Ermənistan Baş naziri Nikol Paşinyan 44 günlük müharibədə uduzmaqlarının səbəbini ordu daxilində “beşinci kolon”un fəaliyyət göstərməsilə izah edib:
“Müharibədə minlərlə könüllü iştirak etdi. Sizə kim dedi ki, onların silahı çatışmırdı? Əgər Sarkisyan 2018-ci ildən sonra Ermənistanın heç bir hərbi-texniki dəstək almadığını söyləməklə pulsuz verilən silahları nəzərdə tutursa, o zaman bu silahların nə olduğu desin. Ermənistan 2018-2020-ci illərdə 10 il əvvəlkindən daha çox silah əldə edib. Yalnız müharibədən az öncə alınan Su-30 təyyarələri istifadəyə hazır deyildi, digər silahlar isə istifadə olundu”.
Qeyd edək ki, Ermənistanın keçmiş prezidenti Serj Sarkisyan 44 günlük müharibədə erməni ordusunun şəxsi heyətinin yalnız 50 faizinin iştirak etdiyini iddia etmişdi. Bundan başqa, Sarkisyan Ermənistanın 2018-ci ildən sonra heç bir hərbi-texniki dəstək almadığını da bildirmişdi.
Hərbi-siyasi ekspert İbrahim Rüstəmli “Bakı-Xəbər”ə açıqlamasında bildirdi ki, Ermənistanın baş naziri Nikol Paşinyanın 5-ci kolonla bağlı dedikləri kifayət qədər mübahisəlidir: “Çünki Ermənistanda “5-ci kolon” hər zaman fəaliyyətdə olub. Birinci Qarabağ savaşında da biz bunun ağır fəsadlarını gördük. Onlar məhz həmin “5-ci kolonun” vasitəsilə Azərbaycanın həm daxili nizamını pozdular, həm də hərbi təcavüzə bizi məruz qoydular. Bütün bunlar göstərir ki, Ermənistan marionet ölkədir, özünün heç bir müstəqil siyasəti olmayıb. Dövlət də insan kimidir. Onun da iradəsi, xarakteri olmalıdır. Bunlar isə hər zaman forpost olublar. Sadəcə, biz bunu müxtəlif zamanlarda, müxtəlif səviyyədə müşahidə etmişik. Elə vaxt olub ki, Rusiyanın, elə vaxt olub Fransanın güclü təsiri hiss edilib. İndiki dövrdə biz Rusiya və İranın üst mövqedə dayandığının şahidi oluruq. Azərbaycan dövlətinin apardığı məqsədyönlü siyasət nəticəsində biz bəzi dövlətlərin məsələyə münasibətində çox çevik dönüşlərə şahid oluruq. Buna görə də, bəzi dövlətlərin mövqeyində yumşalmalar nəzərə çarpır. Artıq onlar da problemin həllini Azərbaycanın ərazi bütövlüyü çərçivəsində görürlər. İradəsi olmayan bir ölkədə “beşinci kolon” haqda danışmağa dəyməz. Mən belə başa düşürəm ki, Ermənistan hegemon dövlətlərin poliqonudur. Ermənistan nə qədər ki sülh sazişinin şərtlərini qəbul etməyib, daim belə forpost kimi fəaliyyət göstərəcək. İran, Rusiya, Fransa kimi ölkələr həmişə burada meydan sulayacaq. Ermənistanın poliqona çevrilməsinin başlıca səbəblərindən biri də hegemon ölkələrin Qarabağ məsələsinin həllində maraqlı olmamaqlarıdır. Paşinyanın dediklərində qeyri-adi heç nə yoxdur. Biz bunu görürük və çox əla da başa düşürük. Paşinyan müxtəlif bəhanələr gətirməklə, həm də məğlubiyyətlərinin səbəbini gizlətməyə çalışır. Bu müharibəni Azərbaycanın əzmi, ordumuzun qüdrəti, Ali Baş Komandanımızın qətiyyəti qazanıb. Ermənistan ordusunun daxilində “ 5-ci kolon” olmasaydı belə, yenə biz qalib olacaqdıq”.
Qeyd edək ki, Ermənistan İstintaq Komitəsinin Hərbi cinayətlərin istintaqı baş idarəsinin xüsusi əhəmiyyətli işlərin araşdırılması idarəsi 44 günlük müharibə dövründə Ermənistanın yüksək vəzifəli şəxsləri tərəfindən vəzifə səlahiyyətlərindən sui-istifadə edərək törədildiyi ehtimal olunan cinayət faktı üzrə ilkin istintaq tədbirləri həyata keçirib.
İstintaq tədbirləri çərçivəsində Ermənistanın Baş naziri Nikol Paşinyan da şahid qismində dindirilib. Paşinyanın dindirilməsini ölən hərbi qulluqçuların qohumları tələb edib. Onlar hökumət binasının və Baş prokurorluğun binası qarşısında aylarla davam edən aksiyalar zamanı bu tələblərlə çıxış ediblər. Onlar Paşinyanın müttəhim qismində dindirilməsini tələb ediblər.
Məhəmmədəli QƏRİBLİ
