Azərbaycan dövlətinin dünya və region dövlətləri, eləcə də beynəlxalq təşkilatlarla əməkdaşlıq əlaqələri çox yüksək səviyyədə inkişaf edir. Məlumdur ki, dövlətimiz region dövlətləri ilə müxtəlif əməkdaşlıq platformalarında bir araya gəlir və öz faydalı, səmərəli addımları ilə iqtisadi, siyasi töhfələrini ortaya qoyur.
Xüsusən də region ölkələrini özündə birləşdirən təşkilatların işində Azərbaycanın fəallığı diqqəti çəkir.
Azərbaycan həm türk dünyasında sarsılmaz birliyinin ifadəsi olan Türk Dövlətləri Təşkilatının (TDT) işində fəal iştirak edir, həm də region ölkələrini özündə birləşdirən, çox böyük resurs və potensiala malik qurumlardan biri olan İqtisadi Əməkdaşlıq Təşkilatının üzvü kimi öz aktivliyi ilə seçilir. Noyabrda Azərbaycan hər iki təşkilatın keçirdiyi böyük tədbirlərdə təmsil olunub.
"Türk dövlətləri ilə münasibətlərin möhkəmləndirilməsi Azərbaycanın xarici siyasətinin əsas prioritetlərindən biridir"
Bildiyimiz kimi, noyabrın 3-də Qazaxıstanın paytaxtı Astanada Türk Dövlətləri Təşkilatının (TDT) "Türk Əsri" çağırışı altında 10-cu yubiley Zirvə görüşü keçirildi. Yubiley Zirvə görüşü Türk dünyasında əlaqələrin daha da genişləndirilməsi və möhkəmləndirilməsi niyyətinin növbəti nümunəsi olaraq diqqəti çəkdi. Ekspertlərə görə, son illərdə Türk dövlətləri arasında əlaqələr bütün sahələrdə intensiv xarakter alıb və dövrün tələblərinə, baş verən proseslərə uyğun olaraq sürətlə inkişaf etdirilir. Türk Dövlətləri Təşkilatına üzv ölkələrlə əlaqələrin bütün sahələrdə möhkəmləndirilməsi Azərbaycanın xarici siyasətinin əsas prioritetlərindən biridir. Bu fikir də ekspertlərə aiddir. Qazaxıstanın paytaxtı Astanada keçirilən TDT-nın "Türk Əsri" çağırışı altında 10-cu yubiley Zirvə görüşü olduqca məhsuldar və yadda qalan oldu. Zirvə görüşündə ötənilki sammitdən keçən dövr ərzində görülmüş işlər və əldə olunmuş nailiyyətləri qiymətləndirildi, təşkilatın inkişafı və fəaliyyətinin daha da genişləndirilməsi istiqamətində fikir mübadiləsi aparıldı. Zirvə görüşündə TDT-də müşahidəçi üzv statusuna malik ölkələrin də dövlət və hökumət başçıları iştirak etdilər. TDT-nin 10-cu yubiley sammitində dövlət başçıları müxtəlif sahələr üzrə əsas məsələlərə dair qərarlar qəbul etdilər, sazişləri yekunlaşdıracaq, üzv və müşahidəçi dövlətlər arasında çoxtərəfli əməkdaşlığın əsas aspektlərini nəzərdən keçirdilər.
Türk Dövlətləri Təşkilatının (TDT) növbəti, XI Zirvə görüşü 2024-cü ildə Qırğızıstanda keçiriləcək. Bu barədə qərar TDT ölkələri liderlərinin noyabrın 3-də Qazaxıstanın paytaxtı Astanada keçirilən 10-cu yubiley Zirvə görüşündə qəbul olunub.
"...Türk dövlətləri ilə münasibətlərin möhkəmləndirilməsi Azərbaycanın xarici siyasətinin əsas prioritetlərindən biridir. Etnik və mədəni köklərimiz, dilimiz, ortaq keçmişimiz münasibətlərimizin təməlini təşkil edir. 2009-cu ildə Naxçıvan Zirvə görüşündən ötən müddət ərzində müxtəlif sahələrdə əməkdaşlığımız təsisatlanıb, Türk Dövlətləri Təşkilatı uğurlu inkişaf yolu keçib. Bu gün təşkilatımız beynəlxalq səviyyədə böyük siyasi çəkiyə və nüfuza malikdir". Bu fikri Azərbaycan Prezidenti İlham Əliyev Türk Dövlətləri Təşkilatının "Türk Əsri" çağırışı altında noyabrın 3-də Astanada keçirilən 10-cu yubiley Zirvə görüşündə çıxışında deyib.
Uğurlu diplomatiyanın nəticələri...
Azərbaycanın xarici siyasətində mühüm yer tutan bu məsələ çox böyük uğurla özünü ifadə edir. Dövlətimiz əldə etdiyi yüksək iqtisadi nailiyyətləri bu kimi regional platformalarda nümayiş etdirir. Ekspertlər hesab edir ki, Azərbaycan tərəfdaşlığa olan sadiqliyini və qarşılıqlı hörmətə, etimada əsaslanan əməkdaşlığı davam etdirərək, bir daha dünya siyasətinə davamlı iqtisadi inkişafa nail olmağın yollarını göstərir.
Bildiyimiz kimi, bu ilin 9 noyabrında Özbəkistanda İqtisadi Əməkdaşlıq Təşkilatının (ECO) keçirilən 16-cı Zirvə toplantısı keçirildi və Prezident İlham Əliyev də qardaş ölkədə keçirilən bu zirvə toplantısında iştirak etdi. Özbəkistanda keçirilən ECO-nun 16-cı Zirvə toplantısında çıxış edən Prezident İlham Əliyev İqtisadi Əməkdaşlıq Təşkilatı ilə əməkdaşlıqdan məmnunluq duyduyğunu dilə gətirirdi: "...Azərbaycanın nəqliyyat və logistika infrastrukturu ECO-nun üzv dövlətləri üçün açıqdır. Son illərdə Azərbaycan özünün nəqliyyat infrastrukturuna milyardlarla ABŞ dolları həcmində sərmayə qoyub və Avrasiyanın Şərq-Qərb və Şimal-Cənub nəqliyyat dəhlizləri üzərində yerləşən nəqliyyat və logistika mərkəzlərindən birinə çevrilib. Hər iki dəhlizin Azərbaycandan keçən hissələri tam hazırdır. Biz hazırda bu dəhlizlər boyu dəmiryolu xətlərinin yükaşırma qabiliyyətinin genişləndirilməsi üzərində işləyirik. Son 20 il ərzində Azərbaycan iqtisadiyyatına 310 milyard ABŞ dolları həcmində sərmayə qoyulub və bunun 200 milyard dolları qeyri-neft sektorunun payına düşür. Bu, ölkəmizdə olan münbit sərmayə iqliminin nəticəsidir.
Məmnuniyyətlə qeyd etmək istərdik ki, Azərbaycan ECO-nun Təmiz Enerji Mərkəzinin ev sahibi kimi rəsmi olaraq təsdiqlənib..." - deyə Azərbaycan Prezidenti vurğulayırdı.
"Çıxışımın sonunda vurğulamaq istərdim ki, Azərbaycan ECO-nun üzv dövlətləri ilə ikitərəfli və çoxtərəfli əməkdaşlığı daha da genişləndirməkdə qərarlıdır və təşkilatın növbəti Zirvə görüşünə ev sahibliyi etməyə hazırdır". Bu fikri də Azərbaycan Prezidenti sözügedən zirvə toplantısında qeyd etmişdi.
Milli Məclisin deputatı Məzahir Əfəndiyev ECO-nun qardaş ölkədə keçirilən zirvə toplantısı ilə bağlı mətbuata maraqlı şərh verib: "... Bu baxımdan 9 noyabr 2023-cü il tarixində Prezident İlham Əliyevin qardaş Özbəkistana rəsmi səfəri, İqtisadi Əməkdaşlıq Təşkilatının (ECO) keçirilən16-cı Zirvə toplantısında iştirakı, daha sonra orada təşkilata üzv dövlətlərin başçıları ilə ECO-nun gələcək fəaliyyət istiqamətlərini müəyyən edən bir sıra ikitərəfli görüşlərinin baş tutması ölkəmizin təşkilat üçün əhəmiyyətini ortaya qoydu, habelə enerji təhlükəsizliyi, regional inteqrasiya və sosial-iqtisadi inkişaf sahələrində üzərinə düşən gördüyü ardıcıl işlərin məntiqi nəticəsidir".
Azərbaycan Prezidentinin, bütövlükdə Azərbaycanın Qazaxıstanda keçirilən Türk Dövlətləri Təşkilatının "Türk Əsri" çağırışı altında 10-cu yubiley Zirvə görüşündə və Özbəkisianda keçirilən İqtisadi Əməkdaşdaşlıq Təşkilatının 16-cı Zirvə görüşündə təmsil olunması və dövlətimizin əsas hədəflərini bəyan etməsi, əməkdaşlıq istiqamətdində addımlar atması bizim dövlətimizin xarici siyasətinin böyük uğurudur. Heç şübhəsiz ki, bu amillər Azərbaycanın region dövlətləri ilə inteqrasiyası baxımından çox mühüm göstəricidir, bu türk dövlətləri arasında əməkdaşlıq əlaqələrini daha da dərinləşdirir.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
