İslam İnqilabı Qvardiyasının xarici əməliyyatlar qolu olan “Qüds” qüvvələrinə bağlı “Hüseyniyun” terror qruplaşması “Kərimə dövlət” adlı kitab nəşr etdiyini elan edib. Bu barədə ArazNews.az Teleqram kanalında məlumat yayılıb.
Bu kanal yazır ki, sözdə bu kitabın müəllifi Azərbaycanda İslami idarəçilik diskursunu müvafiq açar sözü olan “Kərimə Dövlət”lə izah edir. Lakin sözdə kitab olaraq təqdim edilən və əslində qalın bir broşür olan bu cızmaqara Şuubilik düşüncəsinə aid bir sıra şüar və illüziyalardan başqa heç nə ehtiva etmir.
Qeyd edilir ki, şiəlik məzhəbini fars etnik maraqlarına saxtalaşdırmış Şuubilik ideologiyasının illüziyalarını təkrarlamaqdan başqa heç bir məzmunu olmayan bu qondarma kitab sadəcə terror qruplaşması olan “Hüseyniyun” və onun ərbabı olan İran İslam Respublikasının Azərbaycanda hansı məqsədlərin peşində olduğunu anlamaq üçün əhəmiyyətlidir.
“Qumda məskunlaşan “Hüseyniyun” terror qruplaşması və onun rəhbərləri əsasən qondarma “Talış-Muğan Muxtar Respublikası”nın qalıqları, din və məzhəb örtüyü altında fars milliyyətçiliyi mənafeyinə uyğun olaraq İranda hökmranlıq edən mürtəce və orta əsr faşizmini Şimali Azərbaycana da yaymaq istəyirlər”-deyə ArazNews.az-da qeyd edilir.
“Kərimə dövlət” (i) nədir?
Son dövrlər “Kərimə dövlət” ifadəsi İranın ideoloji təxribat müstəvisində tez-tez işlədilir.
Mətbuatda qeyd edilir ki, belə adla tarixdə heç bir dövlət, nəzəriyyə, ya hansısa bir dini-siyasi cərəyan olmayıb və azı rast gəlinmir.
Ekspertlər hesab edir ki, bu tamamilə utopik bir cərəyandır və sırf Tehran rejiminin Azərbaycana qarşı təxribatçı planlarının bir hissəsini təşkil edir.
Mətbuatda gedən bir yazıda qeyd edilir ki. “Kərimə dövlət”i ifadəsi İmam Mehdinin dörd xüsusi naibindən biri olmuş Məhəmməd ibn Osman əl-Əmri tərəfindən nəql edildiyi bildirilən və Ramazan ayında oxunması məsləhət görülən İftitah duasında işlənib. Yazılanlara görə, həmin duada Allahın “İslam və müsəlmanları izzətli, nifaq və münafiqləri isə zəlil edəcəyi” Kərimə dövləti şövqlə arzulanır, həmin dövlətdə insanlara “dünya və axirət kəramətinin nəsib olacağı” vurğulanır. Dini ədəbiyyatda bu dövlətin “böyük qeybətdən” sonra zühur edəcək İmam Mehdi tərəfindən qurulacağı bildirilir…
Bunlar mətbuatda yazılanlardır və təbii, utopik, reallığa söykənməyən bir məsələdir ki, Tehran rejimi bundan istifadə edib “Hüseyniyun” terror təşkilatının vasitəsilə öz çirkin məqsədlərini açıqlayır.
“Bunlar özlərindən qondarma bir ideologiya uydurublar”
Mövzu ilə əlaqədar Azərbaycan Milli Dirəniş Təşkilatının sözçüsü, hazırda Türkiyədə yaşayan Güney azərbaycanlı ictimai-siyasi fəal Məcid Cavadi Araz “Bakı-Xəbər”ə şərhində bildirdi ki, şiəlikdə mövcud olan inanca görə axırzamanda 12-ci imam həzrəti Mehdi gələcək və yer üzündə ədalətli bir hakimiyyət quracaq, bütün dünyanı qurtaracaq: “12-ci imama bəşəriyyət aləminin qurtarıcısı deyirlər. Şiə inancına görə, bəşəriyyət aləminin xilaskarı gəlib bir dövlət quracaq və bütün insanlığı qurtaracaq, onlara nicat verəcək, ondan sonra qiyamət olacaq. Deyirlər onun quracağı dövlətin adı “Kərimə dövlət”idir. Bu məsələdə bəzi rəvayətlərə və hədislərə dayanırlar. Bildiyim qədər Quranda belə bir şey yoxdur, belə bir dövlətdən söhbət getmir. Bu imamların, səhabələrin, mücteyitlərin rəvayətlərinə dayandırılır. Bunlar özlərindən qondarma bir ideologiya uydurublar”.
Məcid Cavadi Araz “Bildirim ki, “Kərimə dövlət”i kitab adlandırmaq olmaz bu cızmaqaradan, çürük düşüncələrdən ibarət bir kitabcıqdır, cüzvədir. Əslində, bu kitabçada yeni bir şey yoxdur, həmişə danışdıqlarıdır. “Kərimə dövlət”in “Hüseynyun” terror təşkilatı tərəfindən Qum şəhərində çap olunması bir daha təsdiqləyir ki, bunlar İranın, SEPAH-ın və onun “Qüds” qüvvələrinin bilavasitə dəstəyi ilə hərəkət edirlər. Bu bunun açıq təsdiqidir. Kitabçanın isə əsas mahiyyəti budur ki, bunlar Tehran rejiminin dünya görüşünü Azərbaycan üçün bir “model” olaraq təqdim edirlər, hamısını Azərbaycana tətbiq etməyi formullaşdırırlar. O da nədir? Qurandan ayələr gətirirlər ki, hakimiyyət yalnız Allahındır, başqa heç kimə aid deyil. Sonra ayələr gətirirlər ki, Allahın da yer üzündəki təmsilçisi Peyğəmbər və Əhli-beyt idi. Bunlar ayələri istədikləri kimi təfsir edirlər, onları təhrif edirlər. Əslində, ayələrdə olmayan şeyləri deyirlər, ayələrə şərh gətirirlər, onların mahiyyətini yanlış təqdim edirlər. Sonra da yorum çıxarırlar ki, dünyadakkı hakimiyyət 12 imamın sonuncusu olan Mehdiyə məxsusdur, onun “təmsilçisi” hazırkı “imam”dır, o “imam” da Xamneidir. Dolayısı ilə Xamneini “Allahın yer üzündəki təmsilçisi” kimi qələmə verilir, guya ona “itaət” etmək Allahın “əmridir”. Söz azadlığını, insan haqqları və azadlığını, millət, xalq anlayışını, deomokratiyə və s inkar edirlər, “bunun söhbəti belə gedə bilməz” deyirlər. Xamneinin düşməni olan bütün xalqlar, dövlətlər, rejimlər hamısı “tavut”durlar. Tavutla da ki, Quran hökmünə görə cihad etmək, savaşmaq, öldürmək, ya məğlub etmək lazımdır. Dünya görüşləri bundan ibarətdir. Bunlara görə hazırda İranda “Kərimə dövlət”i var, bunu şiə toplumlarına yaymaq lazımdır, ən başda isə Azərbaycan gəlir. Bunlara görə, Azərbaycan şiəliyin vətənidir və ondan sonra “şiə hilalı” dedikləri “hilal” üzrə “Kərimə dövlət”ı “qurulmalıdır”, bundan sonra islam dünyasına, daha sonra isə dünyaya “yayılmalıdır”. Yəni bunların düşüncəsi belədir. Bunların düşüncəsində 12-ci imam bütün bəşəriyyət aləminin qurtarıcısıdır, onun da yer üzündəki “nümayəndəsi” Xamneidir. “Hüseynyun”un adamları Orxan Məmmədov, Tohid İbrahimbəyli və başqaları yutub, teleqram kanallarında bunu sıx-sıx dilə gətirirlər ki, bizim davamız eyni zamanda “İran mədəniyyəti” davasıdır, “Kərimə dövlət”in dili “fars dili olmalıdır”, bunun mərkəzində “İran dayanmalıdır”. Orxan Məmmədovun belə bir deyimi var: “Bizim davamız İran mədəniyyətinin Turan “vəhşiliyinə” qarşı mücadiləsidir”. Bu onun yazılarında var. Bunlar istəyirlər ki, şiəliyi eyni zamanda farslıq və fars mədəniyyəti əsasında dünyada yaratmaq, yaymaq istəyirlər”-deyə bildirdi.
M.C.Araz qeyd etdi ki, bunların nəzəriyyəsi şuubilik təriqətinə dayanır, bu da fars milliyyətçiliyinin köküdür, Abbasi sarayından min ildən bəri gələn təriqətdir. “Bunlar fars şiəliyini ərəb sünniliyinə qarşı qoyan bir təriqətdir. Şiəliyi farslığın xidmətinə gətirməyə çalışırlar, bu “nəzəriyyə” həmin “nəzəriyyə”dir. Digər məqam odur ki, bunların məsul şəxsləri, başçıları “Talış Muğan Respublikası”nın tör-töküntüləridir. Tohid İbrahimbəylinin də bunlarla yaxınlığı var. Bunların başçıları separatçılardır, eyni zamanda şuubiçi və şiədirlər. Keçmişdə də Əlikram Hümbətovla bağlı yas məraimi keçirdilər. Onun yasına Moskvadan separatçı Zabil Məhərrəmov da gəldi, oradan başqa separatçılar da çağırıb gətirdilər. Əslinə qalanda bunlar “Kərimə dövlət”i adı ilə fars sistemi qurmaq istəyirlər, amma üzünə şiə, islam örtüyü çəkirlər. Bunlar bu kitabda yazılmasa da, daim bunu özləri hər yerdə deyirlər”-deyə M.C.Araz qeyd etdi.
Əli TURABOV
