Rizvan Hüseynov: "...Bir fürsət idi ki, Azərbaycan tərəfi UNESCO-nun baş qərərgahının ofisində şəxsən Odre Azuleyə öz mövqeyini çatdırdı"
Azərbaycan xarici işlər nazirinin müavini, UNESCO-nun Baş Konfransının 42-ci sessiyası çərçivəsində ölkəmizi təmsil edən nümayəndə heyətinin rəhbəri Elnur Məmmədov UNESCO-nun Baş Direktoru Odre Azule ilə görüşdə bir sıra məsələlərdən bəhs edib.
Elnur Məmmədov Azərbaycanın işğaldan azad edilmiş ərazilərində, həmçinin indiki Ermənistan ərazisində ölkəmizə məxsus mədəni irsin məqsədli şəkildə dağıdıldığını və talan edildiyini qeyd edərək, indiki Ermənistan ərazisinə Azərbaycana məxsus mədəni irsin hazırkı vəziyyətinin araşdırılması məqsədilə UNESCO faktaraşdırıcı missiyasının göndərilməsinin vacibliyini vurğulayıb. Həmçinin, görüşdə Azərbaycanın dəvəti ilə BMT missiyasının Qarabağ ərazisinə iki səfərinə dair məlumat verilib.
Görüşdə UNESCO-nun Baş direktoru Odre Azule rəhbərlik etdiyi təşkilatın Azərbaycanla münasibətlərin daha da genişləndirilməsində maraqlı olduğunu deyib.
Qafqaz Tarixi Mərkəzinin direktoru Rizvan Hüseynov "Bakı-Xəbər"ə şərhində bildirdi ki, nazir müavininin UNESCO-nun Baş direktoru Odre Azule ilə görüşdə bu vacib məsələni qaldırması Azərbaycanın UNESCO-nun Ermənistana missiya göndərməsinə nail olmaqda israrlı olduğunu bir daha təsdiqləyir. "Təbii, Azərbaycan xarici işlər nazirinin müavini Elnur Məmmədovun UNESCO-nun Baş direktoru Odre Azule ilə görüşü bir daha imkan verdi ki, Azərbaycan haqq səsini, həqiqəti çatdırsın. Əfsuslar olsun ki, UNESCO və onun indiki rəhbəri birmənalı olaraq ermənipərəst mövqedən çıxış edir. Faktiki olaraq UNESCO-nun Azərbaycana qarşı törədilən terrorla, vəhşiliklə və dağıdılan abidələrlə bağlı heç bir açıqlaması olmayıb. Əksinə, dəfələrlə Azərbaycanı haqsız olaraq suçlayıb, erməni tərəfi davamlı olaraq dəstəkləyir. Erməni tərəfin mövqeyini müdafiə edir. Mən inanmıram ki, bundan sonra Odre Azule öz fikrini dəyişəcək. Məsələ təkcə UNESCO-luq deyil. Bilirik ki, UNESCO faktiki olaraq Fransaya tabe olan bir qurumdur. Guya beynəlxalq qurumdur, mədəniyyəti, elmi qoruyan təşkilatdır, amma reallıqda Fransanın maraqlarını qoruyur. Bu baxımdan da, Fransa kimləri özünə dost seçir o ölkəni də müdafiə edir, həmçinin Ermənistanı. Fransa hansı ölkəyə düşmən kəsilib, UNESCO da o ölkələrə, türk, müsəlman dövlətlərinə qarşı düşmənlik mövqeyi sərgiləyir. Kor olaraq bizə qarşı olan cinayətləri görmür. Amma yenə də bir fürsət idi ki, Azərbaycan tərəfi UNESCO-nun baş qərərgahının ofisində şəxsən Odre Azuleyə öz mövqeyini çatdırdı. Heç olmasa ümid edək ki, bundan sonra UNESCO-nun bizə qarşı həmlələri bir az azalar "-deyə R.Hüseynov qeyd etdi.
R.Hüseynov bildirdi ki, UNESCO-nun antiazərbaycan siyasətini bir az yumşaldacağına ümid etmək olar, amma bütövlükdə UNESCO-nun və onun rəhbərliyinin mövqeyinin dəyişəcəyinə inanmır. O hesab edir ki, bu qurum yenə də ermənipərəst mövqeyində qalacaq və Fransa rəhbərliyinin əmri altında heç də yaxşı olmayan işlər görəcək.
İradə SARIYEVA
