Ermənistanın baş naziri Nikol Paşinyan erməni əsilli bəzi Rusiya vətəndaşlarının Ermənistana girişinin niyə qadağan edildiyini açıqlayıb. Söhbət Rusiya Dövlət Dumasının deputatı Konstantin Zatulin, “News Media” holdinqinin təsisçisi Aram Qabrelyanov və “Rossiya Seqodnya” media qrupunun və RT kanalının baş redaktoru Marqarita Simonyandan gedir. Onlar Ermənistana girişlərinə qadağa qoyulmasından şikayətləniblər.
Nikol Paşinyan sonuncu mətbuat konfransında ilk dəfə olaraq təsdiqləyib ki, həqiqətən də bu şəxslərin Ermənistana girişi qadağandır. Belə ki, Paşinyan Simonyanın ölkəyə giriş qadağasının səbəbləri ilə bağlı sualı cavablandırarkən bildirib: “Onlar xalqın seçdiyi hökumətə hörmət etməyə borcludurlar. Əgər bu insanlar yaşadıqları ölkələrdə Ermənistanla etdiklərinin 1%-ni etsəydilər, vizasız evlərinə gedə bilməzdilər”. Paşinyan Zatulinin ötən il dərc olunmuş və deputatın təhlükəsiz dəhlizin təmin edilməsindən danışdığı müsahibəsinə də işarə edib: “İnsanlar çıxıb deyirlər ki, Ermənistan dəhliz vəd edib və bu dəhlizi təmin etməlidir. Bu, ermənipərəst mövqedirmi?”. Xatırladaq ki, ötən il “Yerkir Media” telekanalına müsahibə verən Zatulin Nikol Paşinyanı Ermənistan ərazisindən “dəhliz” açmaq üçün sənəd imzalamaqda ittiham edib. Marqarita Simonyan Paşinyanın fikirlərinə cavab olaraq yazıb ki, o heç vaxt “hər hansı dəhliz haqqında heç nə deməyib”, Paşinyanın özü haqqında isə danışacaq. Xüsusilə onu “erməni xalqının xaini” və “namus və vicdanı olmayan xaç çarpayısı” adlandırıb. Simonyan Paşinyanın "arzuolunmaz şəxslər"lə bağlı sözlərinə reaksiya verərkən daha sonra qeyd edib: “Hazırkı iqtidarın hakimiyyəti dövründə Ermənistana səfər etmək niyyətində deyiləm. Mən heç vaxt heç bir dəhlizlə bağlı heç nə deməmişəm, amma Paşinyan haqqında şəxsən demişəm və deyəcəm də. O, erməni xalqına qarşı satqınlıq edib, ölkəni satıb, sata biləcəyi bütün erməni maraqlarını satıb. Paşinyan Rusiyaya nifrət edir və Putini aldadır”. Simonyan iddia edib ki, bu sözlərinə görə onu Ermənistana buraxmayıblar: “Qadağa məni çox da narahat etmir. Onsuz da Ermənistana getmirdim. İndiki hökumət dövründə heç bir halda Ermənistana getməzdim. Amma mənim girişimə icazə verilmədiyinə dair ifadə utancvericidir. Hörmətsizliyə görə məni ölkəyə buraxmırlar. Onu deyim ki, hörmətsizliyi hələ qazanmaq lazımdır. Beləliklə, sözünüzü düzəldin. Marqarita Simonyanın Ermənistana girişi indiki hakimiyyətdən iyrəndiyi üçün qadağan edilib”. Erməni əsilli rusiyalı jurnalist, media meneceri, “News Media” media şirkətinin rəhbəri Aram Qabrelyanov isə “Facebook” səhifəsində Ermənistan hakimiyyətini məhkəməyə verdiyini bildirib.
Xatırladaq ki, Qabrelyanov ötən həftə Ermənistana buraxılmayıb. Moskva Dövlət Beynəlxalq Münasibətlər İnstitutunun professoru Viktor Soqomonyan bildirib ki, o, təhsil müəssisəsinin təşkilatçılığı ilə jurnalistika üzrə ustad dərsi keçmək üçün bir günlük ölkəyə gəlib: “Aeroportda onun sərhədi keçməsinə icazə verilməyib. Qabrelyanova bildiriblər ki, o, Ermənistanda arzuolunmaz şəxsdir və ölkədə sabitliyi poza bilər”. O qeyd edib ki, Qabrelyanov növbəti reyslə Moskvaya qayıdıb. Məsələ ilə bağlı Qabrelyanov bildirib: “Əvvəlcə Ermənistanda tanınmış vəkil Aram Vardevanyana müraciət etdim. Onun hüquq bürosu əcdadlarımın vətəninə səfərimə qadağa qoyulması ilə bağlı məhkəmədə Ermənistan hakimiyyəti ilə davada mənim maraqlarımı müdafiə edəcək. İkinci iddia isə şəxsən Paşinyana qarşıdır, o sübut etməsə ki, mən nə vaxtsa Ermənistanda Zəngəzur dəhlizinin yaradılmasını tələb etmişəm, onda Nikol əfəndi buna görə cavab verməli olacaq. Mən məhkəmədə sübut edəcəm ki, Nikol fırıldaqçı olub və olaraq da qalmaqdadır. Üçüncüsü, Ermənistan əhalisinin 80 faizindən çoxu seçilmiş baş nazirə hörmətsizlik edir və hakimiyyət onları da öz vətənlərinə buraxmayacaq? Siz hakimiyyətin ünvanına ictimai söyüş söyə bilməzsiniz. Sevinirəm ki, Nikol türk dərvişlərinin əməllərini bilir və ermənilərin fikirlərini oxuya bilir!”. Bu ilin yanvarında isə Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Konstantin Zatulin Nikol Paşinyanın ünvanına ittihamlar səsləndirib. Zatulin “Qovorit Moskva” radiosuna bildirib ki, Avropa ölkələri və ABŞ münaqişənin həllində erməni tərəfinə kömək etmək niyyətində deyil, amma Nikol Paşinyan Rusiya kimi müttəfiqini onlara dəyişir: “Paşinyan hakimiyyəti manevr edir. Ermənistan açıq şəkildə müttəfiqlərini dəyişməyə çalışır. Rusiyanı Qərblə əvəzləyir”.
Zatulinin sözlərinə görə, Ermənistan hökuməti bir tərəfdən, Qarabağdakı vəziyyətin nizamlanmasının Rusiya variantını qəbul etmək istədiyini bəyan edir, digər tərəfdən isə KTMT-də fəal iştirak etməməkdən danışır. Bunlar açıq şəkildə müttəfiqlərini dəyişməyə çalışan Paşinyan hakimiyyətinin manevrləridir. Rusiyanın əvəzinə Qərb. Və bu anonsların eyni vaxtda verilməsi Ermənistan hakimiyyətinin oynamasından xəbər verir”. Bütün bunlar göstərir ki, Ermənistanın indiki hakimiyyətinin Rusiyada erməni diasporu və lobbi qüvvələri ilə münasibəti kəskin pisləşir. Tərəflər bir-birinə qarşı artıq radikal mövqe sərgiləyir.
Tahir TAĞIYEV
