Ermənistanın anti-KTMT demarşları davam edir. Ermənistan Xarici İşlər Nazirliyinin sözçüsü Vaan Unanyan bəyan edib ki, ölkəsi KTMT baş katibinin müavini kvotasından imtina edib: “Bəli, biz KTMT-yə müvafiq təklif göndərmişik”. Maraqlıdır ki, XİN rəsmisi məlum qərarın təfərrüatlarını və səbəblərini açıqlamayıb.
Bundan əvvəl ötən il noyabrın 23-də Ermənistanın baş naziri Nikol Paşinyan KTMT-nin İrəvanda keçirilən sammitində təşkilatın Kollektiv Təhlükəsizlik Şurasının bəyannaməsini imzalamaqdan imtina etdi. O zaman Paşinyan bunu onunla əlaqələndirdi ki, mövcud vəziyyətdə Ermənistan hakimiyyəti təlimlərin keçirilməsini “məqsədəuyğun” hesab etmir. Bu ilin əvvəllərində Paşinyan bildirdi ki, ölkəsi bu il üçün təyin edilmiş KTMT təlimlərinin öz ərazisində keçirilməsini istəmir. İrəvan, həmçinin, KTMT-nin Ermənistana müşahidəçi missiyası göndərmək təklifini də rədd edib.
Göründüyü kimi, İrəvan faktiki olaraq KTMT-dən yollarını ayırmaq xəttini davam etdirir və bununla bağlı bütün vasitələrdən istifadə edir.
“Məhz bu amildən çıxış edərək Paşinyan daha cəsarətlə bu qurumun üzərinə gedir”
Məsələyə münasibət bildirən hərbi ekspert Ramil Məmmədlinin fikrincə, Paşinyan hakimiyyətinin KTMT-ni davamlı olaraq iqnor etməsi gözlənilən idi: “Ona görə ki, Nikol Paşinyanı hakimiyyətə gətirənlər ona belə təlimat verib. Söhbət rəngli inqilabla Nikolu hakimiyyətə gətirən Qərbdən gedir. İlk dövrlərdə Paşinyan KTMT-nin katibi olan Yuri Xaçaturovu həbs etdirdi. Bu, hələ o zaman Rusiya faktoru nəzərə alınmadan KTMT-nin nufuzuna vurulan böyük zərbə idi. 44 günlük Vətən müharibəsindən sonra isə Ermənistanda KTMT-yə qarşı aqressiya daha da artdı. Daha dəqiq desək, Paşinyan Ermənistanın müharibədə məğlub olmasından KTMT-yə qarşı daha həyasızcasına sui-istifadə etməyə başladı. Məqsəd bu qurumdan uzaqlaşmaqdır. Ukrayna müharibəsi ilə əlaqədar Rusiya zəifləyir. Məhz bu amildən çıxış edərək Paşinyan daha cəsarətlə bu qurumun üzərinə gedir. Hələ utanmadan Paşinyan martın 14-də keçirdiyi mətbuat konfransında dedi ki, KTMT Ermənistanı tərk edir: “KTMT-nin baş katibi Ermənistana səfər edərkən mənimlə söhbətində dedi ki, KTMT-də Ermənistanın KTMT-dən çıxacağı ilə bağlı müəyyən narahatlıqlar var. Cavabında dedim ki, bu qorxular əsassızdır və ehtimal ki, başqa qorxular da var. Xüsusilə Ermənistan Respublikasında KTMT-nin Ermənistan Respublikasını tərk etməsi qorxusu var”. Bütün bunlar onu göstərir ki, blokda qalmaq Ermənistan hakimiyyətinin nəzərincə məqsədəuyğun hesab edilmir. Qərbin də təzyiqləri getdikcə güclənir. Ona görə də istisna deyil ki, yaxın aylarda Ermənistanda KTMT-yə qarşı fəaliyyət daha da güclənəcək. İstisna deyil ki, Rusiyanın Ukraynada məğlubiyyəti tezləşərsə, Ermənistan həmin hərbi bloku tərk edəcək”.
Vidadi ORDAHALLI
