Bu gün Fransa hakimiyyətinin daxili və xarici siyasətində kəskin ziddiyyətlərin olması özünü olduqca qabarıq bir şəkildə büruzə verməkdədir. Başı Ermənistanı müdafiə etməyə, bölgədə sülhün, təhlükəsizliyin, sabitliyin təmin edilməsinə mane olmağa qarışan Emmanuel Makron iqtidarı ölkəsindəki vəziyyəti unudub, vətəndaşlarının nə istədiyini belə eşitmək, bu istiqamətdə addımlar atmaq fikrində deyil. Daxildə sabitliyi, əmin-amanlığı, vətəndaş məmnunluğunu təmin edə bilməyən bir ölkənin rəhbərinin digər ölkələrin daxili işinə müdaxiləni özünə bir prinsip kimi qəbul etməsi sadəcə təəccüb doğurur. Hazırda görünən budur ki, Fransanın demokratiyanın əsas tələblərini, eyni zamanda, beynəlxalq hüququn norma və prinsiplərini öyrənməyə və bundan sonra tətbiq etməyə böyük ehtiyacı var.
Fransada milli azlıqların hüquqlarına və təhlükəsizliyinə biganə münasibətin olması, qeyri-millətlərdən olan şəxslərə qarşı etinasızlıq, ksenofobiya və dini dözümsüzlük adi hala çevrilib. Bütün bunların kökündə ölkə başçısı Emmanuel Makronun qeyri-obyektivliyi, ayrı-seçkiliyi, hadisələrə biganəliyi və qatı ermənipərəst mövqeyi dayanır. Bu fonda Fransanın fiaskoları da qaçılmazdır. Məsələn, elə bu günlərdə Fransanın təsisçisi olduğu Frankofoniya təşkilatının nazirlər görüşü Kamerunda öz işini yekunlaşdırdı. Azərbaycanın sentyabr ayında həyata keçirdiyi antiterror tədbirlərindən sonra bütün beynəlxalq platformalarda ölkəmizə qarşı qarayaxma kampaniyası aparan Fransa və Ermənistan təşkilatın bu iclasında da bəzi ilkin cəhdlər etsələr də, onların bu səyləri heç bir nəticə vermədi.
Kamerunda Azərbaycanın sədri olduğu Qoşulmama Hərəkatının Frankofoniya daxilində qrupunun təsis edilməsi, bu ölkələrin Azərbaycana göstərdiyi dost münasibət Ermənistanın bu səylərinin uğursuz olacağını əvvəlcədən deməyə əsas verdi. Bununla yanaşı, ötən ilin noyabr ayında Frankofoniya təşkilatının Tunisdəki sammitində, Azərbaycan üzv olmadığı bir təşkilatda Fransa və Ermənistanın bütün səylərinə baxmayaraq irəli sürülmüş qətnamədə Azərbaycan əleyhinə bəndlərin əksəriyyətinin rədd edilməsi və qətnamə üzrə səylərin istənilən nəticə verməməsi Fransa və Ermənistanı Kamerunda bu kimi cəhdlərdən əl çəkməyə məcbur etdi.
Fransanın belə yarıtmaz, ikiüzlü siyasəti təkcə Azərbaycana münasibətdə özünü göstərmir. İsrail də Fransanın belə ikiüzlü siyasətinə şahidlik edən ölkələrdən biridir.
Xatırladaq ki, Emmanuel Makron İsrailə səfəri çərçivəsində baş nazir Benyamin Netanyahu ilə görüşü zamanı HAMAS-a qarşı mübarizə üçün regional və beynəlxalq koalisiya yaratmağı təklif edib. Makron İŞİD-ə qarşı mübarizə aparan beynəlxalq koalisiyanın HƏMAS-la da mübarizə aparmaq üçün genişləndirilməsinin zəruriliyinə çağırış edib: "İŞİD-ə qarşı ABŞ-ın rəhbərliyi ilə yaradılan beynəlxalq koalisiya HƏMAS-a qarşı da mübarizə aparmalıdır".
Makronun HƏMAS-la mübarizə üçün beynəlxalq koalisiya yaratmaq təklifi Fələstin-İsrail münaqişəsinə cəlb olunmaq istəməyən Avropa ölkələrində maraq doğurmadı. Çünki, belə bir ideya uzun müddətdir Yaxın Şərqdə davam edən münaqişənin həllinə töhfə verməyəcəkdi.
Beləliklə, Makron sülhə çağırış etmədi. Onun HƏMAS-a qarşı beynəlxalq koalisiya yaradılması çağırışı onu göstərdi ki, Fransa İsrail-Fələstin qarşıdurmasının daha da dərinləşməsində maraqlıdır və Qəzzada ölən dinc insanlar onun üçün heç bir əhəmiyyət daşımır. Makronun çağırışına cavab gəlməyəndən sonra bu dəfə o İsrailə mülki vətəndaşları bombalamağı dayandırması ilə əlaqədar çağırış edib. Belə ki, Makron Britaniyanın BBC telekanalına verdiyi müsahibədə İsrailin Qəzzada həyata keçirdiyi hücumlarda mülki vətəndaşların həlak olduğunu bildirib: "Körpələr, qadınlar və qocalar bombalanır və öldürülür. Bunun heç bir əsası və qanuniliyi yoxdur. Ona görə də biz İsraili dayanmağa çağırırıq".
İsrailin xarici işlər naziri Eli Koen Emmanuel Makronun Qəzzada atəşkəslə bağlı çağırışına cavab verib. Nazir "X" hesabında yazıb ki, bütün baş verənlərə, o cümlədən qırğına və Qəzza sakinlərinin iztirablarına görə, məsuliyyəti HƏMAS və İŞİD daşıyır: "HƏMAS və İŞİD Fələstinin ən böyük düşmənidir".
Nazir vurğulayıb ki, İsrail beynəlxalq hüquqa uyğun fəaliyyət göstərir: "Biz HƏMAS-la İŞİD-i məhv edənə və girovlarımızı geri qaytarana qədər işimizi davam etdirəcəyik".
Bütün bunar Makronun nə qədər naşı siyasətçi olduğunu ortaya çıxarır. Beynəlxalq hüquq da, bəşəri dəyərlər də qanlı müharibənin dayandırılması zərurətini ortaya qoysa da, Fransa belə siyasətlə "ocağın üzərinə benzin" tökməklə məşğuldur.
Tahir TAĞIYEV
