Musa Qasımlı: "Ermənistanın baş naziri Nikol Paşinyanın Parisdə söylədikləri başdan-ayağa cəfəngiyatdır, uydurmadır"
Ermənistanın Baş naziri Nikol Paşinyan ayağını Parisə qoyan kimi Fransa prezidenti E.Makronun dəstəyindən "vəcdə" gələrək növbəti dəfə yalan danışıb və Azərbaycana qarşı həqiqətə uyğun olmayan fikirlər səsləndirib.
Ermənistanın baş naziri N.Paşinyan 6-cı Paris Sülh Forumu çərçivəsində keçirilən panel müzakirələri zamanı ölkəmizə iftira atıb və yalandan iddia edib ki, Azərbaycanın "etnik təmizləmə" "siyasəti" nəticəsində guya 500 min nəfər erməni Azərbaycandan "qovulub".
Paşinyan əsassız olaraq deyib ki, guya 500 min erməni "etnik təmizləmə" "nəticəsində" "qaçqın" düşüb. Baş nazirin yalanlarına görə, guya onların 360 minə yaxını 1990-cı ildə Sumqayıt və Bakıdan, bir qisimi Naxçıvandan və Azərbaycanın başqa yerlərindən "zorla qovulub". Baş nazir deyib ki, guya 26 minə yaxın nəfər erməni 44 günlük müharibə zamanı, 105 min nəfəri isə sentyabrın 19-da keçirilən antiterror tədbirlərindən sonra Qarabağı tərk edib. Paşinyanın yalan danışdığını, şişirtmə rəqəmlər söylədiyini nəinki biz bilirik, hətta bunu Makron özü də, ermənilər də çox yaxşı bilirlər. Ümumiyyətlə, 500 min rəqəmənin özü çox şübhəlidir.
Paşinyan daha sonra beynəlxalq ictimaiyyəti qınayıb ki, guya beynəlxalq ictimaiyyət adekvat tədbirlər həyata keçirə bilməyib. Paşinyan deyib ki, Azərbaycan Ermənistan Respublikasını "Qərbi Azərbaycan" adlandırmağa başlayıb. Ermənistanın baş naziri iddia edib ki, guya bu, Azərbaycan tərəfindən "yeni ərazi iddiasıdır, Ermənistana gələcək hücumun əsasını təşkil edir".
"Bu gün Ermənistanda bir nəfər də olsun azərbaycanlı qalmayıb"
Ermənistanın baş nazirinin iddialarına münasibət bildirən millət vəkili Musa Qasımlı "Bakı-Xəbər"ə şərhində "Ermənistanın baş naziri Nikol Paşinyanın Parisdə söylədikləri başdan-ayağa cəfəngiyatdır, uydurmadır. İlk növbədə ona görə ki, Paşinyan bu sözləri söylərkən bir zamanlar əhalisinin 50 faizdən çoxu azərbaycanlı olan Ermənistandakı indiki mənzərəyə diqqət yetirməli idi. Bu gün Ermənistanda bir nəfər də olsun azərbaycanlı qalmayıb. Onların vəhşicəsinə qovulması nəticəsində bir çoxu həyatını itirib, malı-mülkü indi Ermənistan adlanan Qərbi Azərbaycan ərazisində qalıb. Bu gün Ermənistan monoetnik bir dövlətdir. Ermənistan etnik təmizləməni təkcə azərbaycanlılara qarşı aparmayıb, bu gün Ermənistanda antisemitizm ən yüksək səviyyədədir. Ermənistanda ruslar sıxışdırılır, digər millətlərin nümayəndələri yoxdur"-deyə bildirdi.
M.Qasımlının sözlərinə görə, Azərbaycandan gedən ermənilər bir vaxtlar Çar Rusiyası tərəfindən və sonralar Sovet hökumətinin gətirib məskunlaşdırdığı, yerləşdirdikləri ermənilər olub: "Heç kim onları qovmayıb, onlar özləri gedib. Harada görülüb ki, qovulan adam özü rahat maşınına oturub getsin və yolda da onlara su, şirə, kökə, çörək verilsin? Bu başdan-başa uydurmadır. Əgər Azərbaycan "etnik təmizləmə" aparsaydı bu gün Azərbaycan ərazisində erməni yaşayardımı? Qətiyyən yaşamazdı. Amma bu gün Azərbaycan ərazisində erməni vətəndaşlarımız vardır.
Ermənistanın Qərbi Azərbaycan adlandırılması ilə bağlı məsələyə gələndə, mən heç bir başqa xəritəni demirəm, Paşinyan 1903-cü ildə Rusiya imperatorluğunun Qafqaz Hərbi Dairəsinin topoqrafika şöbəsinin çəkdiyi xəritəni qarşısına qoyub baxsın, görsün orada ermənicə bir toponim varmı? Tapa bilməz. Ermənilər bu regiona gəlmədilər, aborigen deyillər. Paşinyanın söylədikləri cəfəngiyatdan başqa bir şey deyil. Belə olduqda soruşulur, bəs Paşinyan bunu nə üçün edir? Paşinyanın məqsədi sülh müqaviləsinin imzalanmasını yubatmaqdır, Ermənistanı silahlandırmaqdır və nə vaxtsa əlverişli bir şəraitin yaranacağını gözləyir. Amma hesab edirəm ki, Paşinyan xam xəyaldadır"- deyə millət vəkili qeyd etdi.
İradə SARIYEVA
