıseçkiliyin bütün formalarının ləğv edilməsi haqqında" beynəlxalq Konvensiyanın (CERD) pozulmasında ittiham ediblər.
Bu ilin fevral ayında Beynəlxalq Ədalət Məhkəməsi Azərbaycan və Ermənistanın bir-birinə qarşı iddiaları ilə bağlı qərar qəbul edib.
Azərbaycan Laçın dəhlizi üzərindən maneəsiz hərəkətin bərpası üçün əlində olan bütün imkanlardan istifadə etməlidir, məhkəmənin qərarında deyilir.
Ermənistanın Azərbaycana qarşı müvəqqəti tədbirlər barədə iddiası ilə bağlı çıxarılan qərarı Haaqa Sülh Sarayında hakim Joan Donoghue elan edib.
Məhəmmədəli QƏRİBLİ
