Azər Həsrət: "Ukrayna o boyda Rusiyanı bataqlığa elə saplayıb ki, Moskva nəfəsini dərə bilmir"
ABŞ-ın vitse-prezidenti Cey Di Vens Ukrayna və Avropanın Rusiyaya qarşı qələbə qazana bilməyəcəyini bildirib və prezident Donald Trampın münaqişəyə “reallıq və faktlarla” yanaşdığını vurğulayıb.
“Üç il ərzində prezident Tramp və mən iki sadə arqument irəli sürdük: birincisi, əgər Tramp hakimiyyətdə olsaydı, bu müharibə heç başlamazdı; ikincisi, nə Avropa, nə Bayden administrasiyası, nə də Ukrayna bu müharibədə qalib gələ bilməz. Bu, üç il əvvəl doğru idi, iki il əvvəl doğru idi, keçən il də doğru idi və bu gün də doğrudur”, – deyə Vens bildirib.
Yəni vitse-prezident Vens deyib ki, Avropa və Ukrayna təklikdə Rusiya ilə vuruşa bilməz. Vensin bu sözləri Ukrayna və Avropanı hansı hərəkətlərə sövq edə bilər?
Baki-xeber.com saytına açıqlamasında siyasi şərhçi Azər Həsrət bildirdi ki, əslinə qalsa, Avropa səfərbər olsaydı, uyğun şəkildə Ukraynaya lazım olan dəstəyi vaxtında və operaptiv formada versəydi, Rusiya çoxdan yerinə oturdulmuşdu: "Amma o da nəzərə alınmalıdır ki, Avropa ölkələri Amerika deyil, yəni o gücə və qüdrətə sahib deyillər. Bu ölkələr arasında ən güclüsü Fransa və Almaniyadır. Almaniya İkinci Dünya müharibəsindən sonra hərbi cəhətdən hələ indi-indi özünə gəlir. Fransa isə o qüdrətə və dəyanətə sahib deyil.
Qalır bir Birləşmiş Krallıq, yəni İngiltərə, təbii ki, onlar hərəkətə keçsəydilər Ukraynaya ciddi dəstək verə bilərdilər. Fikrimcə, ABŞ vitse-prezidentinin iddia etməsi ki, Avropa ölkələri bu məsələdə Ukraynaya kömək edə, Rusiyaya qalib gələ bilməzlər - bu o qədər də reallığı əks etdirmir. Sadəcə olaraq birlikdə hərəkət etmək lazım idi.
Nəzərə almaq lazımdır ki, bu meydanda Ukrayna təkbaşına savaşır. Ukrayna o boyda Rusiyanı bataqlığa elə saplayıb ki, Moskva nəfəsini dərə bilmir. Rusiya üç ildir can verir. Halbuki, Rusiya üç günə Kiyevdə oturacağını bəyan etmişdi, artıq üç il keçir...
Hələ nəzərə almaq lazımdır ki, Ukrayna vaxtilə nüvəsizləşdirilib, ordu quruculuğuna o qədər də diqqət yetirilməyib. Çunki Ukrayna belə bir hücum gözləmirdi. Bu, Ukrayna tərəfindən bir səhv siyasət idi. Amma Ukrayna toparlana bildi və Rusiyaya gərəkən müqaviməti davam etdirir. Əgər Avropa Ukraynaya lazımi dəstək versəydi, indi Rusiya yəqin ki, Moskva ətrafında müdafiə olunardı.
ABŞ isə uzaqdan dəstək verib, dəstək səmərəsiz təşkil edildi və verilən silahlarla Rusiyanın dərinliklərinə zərbələr endirməyə qadağalar tətbiq edildi. Ukrayna isə öz içinə sıxışıb, müharibəni öz sərhədləri daxilində aparmağa məcbur oldu. Bu baxımdan düşünürəm ki, ABŞ çox qüdrətli dövlətdir, amma özlərıni bir qədər şişirtməyə meyllidirlər.
Eyni zamanda, ABŞ onu da unutmamalıdır ki, Ukraynanın bu haqq davaşında ona dəstək olan qardaş Türkiyə də var. Türkiyə ordusu Avropa qitəsinin ən güclü, NATO-nun isə ikinci ordusudur - bu unudulmamalıdır. Əlbəttə, biz Türkiyənin açıq müharibəyə girəcəyini təxmin etmirik, amna hər halda bu güc nəzərə alınmalıdır. Onun Ukraynaya ən azı Avropa ölkələri qədər hərbi dəstək vermək imkanları var".
Dəniz NƏSİRLİ
