Mehman Muradlı: "Böyük ehtimalla prokurorla Putinin həbsi ilə bağlı gələcək addımları, bu yöndə veriləcək qərarları müzakirə edib"
Paris Sülh Forumu çərçivəsində baş nazir Nikol Paşinyan Beynəlxalq Cinayət Məhkəməsinin prokuroru Kərim Xan ilə görüşüb. Ermənistan Baş Naziri Aparatının İnformasiya və İctimaiyyətlə Əlaqələr Departamentinin verdiyi məlumata görə, həmsöhbətlər beynəlxalq ədalət və hüquqla bağlı məsələləri, eləcə də qarşılıqlı maraq doğuran digər mövzuları müzakirə ediblər.
Bəzi ekspertlər hesab edir ki, Paşinyan BCM ilə təmaslara keçməsi təsadüfi deyil. Böyük ehtimalla həmin görüşdə gələcəkdə Rusiya prezidenti Putinə qarşı atılacaq addımlarla bağlı fikir mübadiləsi aparılıb. Çünki Ermənistan Roma Statutunu təsdiqləməklə Putinin həbsinə razılıq verib. Bu barədə hüquqşunaslar nə düşünür?
Hüquqşunas Mehman Muradlı "Bakı-Xəbər"ə açıqlamasında bildirdi ki, Ermənistanda Roma Statutunu təsdiqləməklə Rusiya prezidenti Vladimir Putinin Ermənistana gedəcəyi təqdirdə onun həbs etmək öhdəliyini üzərinə götürüb: "Bundan sonra Rusiya XİN bəyan etdi ki, Ermənistanın Roma Statutunu ratifikasiya etməsi ikitərəfli münasibətlər üçün ən mənfi nəticələrə səbəb olacaq.İrəvanın Roma Statutunu ratifikasiya etməsindən sonra V.Putinin Ermənistana səfərini təsəvvür etmək çətindir. Kremlin sözçüsü Dmitri Peskov isə Ermənistan parlamentinin qərarını düşmənçilik kimi qiymətləndirib. Ermənistan bu bu statutu 1998-ci ildə imzalasa da, indiyədək ratifikasiya etməmişdi. 2004-cü ildə Ermənistanın Konstitusiya Məhkəməsi bu sənədə dair fikir söyləmiş və onu ölkə Konstitusiyasına zidd adlandırmışdı.
2004-cü ildən bəri Ermənistan Konstitusiyasına iki dəfə düzəlişlər edilib və bununla bağlı Nikol Paşinyanın hökuməti bu məsələni yenidən qaldırıb. Beləliklə, indi Ermənistanın qarşısında BCM-in yurisdiksiyasının tanınması üçün heç bir maneə yoxdur. Ermənistanın bu sənədi ratifikasiya etməsi onun üzərinə bir sıra öhdəlikllər, o cümlədən Rusiya prezidenti Vladimir Putinin, habelə Rusiyanın uşaq ombudsmanı Mariya Lvova-Belovanı həbs etmək öhdəliyi qoyur. Paşinyan buna görə, ölkəsinə basqıların olduğunu görür və böyük ehtimalla prokurorla Putinin həbsi ilə bağlı gələcək addımları, bu yöndə veriləcək qərarları müzakirə edib. Çünki hazırkı məqamda Ermənistan -Rusiya münasibətləri olduqca gərgin fazaya qədəm qoyub".
Məhəmmədəli QƏRİBLİ
