Ermənistanın baş naziri Nikol Paşinyan keçirdiyi mətbuat konfransında Qarabağın erməni icması nümayəndələrinin Bakıya dəvət olunmasına maraqlı reaksiya verib. Paşinyan suala cavab olaraq “bizə beynəlxalq təminat lazımdır” tezisini yenidən təkrarlayıb.
Daha sonra isə gülünc iddia səsləndirib: “Yeri gəlmişkən, burda belə bir sual ortaya çıxır – onlar (erməni icmasının nümayəndələri) əgər Bakıya getsələr, qayıdacaqlarmı? Bu suala kim cavab verə bilər?”
Bununla Nikol Paşinyan guya erməni icmasının nümayəndələrinin Bakıda saxlanılacağı ehtimalına işarə edir.
Paşinyanın bu qəribə yanaşmasını necə dəyərləndirmək olar?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Paşinyan dövrümüzün ən məzəli siyasətçisidir: “Çünki o öz çıxışlarında elə məqamları dilə gətirir ki, həm özünü gülünc vəziyyətə gətirir, həm də auditoriyanı güldürür. Birincisi, o gərək ermənidə olan xisləti azərbaycanlılara şamil etməsin. Ermənilərin apardığı siyasətə görə ölkədə özlərindən başqa heç bir dövlətin nümayəndəsi qalmayıb. Ölkəni monodövlətə çeviriblər. Olduqca vəhşi, vandal, irqçi xislətə malikdirlər. Hətta başqa millətləri ölkələrindən çıxardıqdan sonra özləri-öz aralarında didişirlər. Məsələn, İrəvandakı erməniləri ali sorta aid edirlər. Qarabağdakı erməniləri dönmüş, çevrilmiş sayırlar. Yaxın Şərqdən gələn ermənilərə aşağılayıcı tərzdə “axbar” deyirlər. Biz görürük ki, omlar hətta öz millətlərinin içində millətçilik edirlər. Bunlar kütləvi xəstəlikdən xəbər verir. Oradakı sağlam məntiqə söykənənlər ölkəni tərk ediblər. İndi ortada qalanlar bu düşük quruluşa dözməlidirlər. Səsini çıxaranların isə başından vururlar. Azərbaycanın bu təşəbbüsünə verilən reaksiya Paşinyanın cılızlığını, sarkastik idarəçiliyə meylli olmasını göstərir. Zəif insanlar həmişə özündən güclülərə həsrətlə baxırlar. Onlar güclünün etdiyini bacarmayanda çalışırlar ona qulp qoysunlar. Mövzunu gülüş doğuran tərzdə şərh etməyə çalışırlar. Azərbaycan ordusu Xankəndinin astanasındaydı. Bu həmin zaman idi ki, oradakı erməni əhali “Evinizə xoş gəlmisiniz” şuarını yazırdı. Onlar bilir ki, Qarabağdakı erməni icmasının yeganə çıxış yolu Azərbaycanın tərkibində olmaqdır. Ermənistana birləşmək, öz müqəddəratını həll etmək iflasa uğradı. Bütün alternativləri nəzərdən keçirəndən sonra indi görürlər ki, başqa yolları qalmayıb. Paşinyana nə dəxli var ki, Azərbaycanda yaşayan ermənilər necə inteqrasiya edəcəklər? Paşinyanın belə səriştəsi varsa, qoy öz vətəndaşlarına nicat versin. Əhali sürətlə ölkəni tərk edir. Ölkədən çıxan kimi Ermənistan vətəndaşı olduqlarını da unudurlar. Öz statistikalarında deyilir ki, il ərzində ən azı 150 min insan ölkəni tərk edir. Biz onların dərsini verib, ordularını darmadağın etmişik. Paşinyanın belə cılız danışığı nəyisə dəyişən deyil. Bu, azərbaycanlıların ermənilərə olan xahişi deyil, təklifidir. Həm Ermənistana, həm də ərazimizdəki ermənilərə onların özü üçün də optimal olan təklif irəli sürürük. Azərbaycan xalqının qarşısında o qədər cinayətlər törədiblər ki, başlarından yeni zərbə ala biləcəklərindən ehtiyat edirlər. Çünki səmimi deyillər. Nəzarət-buraxılış məntəqələrinin quraşdırılmasını ona görə yaxın qoymurlar ki, xalqımıza qarşı cinayət törətmiş şəxslərin hamısı ələ keçə bilər. Bakı isə görüş üçün belələrini dəvət etmir”.
Qeyd edək ki, Azərbaycan Prezident Administrasiyası Qarabağın erməni ictimaiyyətinin nümayəndələrini reinteqrasiya ilə bağlı təmasların davam etdirilməsi, habelə Qarabağda infrastruktur layihələrinin reallaşdırılması məsələlərinin müzakirəsi üçün ikinci görüşə dəvət edib.
Görüşün yaxın günlərdə Bakı şəhərində keçirilməsi təklif olunub.
Məhəmmədəli QƏRİBLİ
