Arzuxan Əlizadə: "Ermənistan bu yöndə daha çox dirəniş göstərir və bu, açıqlama da bunun növbəti təzahürüdür"
Rusiya Xarici İşlər Nazirliyinin sözçüsü Mariya Zaxarova Ermənistan-Azərbaycan sərhədinin səyahət və kommersiya üçün açılması üzrə Rusiyanın vasitəçilik etdiyi razılaşmaların gerçəkləşməməsinə görə dolayı da olsa İrəvanı günahlandırıb.
Buna cavab olaraq Ermənistan Xarici İşlər Nazirliyi bildirib ki, rəsmi İrəvan Azərbaycanla onun Naxçıvan eksklavı arasında Ermənistan ərazisindən keçəcək potensial nəqliyyat əlaqələrinə Rusiyanın nəzarətinə heç vaxt razılıq verməyib. Ermənistan XİN sözçüsü Ani Badalyan Zaxarovaya cavabında deyib: "Ermənistan heç vaxt, heç bir sənəddə öz suverenliyinin məhdudlaşdırılmasına razılaşmayıb və suveren ərazisinin heç bir hissəsində üçüncü ölkənin nəzarəti qurula bilməz".
"Qərb də Zəngəzur dəhlizinə Rusiyanın nəzarət etməsini istəmir"
Məsələ ilə bağlı baki-xebr.com-a açıqlama verən AMİP sədri Arzuxan Əlizadə hesab edir ki, Ermənistan bütün vasitələrlə Zəngəzur dəhlizinə Rusiya Federal Təhlükəsizlik Xidmətinin nəzarət etməsini istəmir: "Özü də getdikcə Ermənistan bu yöndə daha çox dirəniş göstərir. Məlum açıqlama da bunun növbəti təzahürüdür. Halbuki, 10 noyabr 2020-ci il atəşkəs bəyanatının 9-cu maddəsində deyilir ki, Ermənistanda yerləşən Rusiya sərhədçiləri Naxçıvana və geriyə insan, maşın , yüklərin hərəkətinə nəzarət edəcək. Ermənistan isə getdikcə bunu pozmağa çalışır. Özü də bu yöndə Ermənistanın pozucu açıqlamaları son bir ildə daha da intensivləşib. Bu, təkcə İrəvanın Zəngəzur dəhlizinə eksteretorial status verilməsində maraqlı olmaması ilə bağlı olan məsələ deyil. Məsələ ondadır ki, Qərb də dəhlizə Rusiyanın nəzarət etməsini istəmir. Paşinyan hakimiyyətinin bəyanatın 9-cu maddəsinə belə inadkrlıqla müqavimət göstərməsi həm də bununla əlaqədardır. Yoxsa bu dərəcədə dirəniş göstərə bilməzdilər. Fransanın Ermənistanda artan aktivliyi, Avroittifaqın prosesə cəlb olunması Paşinyan hakimiyyətini üçtərəfli razılaşmadan yayınmağa həvəsləndirir".
Vidadi ORDAHALLI
