“Azərbaycan səfirliyinə hücum edən şəxsin işi üzrə istintaq davam edir”. Azad İran Teleqram kanalının yaydığı məlumata görə, bunu İranın ədliyyə orqanının sözçüsü Məsud Setayişi deyib.
Onun sözlərinə görə, Azərbaycan səfiliyinə hücum edən şəxsin işinə olan həssaslıq və xüsusi diqqət baxımından Tehran Baş Prokurorluğunun ixtisaslaşdırılmış sahəsində məsələyə baxılır. İstintaq davam edir. Nəticə əldə olunan kimi məlumat veriləcək.
Molla rejiminin obyektivliyinə inanmaq olarmı?
İndiyə qədər aydınlaşan hər hansı bir məsələ olubmu? Hər şey aydın şəkildə ortada olduğu halda niyə Tehrandan konkret şəkildə ortada açıqlama yoxdur, aydınlaşmayan nədir? Qeyri-müəyyən olan nədir? Niyə indiyə qədər onlar Azərbaycanla əməkdaşlıq etməyiblər?
“...Həmin hadisənin üzərindən bu qədər uzun müddət keçibsə, o nəticəyə gəlmək olmazmı ki, Tehran prokurorluğu öz işinin öhdəsindən gələ bilmir?”
Siyasi ekspert Rövşən Rəsulov “Bakı-Xəbər”ə şərhində bildirdi ki, bu məsələdə Tehran rejimindən hansısa obyektivlik gözləmək olmaz. “Molla rejiminin başıəmmaməliləri artıq açıq şəkildə, xüsusilə sözügedən məsələdə bu və ya digər şəkildə həddini aşır. Şəxsən mənim düşüncəmə görə, belə bir açıqlamanın verilməsi dolayısı ilə Azərbaycanın maraqlarını “barmağa dolamaq” cəhdi mənasını daşıyır. Deməli, uzun müddət əvvəl bir ölkənin səfirliyinə hücum olunub və belə bir həssas, diplomatik məsələdə “istintaq davam edir” kimi ifadənin işlədilməsi başından eləmək anlamından başqa heç nə deyil. Tehran rejiminin ədliyyə nazirliyinin rəsmi sözçüsü Məsud Setayişiyə sual etmək lazımdır ki, əgər sizin hər hansı bir xarici ölkədəki diplomatik nümayəndəliyinizə hücum aktı törədilsəydi, ölənləriniz və yaralannarınız olsaydı siz necə davranardınız? Bunu necə başa düşmək olar? Guya onlar deməsə idi ki, bu məsələ həssasdır biz də bunu bilməyəcəkdik? Üstəlik, həmin cinayət işinə guya Tehranın Baş Prokuroluğunun ixtisaslaşmış şəxsləri baxırsa və həmin hadisənin üzərindən bu qədər uzun müddət keçibsə nəticəyə gəlmək olmazmı ki, Tehran prokurorluğu öz işinin öhdəsindən gələ bilmir? Bütün bunları necə anlaya bilərik?
Bu sualın cavabı bəsitdir – molla rejimi terror aktının törədilməsində bilavasitə iştirak edib və indi də bunun üstünü ört-basdır etmək üçün dəridən-qabıqdan çıxırlar. Burada hər hansı bir obyektivlikdən ümumiyyətlə danışmaq olmaz!
Biz bütün bunlardan həm də belə nəticə hasil edə bilərik ki, İran terror dövlətidir və bu gün yalnız Azərbaycanın səfirliyinə hücum etməklə, diplomatik nümayəndələrimizi qətlə yetirməklə iş başa çatmır”. R.Rəsulov qeyd etdi ki, bilindiyi kimi, Tehranın xarici ölkələrdəki səfirliklərində ayrıca, qanunsuz, yəni gizli terrorçu şəbəkələri fəaliyyət göstərirlər. “Onların işləri molla rejiminə qarşı çıxış edən mühacirləri, hətta xarici vətəndaşları – jurnalistləri, ictimai-siyasi xadimləri neytrallaşdırmaqdan ibarətdir. Və bu kimi hadisələrin arxasında təzyiq siyasəti də dayanır. Misal üçün, Almaniyada təhsil alan, yaşayan Azərbaycan gəncinin öz tələbə yoldaşını ziyarət etmək üçün İrana getməsi və yoxa çıxması da bu silsilədəndir. Neçə gündür İrana müraciət olunub və cavab yoxdur! Budur reallıq və gerçəklik ki, Tehranın molla rejimi əlində olan hər fürsətdə özünün çirkin niyyətlərini həyata keçirir. Səfirliyimizə edilən hücumun arxasında dayanan rejimin isə nəticə ortaya çıxaracağına inanmıram. Amma bu o demək deyil ki, rəsmi Bakı bu məsələdən yan keçəcək. Əsla belə olmayacaq və Tehrandakı terror aktının hesabı sorulacaq. Və bir azərbaycanlı olaraq biz də bu məsələdə daim səsimizi ucadan çıxarmalı, fars-molla rejiminin qaniçənlik siyasətinə qarşı sözümüzü deməliyik”.
Azərbaycanla bu məsələdə Tehran rejiminin əməkdaşlıq etmək istəməməsinə gəlincə, R.Rəsulov qeyd etdi ki, burada qaranlıq bir şey yoxdur, birgə əməkdaşlıq edilərsə bu terror cinayətinin molla rejiminin özü tərəfindən törədildiyi bir daha ifşa olunar. “Molla rejiminin deməyə heç bir sözü qalmayıb, baş verənlərin terror hadisəsi olduğu, arxasında rejimin özünün dayandığı ilk gündən ortadadır. Rejim sadəcə bu cür qondarma məhkəmə şousu ilə vaxtı uzatmağa çalışır ki, bəlkə nəsə sivişib çıxa bildi, amma bu da mümkün olmayacaq. Azərbaycan məsələnin üstündə ciddi dayanıb”-deyə R.Rəsulov əlavə etdi.
Əli TURABOV
